ଭୁବନେଶ୍ଵର: ବେଦୀ ସଜା ହୋଇଥିଲା, ଭୋଜି ବି ସରିଥିଲା । ଆଉ କିଛି ସମୟ ପରେ ହାତଗଣ୍ଠି ପଡ଼ିଥାଆନ୍ତା, ହେଲେ ଠିକ୍ ସେତିକି ବେଳେ ମାଡ଼ି ବସିଲା ପୋଲିସ । ଅଧାରେ ରହିଗଲା ବାହାଘର ।

ରାଜଧାନୀ ଉପକଣ୍ଠ ପାହାଳ ଥାନା ଧାମୀଲୋ ଗାଁରେ ଏଭଳି ଏକ ବାଲ୍ୟ ବିବାହକୁ ଭଣ୍ଡୁର କରିଛି ପୋଲିସ ଓ ରୁଚିକା ସମାଜ ମଙ୍ଗଳ ସଂଗଠନ । ବାହା ହେବାକୁ ବେଙ୍ଗାଲୁରୁରୁ ଆସିଥିବା ବର ଏବେ ପୋଲିସ ହେପାଜତରେ ।

ଏଥିସହ ପଢ଼ନ୍ତୁ: ଦୁଇ ପ୍ରାପ୍ତବୟସ୍କଙ୍କ ମଧ୍ୟରେ ସହମତିରେ ସମ୍ପର୍କ ଦୁଷ୍କର୍ମ ନୁହେଁ,ଓଡ଼ିଶା ହାଇକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ 

ପାହାଳ ଥାନା ଧାମୀଲୋ ଗାଁରେ ଚାଲିଥିଲା ବାହାଘର ପ୍ରସ୍ତୁତି । ବେଦୀ ସଜା ହୋଇଥିଲା, ଭୋଜିଭାତ ବି ସରିଥିଲା । ଆଉ କିଛି ସମୟ ପରେ ହାତଗଣ୍ଠି ପଡ଼ିଥାଆନ୍ତା । କିନ୍ତୁ ହଠାତ୍ ସେଠାରେ ପହଞ୍ଚିଲା ପୋଲିସ ଓ ରୁଚିକା ସମାଜ ମଙ୍ଗଳ ସଂଗଠନର ଟିମ୍ । ଆଉ ଚଢ଼ାଉ କରି ଅଧାରେ ଅଟକାଇ ଦେଇଥିଲେ ବାହାଘର ।

କାରଣ କନ୍ୟା ଜଣକ ଥିଲେ ନାବାଳିକା । ତାଙ୍କୁ ମାତ୍ର ୧୭ ବର୍ଷ ହୋଇଥିବା ବେଳେ ବରର ବୟସ ଥିଲା ୨୬ ବର୍ଷ । ବିବାହ ପାଇଁ ବେଙ୍ଗାଲୁରୁରୁ ଭୁବନେଶ୍ବର ଆସିଥିବା ବରକୁ ଉଠାଇ ଆଣିଛି ପୋଲିସ । ଏବେ ଥାନାରେ ଉଭୟ ପରିବାରକୁ ପଚରାଉଚରା କରାଯାଉଥିବା ବେଳେ ନାବାଳିକାକୁ CWC ବା ଚାଇଲ୍ଡ ଲାଇନ୍‌ରେ ହାଜର କରାଯାଇଛି ।

ଇନଷ୍ଟାଗ୍ରାମରେ ପ୍ରେମରୁ ବାଲ୍ୟ ବିବାହ

ତେବେ ଏହି ବାହାଘର ପଛର କାହାଣୀ ଥିଲା ସମ୍ପୂର୍ଣ୍ଣ ଭିନ୍ନ । ଗତ ୩ ବର୍ଷ ହେବ ଇନଷ୍ଟାଗ୍ରାମ ଜରିଆରେ ବେଙ୍ଗାଳୁରୁର ଜୟକୁମାରଙ୍କ ସହ ଏହି ନାବାଳିକାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା । କନ୍ୟା ଜଣକ ନାବାଳିକା ବୋଲି ଜାଣି ସୁଦ୍ଧା ଜୟ କୁମାର ଓ ତାଙ୍କ ପରିବାର ଲୋକେ ଏହି ବିବାହ ପାଇଁ ଆଗେଇ ଆସିଥିଲେ ।

ସେଥିପାଇଁ ଗୁରୁବାର ଦିନ ଜୟ କୁମାରଙ୍କ ପରିବାର ବେଙ୍ଗାଲୁରୁରୁ ଆସି ଭୁବନେଶ୍ବରରେ ପହଂଚିଥିଲେ । ଆଉ ଶୁକ୍ରବାର ଧାମିଲୋ ଗାଁରେ ବିବାହ ଚାଲିଥିବା ବେଳେ ଏହାକୁ ବନ୍ଦ କରିଛି ପୋଲିସ ।

ଏଥିସହ ପଢ଼ନ୍ତୁ: ଶୋଇଥିବା ବେଳେ କାଟିଦେଲେ ଜଣଙ୍କ ପରେ ଜଣଙ୍କ ତଣ୍ଟି, ପୁଣି ଲଗାଇଦେଲେ ନିଆଁ 

ସରକାର ଓ ପ୍ରଶାସନ ପକ୍ଷରୁ ଅନେକ ସଚେତନତା ସତ୍ତ୍ବେ ବି ଦେଶରେ ବାଲ୍ୟ ବିବାହରେ ରୋକ୍ ଲାଗିପାରୁନି । ପରିସଂଖ୍ୟାନ ଅନୁଯାୟୀ, ବାଲ୍ୟ ବିବାହ ମାମଲାରେ ପଶ୍ଚିମବଙ୍ଗ ସାରା ଦେଶରେ ସବୁଠୁ ଆଗରେ ଥିବା ବେଳେ, ଓଡ଼ିଶା ଏହି ତାଲିକାର ୬ ନମ୍ବର ସ୍ଥାନରେ ରହିଛି । ଆମ ରାଜ୍ୟରେ ଏବେ ବି ବାଲ୍ୟ ବିବାହର ହାର ୨.୬ ପ୍ରତିଶତ ରହିଛି, ଯାହା ପ୍ରଶାସନ ପାଇଁ ଏକ ବଡ଼ ଚିନ୍ତାର ବିଷୟ ।