ପଞ୍ଜାବରେ ଦୁର୍ନୀତି ବିରୋଧରେ ସିବିଆଇର ବଡ଼ କାର୍ଯ୍ୟାନୁଷ୍ଠାନ । ମୋହାଲି ସ୍ଥିତ ପଞ୍ଜାବର ଭିଜିଲାନ୍ସ ବ୍ୟୁରୋ ଅଫିସ ଉପରେ ସିବିଆଇ ଚଢଉ କରିଛି । ଏହି କାର୍ଯ୍ୟାନୁଷ୍ଠାନ ଭିଜିଲାନ୍ସ ବ୍ୟୁରୋ ସହ ଜଡ଼ିତ ଏକ ଲାଞ୍ଚ ରାକେଟର ଖୁଲାସା ପରେ ନିଆଯାଇଛି । ଯେଉଁଥିରେ ଏକ ପଞ୍ଚ ତାରକା ହୋଟେଲ ପ୍ରକଳ୍ପ ନିର୍ମାଣର ଜମି ପାଇଁ ପ୍ରାୟ ୨୦ ଲକ୍ଷ ଟଙ୍କା ଲାଞ୍ଚ ମଗାଯାଇଥିବା ଅଭିଯୋଗ ହୋଇଥିଲା । ଚଢଉ ସମୟରେ ଦଲାଲ ରାଘବ ଗୋୟଲଙ୍କୁ ଗିରଫ କରିଥିବାବେଳେ ନଗଦ ୧୩ ଲକ୍ଷ ଟଙ୍କା ଜବତ କରାଯାଇଛି ।

• ଭିଜିଲାନ୍ସ ଅଫିସରେ ହଇଚଇ

ସିବିଆଇ ହଠାତ୍ ରାଜ୍ୟର ଦୁର୍ନୀତି ନିବାରଣ କେନ୍ଦ୍ରର ମୁଖ୍ୟ କାର୍ଯ୍ୟାଳୟ ଉପରେ ଚଢଉ କରିବା ପରେ ହଇଚଇ ସୃଷ୍ଟି ହୋଇଛି । ତଦନ୍ତକାରୀ ଦଳ ସୋମବାର ବିଳମ୍ବିତ ରାତିରେ ଅଫିସର ପହଞ୍ଚି ଚଢଉ କରିବା ବେଳେ ଅନେକ ଗୁରୁତ୍ଵପୂର୍ଣ୍ଣ କାଗଜ ପତ୍ର ସହିତ ଅର୍ଥ କାରବାରର ସୁରାକ୍ ପାଇଛି । ଏହି ଠକେଇ ମାମଲାରେ ଅନ୍ୟ କୌଣସି ବରିଷ୍ଠ ଅଧିକାରୀଙ୍କ ସମ୍ପୃକ୍ତି ଅଛି କି ନାହିଁ ସେ ନେଇ ଜାଣିବା ଲାଗି ସିବିଆଇ ଭିଜିଲାନ୍ସ ମୁଖ୍ୟକୁ ଯୋଗାଯୋଗ କରିଥିଲା, କିନ୍ତୁ ଚଢଉ ପରଠାରୁ ତାଙ୍କ ମୋବାଇଲ ଫୋନ ସ୍ଵିଚଅଫ୍ ଅଛି ଏବଂ ସେ ଏବେ ଯାଏଁ ଫେରାର ଅଛନ୍ତି । ଏହି ପୂରା ଠକେଇ କାର୍ଯ୍ୟ ଏକ ସଂଗଠିତ ଢଙ୍ଗରେ କରାଯାଉଥିବା ସିବିଆଇ ପକ୍ଷରୁ କୁହାଯାଇଛି ।

