Shocking News / ୪୦ଟି ଦେଶକୁ ପଠାଇଥିଲା ସୁଇସାଇଡ୍ ପ୍ୟାକେଟ୍; ମିଳିଲା ୧୦୦ ମୃତ୍ୟୁର ଲିଙ୍କ୍

କାନାଡାର ଅଧିବାସୀ କେନେଥ୍ ଲ' । ଇଣ୍ଟରନେଟ୍ ମାଧ୍ୟମରେ ୪୦ଟି ଦେଶକୁ ପଠାଉଥିଲା ସୁଇସାଇଡ୍ ପ୍ୟାକେଟ୍ । ଆଉ ବିକୁଥିଲା ବିଷ ବା ପଏଜନ୍ । ଇଣ୍ଟରନେଟ୍ ମଧ୍ୟରେ ଲୁଚି ରହିଥିବା ଏହି ଭୟଙ୍କର "ମୃତ୍ୟୁ ବଜାର"ର ହୋଇଛି ପର୍ଦ୍ଦାଫାଶ । ଶେଷରେ ଧରାପଡ଼ିଛି ଏହି ମୃତ୍ୟୁର ସୌଦାଗର । ସେ ନିଜ ଦୋଷ ସ୍ୱୀକାର କରିଥିବାବେଳେ ତାକୁ ଗିରଫ କରିଛି ସ୍ଥାନୀୟ ପୋଲିସ ।

ଇଣ୍ଟରନେଟର ଏହି ମୃତ୍ୟୁ ବଜାରର ସତ ବେଶ ଭୟଙ୍କର । ୬୦ ବର୍ଷୀୟ ପୂର୍ବତନ ଇଞ୍ଜିନିୟର ଏବଂ ହୋଟେଲ ରୋଷେୟା କେନେଥ୍ ଲ ବିରୁଦ୍ଧରେ ଅନଲାଇନ୍ ୱେବସାଇଟ୍ ମାଧ୍ୟମରେ ବିଶ୍ୱର ଡଜନ ଡଜନ ଦେଶକୁ "ଆତ୍ମହତ୍ୟା ବା ସୁଇସାଇଡ୍ ପ୍ୟାକେଟ" ପଠାଇବାର ଅଭିଯୋଗ ରହିଛି । ଯିଏ ସେହି ସୁଇସାଇଡ୍ ପ୍ୟାକେଟ୍ ମଗାଇଛି, ତାହାର ମୃତ୍ୟୁ ନିଶ୍ଚିତ ଘଟିଛି । ଏପରି ମୃତ୍ୟୁବରଣ କରିଥିବା ୧୦୦ରୁ ଅଧିକ ମୃତକଙ୍କ ବିଷୟରେ ଜଣାପଡ଼ିଛି ।

• ସୁଇସାଇଡ୍ ପାଇଁ କରୁଥିଲା ଉତ୍ସାହିତ

ଶୁକ୍ରବାର ଦିନ ଓଣ୍ଟାରିଓର ନ୍ୟୁମାର୍କେଟରେ ଯେତେବେଳେ ମାମଲା ଆରମ୍ଭ ହୋଇଥିଲା, କୋର୍ଟ ରୁମ ଭିଡ଼ ହୋଇଯାଇଥିଲା । କେନେଥ୍ ବିଚାରପତି ମିଶେଲ୍ ଫର୍ଷ୍ଟଙ୍କ ସମ୍ମୁଖରେ ସ୍ୱୀକାର କରିଥିଲା ଯେ ସେ ଯୁବକମାନଙ୍କୁ ଆତ୍ମହତ୍ୟା କରିବାକୁ ଉତ୍ସାହିତ କରିଥିଲା ଏବଂ ସେମାନଙ୍କୁ ଘାତକ ରାସାୟନିକ ପଦାର୍ଥ ଯୋଗାଇଥିଲା ।

ଅଦାଲତରେ ଅଭିଯୁକ୍ତ କେନେଥ୍ ୧୪ଟି ମାମଲାରେ ନିଜର ଦୋଷ ସ୍ଵୀକାର କରିଛି । କୋର୍ଟରେ ଯେତେବେଳେ ଆତ୍ମହତ୍ୟା କରିଥିବା ମାତ୍ର ୧୬ରୁ ୩୬ ବର୍ଷ ବୟସର ୧୪ ଜଣ କାନାଡୀୟ ଯୁବକଙ୍କ ନାମ ଗୋଟିଏ ପରେ ଗୋଟିଏ ପଢ଼ି ଶୁଣାଯାଇଥିଲା, ସେତେବେଳେ ମୃତକଙ୍କ ପରିବାର ନିଜ ଲୁହକୁ ଅଟକାଇପାରିନଥିଲେ । ହଠାତ୍ କୋର୍ଟ ଭିତରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଥିଲା । ଆସନ୍ତା ସେପ୍ଟେମ୍ବରରେ ଅଭିଯୁକ୍ତ କେନେଥ ଏହି ଭୟଙ୍କର ଅପରାଧ ପାଇଁ କଠୋର ଦଣ୍ଡ ଦିଆଯିବ ବୋଲି କୋର୍ଟ କହିଛନ୍ତି ।

