କଟକ: ଜଣେ ଦିବ୍ୟାଙ୍ଗଙ୍କୁ ୯୫ ଲକ୍ଷ ଟଙ୍କାର ଚୂନ ଲଗାଇଛନ୍ତି ଜଣେ IAS ଅଫିସର । ଜମି ଦେବା ନାଁରେ ପଇସା ନେଇ ବିଶ୍ୱାସଘାତକତା କରିବା ସହ ଓଲଟା ଧମକ ଦେବା ଭଳି ସାଙ୍ଘାତିକ ଅଭିଯୋଗ ଆସିଛି ଗୃହ ବିଭାଗର ଅତିରିକ୍ତ ସଚିବ ଆରାଧନା ଦାସଙ୍କ ବିରୋଧରେ । କଟକ ସିଡିଏ ଫେଜ୍-୨ ଥାନାରେ ମାମଲା ରୁଜୁ ହେବା ପରେ ଏବେ ଅଡୁଆରେ ଆଇଏଏସ୍ ମ୍ୟାଡାମ ।

ପଇସା ନେଲେ, କିନ୍ତୁ ଜମିର ମାଲିକାନା ଦେଲେନି । ଆଉ ପଇସା ମାଗିବାରୁ ଦିବ୍ୟାଙ୍ଗଙ୍କୁ ନାଲି ଆଖି ଦେଖାଇଲେ IAS ମ୍ୟାଡମ । କଟକ ସିଡିଏ ସେକ୍ଟର-୬ର ବାସିନ୍ଦା କମଲ କୁମାର ଭାଉସୀଙ୍କା । ମାଲଗୋଦାମରେ ଏକ ଛୋଟ ଗୋଦାମ ଚଳାଇ ପରିବାର ପ୍ରତିପୋଷଣ କରନ୍ତି, ସେ ଏବେ ନ୍ୟାୟ ପାଇଁ ଥାନାର ଦ୍ୱାରସ୍ଥ ହୋଇଛନ୍ତି ।

ଏଥିସହ ପଢ଼ନ୍ତୁ: ଛଦ୍ମବେଶୀ ଯୁବତୀର ହନିଟ୍ରାପରେ ଫଶି ଆତଙ୍କ ଦୁନିଆରେ ପାଦ ଥାପିଥିଲା ଇମ୍ରାନ !

ଅଭିଯୋଗ ଅନୁଯାୟୀ, ଗୃହ ବିଭାଗର ଅତିରିକ୍ତ ସଚିବ ଆରାଧନା ଦାସଙ୍କ ସିଡିଏ ସେକ୍ଟର-୧୦ରେ ଥିବା ୨୪୦୦ ବର୍ଗଫୁଟର ଏକ ଜମି କିଣିବା ପାଇଁ ୨୦୨୨ରେ ୯୫ ଲକ୍ଷ ଟଙ୍କାରେ ଡିଲ୍ ହୋଇଥିଲା । କମଲ ନିଜ ପତ୍ନୀଙ୍କ ଆକାଉଣ୍ଟରୁ RTGS ମାଧ୍ୟମରେ ପ୍ରାୟ ୮୫ ଲକ୍ଷ ଟଙ୍କା ଏବଂ ନଗଦ ୧୦ ଲକ୍ଷ ଟଙ୍କା ମୋଟ ୯୫ ଲକ୍ଷ ଟଙ୍କା IAS ମ୍ୟାଡାମ ଅନୁରାଧା ଦାସଙ୍କୁ ଦେଇଥିଲେ । କିନ୍ତୁ ବର୍ଷ ବର୍ଷ ବିତିବା ପରେ ମଧ୍ୟ ମ୍ୟାଡାମ ଜମି କାଗଜପତ୍ର ଦେଲେନାହିଁ କି ପଇସା ଫେରସ୍ତ କଲେ ନାହିଁ ।

ଜମି ବଦଳରେ ଧମକ ମିଳିବାରୁ ଶେଷରେ ପୋଲିସର ଶରଣାପନ୍ନ ହୋଇଥିଲେ କମଲ । ୨୦୨୬ ଜାନୁଆରୀ ୨୦ ତାରିଖରେ ସିଡିଏ ଫେଜ୍-୨ ଥାନା ପୋଲିସ IAS ଆରାଧନା ଦାସଙ୍କ ବିରୋଧରେ ବିଏନଏସର ବିଭିନ୍ନ ଧାରାରେ ମାମଲା ରୁଜୁ କରିଛି । ଠକେଇ (୩୧୮-୪), ବିଶ୍ୱାସଘାତକତା (୩୧୬-୨), ଧମକଚମକ (୩୫୧-୨) ଏବଂ ଗାଳିଗୁଲଜ (୨୯୬-ବି) ଭଳି ସଙ୍ଗୀନ ଦଫା ଲଗାଇଛି ପୋଲିସ ।

ଏଥିସହ ପଢ଼ନ୍ତୁ: ବିଭିନ୍ନ ଥାନାରେ ୩୨୪ଟି ସିସିଟିଭି କ୍ୟାମେରା ଅଚଳ, ତୁରନ୍ତ ସଜାଡ଼ିବାକୁ ନିର୍ଦ୍ଦେଶ

ସମ୍ପୃକ୍ତ IAS ଅଧିକାରୀ ଆରାଧନା ଦାସ ଏବେ ରାଜ୍ୟ ଗୃହ ବିଭାଗର ଅତିରିକ୍ତ ସଚିବ ଭାବେ କାର୍ଯ୍ୟ କରୁଛନ୍ତି । ତେବେ IAS ମ୍ୟାଡାମ ତଦନ୍ତରେ ସହଯୋଗ କରୁନଥିବାରୁ କମିଶନରେଟ୍ ପୋଲିସ ପକ୍ଷରୁ ଗୃହ ବିଭାଗକୁ ଅବଗତ କରାଯାଇଛି । ତଦନ୍ତ ପରେ ମ୍ୟାଡମଙ୍କ ନାମରେ ଚାର୍ଜସିଟ୍ ଦାଖଲ ହେବ ଏବଂ ଆବଶ୍ୟକ ପଡ଼ିଲେ ଗିରଫଦାରୀ ମଧ୍ୟ ହୋଇପାରେ ବୋଲି ଆଇନଜୀବୀ କହିଛନ୍ତି ।

ପୋଲିସ ଏହି ହାଇପ୍ରୋଫାଇଲ୍ ମାମଲାର ତଦନ୍ତ ଜାରି ରଖିଥିବା ବେଳେ ଜଣେ ବରିଷ୍ଠ ପ୍ରଶାସନିକ ଅଧିକାରୀଙ୍କ ଏଭଳି କାର୍ଯ୍ୟକଳାପ ଏବେ ଚର୍ଚ୍ଚାର ବିଷୟ ପାଲଟିଛି । ଆଗାମୀ ଦିନରେ ଏହି ଘଟଣା କି ରୂପ ନେଉଛି, ତାହା ଦେଖିବାକୁ ବାକି ରହିଲା ।