Fake IAS Officer / ନକଲି IAS ତୃପ୍ତି ସିଂ ଠକେଇର ଲମ୍ବା ତାଲିକା; ୪୯ ଲକ୍ଷ ମାମଲାରେ ବଢ଼ିଲା ଅଡୁଆ

ଭୋପାଳ: ବଢ଼ିବାରେ ଲାଗିଛି ନକଲି ଆଇଏଏସ ଅଫିସର ତୃପ୍ତି ସିଂଙ୍କ ସମସ୍ୟା । ନିଜକୁ ଜଣେ IAS ଅଧିକାରୀ ଏବଂ ମଧ୍ୟପ୍ରଦେଶ ପର୍ଯ୍ୟଟନ ବିକାଶ ନିଗମର ଅତିରିକ୍ତ ନିର୍ଦ୍ଦେଶକ ବୋଲି କହି ଲୋକଙ୍କୁ ଠକି ଚାଲିଥିଲେ । ବାଗସେୱାନିଆ ପୋଲିସ ଷ୍ଟେସନ ତାଙ୍କ ବିରୋଧରେ ଆଉ ଏକ ଠକେଇ ମାମଲା ରୁଜୁ କରିଛି । ଏହା ସହିତ ନକଲି ଆଇଏଏସ ତୃପ୍ତି ଏବଂ ତାଙ୍କ ସହଯୋଗୀଙ୍କ ବିରୁଦ୍ଧରେ ଏପର୍ଯ୍ୟନ୍ତ ୪ଟି ଏଫଆଇଆର ରୁଜୁ ହୋଇଛି ।

ତେବେ ସଦ୍ୟତମ ମାମଲାରେ, ତାଙ୍କ ବିରୋଧରେ ମଧ୍ୟପ୍ରଦେଶ ପର୍ଯ୍ୟଟନ ବିକାଶ ନିଗରମ ହୋଟେଲ ଏବଂ ରିସର୍ଟ ଭଡ଼ା ଦେବାର ପ୍ରତିଶ୍ରୁତି ଦେଇ ପ୍ରାୟ ୫୦ ଲକ୍ଷ ଟଙ୍କା ଠକେଇ କରିବାର ଅଭିଯୋଗ ହୋଇଛି । ଏହାସହିତ ନକଲି ଆଇଏଏସ ତୃପ୍ତି ସିଂଙ୍କ ଅପରାଧର ପେଡି ଖୋଲିବାରେ ଲାଗିଛି । ସେ ଆଉ କାହାକୁ ଚୂନ ମାରିଛନ୍ତି କି ନାହିଁ ସେ ନେଇ ପୋଲିସ ତଦନ୍ତ କରୁଛି ।

• କଣ ପୂରା ଘଟଣା ?

ପୋଲିସ ଅନୁଯାୟୀ, ବାଲାଘାଟର ମୂଳ ବାସିନ୍ଦା ଗଗନ ଅଗଷ୍ଟ ୨୦୨୫ରେ ଭୋପାଳର ଜଣେ ସମ୍ପର୍କୀୟ ରୋହିତଙ୍କ ମାଧ୍ୟମରେ ତୃପ୍ତି ସିଂ ଓ ତାଙ୍କ ଭାଇ ସୁଧାଂଶୁ ସିଂଙ୍କୁ ଭେଟିଥିଲେ । ନିଜକୁ ଜଣେ ଆଇଏଏସ୍ ଅଫିସର ପରିଚୟ ଦେଇ ତୃପ୍ତି ଦାବି କରିଥିଲେ ଯେ ସେ ନିଜର କ୍ଷମତାର ବ୍ୟବହାର କରି ରାଜ୍ୟ ପର୍ଯ୍ୟଟନ ବିଭାଗର ହୋଟେଲ ଏବଂ ରିସର୍ଟକୁ କମ ମୂଲ୍ୟରେ ଲିଜରେ ଦେଇପାରିବେ । ସେ ପଚମଢ଼ିର ହୋଟେଲ ହାଇଲ୍ୟାଣ୍ଡ, ବେଟା ବାୱାରଚି, ତାୱା ରିସର୍ଟ, ମିଡୱେ ଟ୍ରିଟ୍ ସମାନପୁର ଏବଂ ରତାପାଣି ଜଙ୍ଗଲ ଲଜ୍ ପାଇଁ ₹୫୦ ଲକ୍ଷରେ ଲିଜ୍ କରାଇଦେବାକୁ ପ୍ରତିଶ୍ରୁତି ଦେଇଥିଲେ ।

