ଗାନ୍ଧୀନଗର: ଗୁଜରାଟ ଆତଙ୍କବାଦ ନିରୋଧୀ ଦଳ (ATS) ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦ (JeM)ର ୮ ଜଣ ସନ୍ଦିଗ୍ଧ ସଦସ୍ୟଙ୍କୁ ଗିରଫ କରିଛି । ଗିରଫ ସନ୍ଦିଗ୍ଧଙ୍କ ମଧ୍ୟରୁ ୨ଜଣଙ୍କ ବୟସ ମାତ୍ର ୧୮ ଏବଂ ୧୯ ବର୍ଷ । ସେମାନେ ଗୁଜରାଟରେ ଏକ ସକ୍ରିୟ ଆତଙ୍କବାଦୀ ନେଟୱାର୍କ ତିଆରି କରିବାକୁ ଚେଷ୍ଟା କରୁଥିଲେ ବୋଲି ତଦନ୍ତ ଏଜେନ୍ସିଗୁଡ଼ିକ ଦାବି କରୁଛନ୍ତି । ରାଜ୍ୟରେ ଆତଙ୍କବାଦୀ କାର୍ଯ୍ୟକଳାପ ବିରୁଦ୍ଧରେ ଏହି କାର୍ଯ୍ୟାନୁଷ୍ଠାନକୁ ଏକ ବଡ଼ ସଫଳତା ବୋଲି ବିବେଚନା କରାଯାଉଛି ।

ଗୁଜରାଟ ATS ଗୁରୁବାର ରାଜ୍ୟର ବିଭିନ୍ନ ଜିଲ୍ଲା ଏବଂ ପଡ଼ୋଶୀ ମଧ୍ୟପ୍ରଦେଶରେ ଏକକାଳୀନ ଚଢାଉ କରି ଏହି ୮ ଜଣଙ୍କୁ ଗିରଫ କରିଛି । ଅଧିକାରୀଙ୍କ ଅନୁଯାୟୀ ସେମାନେ ସମସ୍ତେ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦର ସଦସ୍ୟ ଥିଲେ ଏବଂ ସଂଗଠନର ନିର୍ଦ୍ଦେଶରେ ଗୁଜରାଟରେ ସେମାନଙ୍କର ନେଟୱାର୍କକୁ ମଜଭୁତ କରିବାକୁ ଚେଷ୍ଟା କରୁଥିଲେ । ଗିରଫ ସନ୍ଦିଗ୍ଧଙ୍କୁ ପଚରାଉଚରା କରାଯାଉଛି ।

• କେବଳ ୭ଜଣ ଗୁଜରାଟରେ ଥିଲେ

ATS ଅଧିକାରୀମାନେ କହିଛନ୍ତି ଯେ ଗିରଫ ହୋଇଥିବା ୮ ଜଣ ଅଭିଯୁକ୍ତଙ୍କ ମଧ୍ୟରୁ ୭ ଜଣଙ୍କୁ ଗୁଜରାଟର ବିଭିନ୍ନ ଜିଲ୍ଲାରୁ ଗିରଫ କରାଯାଇଥିବା ବେଳେ ଜଣେ ମଧ୍ୟପ୍ରଦେଶରୁ ଗିରଫ ହୋଇଛି । ଗିରଫ ଅଭିଯୁକ୍ତମାନଙ୍କ ମଧ୍ୟରେ ୧୯ ବର୍ଷୀୟ ଅହମ୍ମଦ ଅବଦୁଲ୍ଲା ଗାଜିୱାଲା, ୨୨ ବର୍ଷୀୟ ମୁଦାସିର ଅବଦୁଲ୍ଲା ଗାଜିୱାଲା ଏବଂ ୩୦ ବର୍ଷୀୟ ଇବ୍ରାହିମ ମହମ୍ମଦ ହୁସେନ ଘାଘା ସମସ୍ତେ ବନାସକାଣ୍ଠା ଜିଲ୍ଲାର ବାସିନ୍ଦା । ତଦନ୍ତକାରୀ ସଂସ୍ଥା ଅନୁଯାୟୀ, ଏହି ୩ ଜଣଙ୍କ କାର୍ଯ୍ୟକଳାପ ଉପରେ କିଛି ସମୟ ଧରି ନଜର ରଖାଯାଇଥିଲା ଏବଂ ସେମାନଙ୍କ ମାଧ୍ୟମରେ ସଂଗଠନର ଅନ୍ୟ ସଦସ୍ୟଙ୍କ ପାଖରେ ପହଞ୍ଚିବାକୁ ଚେଷ୍ଟା କରାଯାଉଛି ।