• ଗିରଫ ଦଲାଲଙ୍କୁ ଚାଲିଛି ପଚରାଉଚରା

ସିବିଆଇ ସୂତ୍ରରୁ ମିଳିଥିବା ସୂଚନା ଅନୁସାରେ, ଗିରଫ ଦଲାଲକୁ ପଚରାଉଚରା କରାଯାଉଛି, ଯାହାଦ୍ଵାରା ଲାଞ୍ଚ କାରବାରରେ ଆଉ କିଏ ସମ୍ପୃକ୍ତ ସେ ସମ୍ପର୍କରେ ଜଣାପଡ଼ିବ । ଏଜେନ୍ସି ଏହା ମଧ୍ୟ ଯାଞ୍ଚ କରୁଛି ଯେ ଲାଞ୍ଚ ଟଙ୍କା କେଉଁ ସ୍ତର ପର୍ଯ୍ୟନ୍ତ ପହଞ୍ଚାଯାଉଥିଲା ଓ ଏଥିରେ ବିଭାଗର ଅନ୍ୟ କୌଣସି ଅଧିକାରୀ ସାମିଲ ଅଛନ୍ତି କି ନାହିଁ । ମୋହାଲି ସ୍ଥିତ ଭିଜିଲାନ୍ସ ବ୍ୟୁରୋ କାର୍ଯ୍ୟାଳୟ ଉପରେ ଏହି ରେଡ୍ ପରେ ପ୍ରଶାସନିକ ଓ ରାଜନୈତିକ ମହଲରେ ହଇଚଇ ସୃଷ୍ଟି ହୋଇଛି ।

• ବଢିପାରେ ଗିରଫଦାରୀ

ଏଠାରେ କହିରଖୁଛୁ କି, ଆମ ଆଦମି ପାର୍ଟି (AAP) ନେତୃତ୍ଵାଧୀନ ପଞ୍ଜାବରେ ଲଗାତାର ଦୁର୍ନୀତି ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ସରକାରଙ୍କ ପକ୍ଷରୁ ଦାବି କରାଯାଉଥିଲା । ହେଲେ ଦୁର୍ନୀତି ରୋକିବା ପାଇଁ ଥିବା ଖୋଦ୍ ଭିଜିଲାନ୍ସ ବିଭାଗ ଏପରି ଲାଞ୍ଚ କାରବାରରେ ଜଡ଼ିତ ହେବା ତାକୁ ନେଇ ପ୍ରଶ୍ନ ଉଠିଛି । ଏବେ ସିବିଆଇ ମାମଲା ରୁଜୁ କରି ତଦନ୍ତ ପ୍ରକ୍ରିୟାକୁ ତ୍ଵରାନ୍ଵିତ କରିଛି । ଏଜେନ୍ସି ଡିଜିଟାଲ ରେକର୍ଡ, କଲ୍ ଡିଟେଲ୍ସ ଓ ଅର୍ଥ କାରବାରର ଯାଞ୍ଚ କରୁଛି । ଆଗାମୀ ଦିନରେ ତଦନ୍ତ ଆଗେଇଲେ ଗିରଫ ବ୍ୟକ୍ତିଙ୍କ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି ।

ପଢନ୍ତୁ ଏହି ଖବର: CBI ପଞ୍ଝାରେ ସରକାରୀ କର୍ମଚାରୀଙ୍କ ସହ କନଷ୍ଟ୍ରକସନ୍ କମ୍ପାନୀର ମାଲିକ ଓ ଆର୍କିଟେକ୍

ସୂଚନା ଥାଉ କି, ପଞ୍ଜାବର ୨୦୦୯ ବ୍ୟାଚ୍ IPS ଅଫିସର ତଥା ନିଲମ୍ବିତ ଡିଆଇଜି ହରଚରଣ ସିଂହ ଭୁଲ୍ଲରଙ୍କ ସହ ଜଡ଼ିତ ଏକ ଲାଞ୍ଚ ଦୁର୍ନୀତିର ତଦନ୍ତର ଏକ ଅଂଶ ଭାବରେ ଏହି ଚଢାଉ କରାଯାଇଥିଲା, ଯାହାକୁ ଏଜେନ୍ସି ଅକ୍ଟୋବର ୨୦୨୫ରେ ଗିରଫ କରିଥିଲା । ସେ ଏକ ସ୍କ୍ରାପ୍ ବ୍ୟବସାୟୀଙ୍କଠାରୁ FIR ରଫାଦଫା କରିବା ପାଇଁ ଲାଞ୍ଚ ମାଗିଥିଲେ । ସେତେବେଳେ ତାଙ୍କ ବାସଭବନରୁ ୫ କୋଟିରୁ ଅଧିକ ନଗଦ ଟଙ୍କା, ସୁନା ଏବଂ ଦାମୀ ଗାଡି ଜବତ କରାଯାଇଥିଲା । ଏହି ହାଇପ୍ରୋଫାଇଲ ମାମଲାରେ ପଞ୍ଜାବ ଭିଜିଲାନ୍ସ ବିଭାଗ ପକ୍ଷରୁ କୌଣସି ଆନୁଷ୍ଠାନିକ ପ୍ରତିକ୍ରିୟା ଦିଆଯାଇନାହିଁ ।