ପଢନ୍ତୁ ଏହି ଖବର: ୪୮ ଘଣ୍ଟାରେ ୧୮ ମୃତ୍ୟୁ, ବିଷାକ୍ତ ମଦ ନେଲା ଜୀବନ

• ହଟ୍ ସସ୍ ଆଳରେ ବିଷ ବ୍ୟବସାୟ

କୋର୍ଟରେ ଉପସ୍ଥାପିତ ଦଲିଲରୁ ଜଣାପଡିଛି ଯେ ଅଭିଯୁକ୍ତ କେନେଥ୍ ଏହି ସମ୍ପୂର୍ଣ୍ଣ ରାକେଟ୍କୁ ଅତ୍ୟନ୍ତ ଚତୁରତାର ସହିତ ଚଳାଉଥିଲା । ସେ ପୂର୍ବରୁ ଟୋରଣ୍ଟୋର ଏକ ହୋଟେଲରେ ରୋଷେଇଆ ଭାବରେ କାମ କରିଥିଲା ଏବଂ ତାର କାର୍ଯ୍ୟକଳାପକୁ ଲୁଚାଇବା ପାଇଁ ୪ଟି କମ୍ପାନୀ ଏବଂ ଅନେକ ୱେବସାଇଟ୍ ସୃଷ୍ଟି କରିଥିଲା । ଏହାପରେ ଇଣ୍ଟରନେଟରେ ଆତ୍ମହତ୍ୟାର ଉପାୟ ଖୋଜୁଥିବା ବା ମାନସିକ ଭାବେ ଚିନ୍ତିତ ଥିବା ଲୋକଙ୍କୁ ଟାର୍ଗେଟ କରିଥିଲା । ଏହାପରେ ସେମାନଙ୍କ ସହିତ ଯୋଗାଯୋଗକ ରି ତାଙ୍କୁ ସିଲଭର ରଙ୍ଗର ପ୍ୟାକେଟରେ ଘାତକ ରାସାୟନିକ ପଦାର୍ଥକୁ କୋରିଅର କରୁଥିଲା । ଏପରିକି ଏହାକୁ କିପରି ବ୍ୟବହାର କରିବ ତାର ପୂରା ପ୍ରକ୍ରିୟା ମଧ୍ୟ କହୁଥିଲା ।

• ସୁଇସାଇଡ୍ ପ୍ୟାକେଟ୍ ବିକି କୋଟି କୋଟି ରୋଜଗାର

ତଦନ୍ତରେ ଜଣାପଡ଼ିଛି ଯେ ଅଭିଯୁକ୍ତ ଧରାପଡ଼ିବା ପୂର୍ବରୁ ବିଶ୍ଵର ପ୍ରାୟ ୪୧ଟି ଦେଶରେ ୧୨୦୯ ସୁଇସାଇଡ୍ ପ୍ୟାକେଟ୍ ବିକ୍ରି କରିସାରିଛି । ଏହି ରକ୍ତର ଖେଳରେ ସେ ପ୍ରାୟ ୧.୮ କୋଟି ଟଙ୍କା ରୋଜଗାର ମଧ୍ୟ କରିଛି । ଅଭିଯୁକ୍ତର ସପିଫାଏ ଓ ପେୟପଲ୍ ଆକାଉଣ୍ଟରୁ ଏହି ଟଙ୍କା ମିଳିଛି ।

ବି:ଦ୍ର: ଯଦି ଆପଣ କିମ୍ବା ଆପଣ ଜାଣିଥିବା କେହି ଆତ୍ମହତ୍ୟା କରିବାର ଚିନ୍ତା କରୁଛନ୍ତି, ତେବେ ଏହା ଏକ ଅତ୍ୟନ୍ତ ଗୁରୁତର ଡାକ୍ତରୀ ଜରୁରୀକାଳୀନ ପରିସ୍ଥିତି । ତୁରନ୍ତ ଭାରତ ସରକାରଙ୍କ ଜୀବନସାଥୀ ହେଲ୍ପଲାଇନ୍ 18002333330ରେ ଯୋଗାଯୋଗ କରନ୍ତୁ । ଆପଣ ଟେଲିମାନ୍ସ ହେଲ୍ପଲାଇନ୍ ନମ୍ବର 1800914416କୁ ମଧ୍ୟ କଲ୍ କରିପାରିବେ । ଏଠାରେ ଆପଣଙ୍କ ପରିଚୟକୁ ସମ୍ପୂର୍ଣ୍ଣ ଗୋପନୀୟ ରଖାଯିବ ଏବଂ ଏହି ପରିସ୍ଥିତିକୁ ଦୂର କରିବା ପାଇଁ ବିଶେଷଜ୍ଞମାନେ ଆପଣଙ୍କୁ ଆବଶ୍ୟକ ପରାମର୍ଶ ଦେବେ । ମନେ ରଖନ୍ତୁ, ଜୀବନ ଅତ୍ୟନ୍ତ ମୂଲ୍ୟବାନ।