ପଢନ୍ତୁ ଏହି ଖବର: ଟାର୍ଗେଟରେ ଥିଲା ଥାନା, ମନ୍ଦିର; ପାକିସ୍ତାନ ପଠାଉଥିଲେ ଭିଡିଓ; ୪ ISI ଆତଙ୍କୀ ଗିରଫ

ଏଥିସହ ୨୧ ବର୍ଷୀୟ ଜାକରିଆ ଡୁରାନି ମହମ୍ମଦ ଅମ୍ମାର ଘାଗା, ୪୦ ବର୍ଷୀୟ ମୁଫତି ଫୈଜାନ ଇସମାଇଲ ଦୌବା ଏବଂ ୨୧ ବର୍ଷୀୟ ମହମ୍ମଦ ଅମିନ ଶେରାଙ୍କୁ ମଧ୍ୟ ପାଟନ ଜିଲ୍ଲାର ଗିରଫ କରାଯାଇଛି । ଏଟିଏସ୍ ମଧ୍ୟ ନାଭସାରୀ ଜିଲ୍ଲାର ୨୨ ବର୍ଷୀୟ ମହମ୍ମଦ ଅବଦୁଲ ରହମାନ ସାବାଡି ଏବଂ ମଧ୍ୟପ୍ରଦେଶର ୧୮ ବର୍ଷୀୟ ବିଲାଲ ଦୁରାନୀ ମହମ୍ମଦ ଅମର ଗାଗାଙ୍କୁ ଗିରଫ କରିଛି । ଗୁଜରାଟ ATS ସମସ୍ତ ଅଭିଯୁକ୍ତଙ୍କ ବିରୁଦ୍ଧରେ ବେଆଇନ କାର୍ଯ୍ୟକଳାପ (ନିବାରଣ) ଆଇନ (UAPAର ଅନେକ ଗମ୍ଭୀର ଧାରା ଅନୁଯାୟୀ ମାମଲା ରୁଜୁ କରିଛି । ଏଥିରେ ଧାରା ୧୩ (ବେଆଇନଗତ କାର୍ଯ୍ୟକଳାପ), ୧୭ (ଆତଙ୍କବାଦୀ କାର୍ଯ୍ୟକଳାପ ପାଇଁ ପାଣ୍ଠି ସଂଗ୍ରହ), ୧୮ (ଆତଙ୍କବାଦୀ ଷଡଯନ୍ତ୍ର), ୩୮ (ଆତଙ୍କବାଦୀ ସଂଗଠନର ସଦସ୍ୟତା) ଏବଂ ୩୯ (ଆତଙ୍କବାଦୀ ସଂଗଠନକୁ ସମର୍ଥନ ଯୋଗାଇବା) ସାମିଲ ।

• ଲାଗିଲା ସଙ୍ଗୀନ ଦଫା

ଏହା ସହିତ ଗିରଫ ଆତଙ୍କବାଦୀଙ୍କ ବିରୋଧରେ ଭାରତୀୟ ଦଣ୍ଡ ସଂହିତା (IPC)ର ଧାରା ୧୪୮ ଏବଂ ୬୧ ଅନୁଯାୟୀ ଅଭିଯୁକ୍ତ କରାଯାଇଛି । ଏହି ଧାରାଗୁଡ଼ିକ ଗୁରୁତର ଅପରାଧିକ ଷଡ଼ଯନ୍ତ୍ର ଏବଂ ରାଜ୍ୟ ବିରୁଦ୍ଧରେ ଅପରାଧ କରିବାକୁ ଯୋଜନା ସହିତ ଜଡ଼ିତ । ଧରାପଡ଼ିଥିବା ଅଭିଯୁକ୍ତଙ୍କ ଦେଶ ଭିତରେ ଏବଂ ବିଦେଶରେ ଥିବା ବ୍ୟକ୍ତିବିଶେଷଙ୍କ ସହିତ କଣ ସମ୍ପର୍କ ଅଛି ସେନେଇ ଯାଞ୍ଚ ହେଉଛି । ସୁରକ୍ଷା ଏଜେନ୍ସିଗୁଡ଼ିକ ସେମାନଙ୍କର ଡିଜିଟାଲ୍ ଡିଭାଇସ୍, ଆର୍ଥିକ କାରବାର ଏବଂ ଯୋଗାଯୋଗ ଯାଞ୍ଚ କରୁଛନ୍ତି । ଆଗାମୀ ଦିନରେ ଏହି ମାମଲାରେ ଆହୁରି ଗିରଫଦାରୀ କିମ୍ବା ବଡ଼ ଖୁଲାସା ହୋଇପାରେ ।