• ସରକାରୀ ଗାଡ଼ି ଦେଖାଇ ବିଶ୍ୱାସ ଜିତିଲେ

ଠକେଇର ଶିକାର ହୋଇଥିବା ଗଗନଙ୍କ କହିବା ଅନୁଯାୟୀ, ତୃପ୍ତି ତାଙ୍କ ଭାଇ ସୁଧାଂଶୁଙ୍କ ସହିତ ରହୁଥିଲେ, ଯିଏ ନିଜକୁ ଜଣେ ରେଜିଷ୍ଟ୍ରାର ବୋଲି ଦାବି କରୁଥିଲେ । ଆଉ ଜଣେ ବ୍ୟକ୍ତି ପ୍ରଖର ସିଂହ ମଧ୍ୟ ସେମାନଙ୍କ ସହିତ ରହୁଥିଲେ ଏବଂ ତୃପ୍ତିଙ୍କ ସହଯୋଗୀ ଭଳି ବ୍ୟବହାର କରୁଥିଲା । ତୃପ୍ତିଙ୍କ ସରକାରୀ କାର ଦେଖି ଗଗନ ନିଶ୍ଚିତ ହୋଇଗଲେ ଯେ ସେ ବାସ୍ତବରେ ଜଣେ IAS ଅଧିକାରୀ ।

• ୯ଟି କିସ୍ତିରେ ନେଇଥିଲେ ୫୦ ଲକ୍ଷ ଟଙ୍କା

ପୀଡିତ ବ୍ୟକ୍ତି ପୋଲିସକୁ କହିଛନ୍ତି ଯେ ସେ ଗତବର୍ଷ ୨୦୨୫ ଡିସେମ୍ବର ୧୪ ଏବଂ ଚଳିତ ବର୍ଷ ୨୦୨୬ ଏପ୍ରିଲ ୧୧ ମଧ୍ୟରେ ୯ଟି କିସ୍ତିରେ ପ୍ରାୟ ୫୦ ଲକ୍ଷ ଟଙ୍କା ଦିଆଯାଇଛି । ପ୍ରାୟ ୪.୫ ଲକ୍ଷ ଟଙ୍କା ନଗଦ ଥିଲା, ଯେତେବେଳେ ବାକି ଟଙ୍କା ଅନଲାଇନ୍ ମାଧ୍ୟମରେ ବ୍ୟାଙ୍କ ଆକାଉଣ୍ଟକୁ ସ୍ଥାନାନ୍ତର କରାଯାଇଥିଲା । ଅଭିଯୋଗ ହୋଇଛି ଯେ ତୃପ୍ତି ବାୟୋମେଟ୍ରିକ୍ ଏବଂ ଦସ୍ତଖତ ଯାଞ୍ଚ ନାଁରେ ଅତିରିକ୍ତ ଟଙ୍କା ମଧ୍ୟ ନେଇଥିଲେ ଏବଂ ଫାଇଲ ପ୍ରକ୍ରିୟାକରଣକୁ ତ୍ୱରାନ୍ୱିତ କରିଥିବା କହିଥିଲେ ।

• କେମିତି ଧରାପଡ଼ିଲା ନକଲି IAS ଅଫିସର ?

ଦୀର୍ଘ ସମୟ ଧରି ପଟ୍ଟା ନପାଇବା ପରେ ଗଗନ ତୃପ୍ତିଙ୍କ ସତ ଧରିବାକୁ ପ୍ରୟାସ ଆରମ୍ଭ କଲେ । ତାଙ୍କ ପ୍ରକୃତ ପରିଚୟ ଜାଣିବା ପରେ ସେ ତାଙ୍କ ଟଙ୍କା ଫେରସ୍ତ ପାଇଁ ଦାବି କଲେ । ଯେତେବେଳେ ସେ ପୋଲିସରେ ଅଭିଯୋଗ କରିବାକୁ ଧମକ ଦେଲେ, ତୃପ୍ତି ଅନଲାଇନରେ କେବଳ ୯୦,୦୦୦ ଟଙ୍କା ଫେରେଇ ଦେଇଥିଲେ । ବାକି ଟଙ୍କା ଦାବି କରିବାରୁ ତୃପ୍ତି ଧମକ ଦେଇ କହିଥିଲେ ଯେ ନଗଦ ଟଙ୍କା ଦେବାର କୌଣସି ପ୍ରମାଣ ନଥିବାରୁ ସେ ପୋଲିସ ନିକଟରେ ଅଭିଯୋଗ କଲେ ମଧ୍ୟ ତାଙ୍କ ଟଙ୍କା ଫେରସ୍ତ ଦିଆଯିବନାହିଁ ।

ପଢନ୍ତୁ ଏହି ଖବର: ପର୍ଣ୍ଣ ଦେଖୁଥିଲେ ସାବଧାନ ! ଡାଟା ଚୋରି କରୁଛନ୍ତି ସାଇବର ଠକ, ଜାରି ହେଲା ୭ଟି ଠକ ଆପ୍‌

• ତୃପ୍ତି ସିଂ ବିରୋଧରେ ଏକାଧିକ ମାମଲା

ଚାକିରି ଦେବା ବାହାନାରେ ପ୍ରାୟ ୧୦ ଲକ୍ଷ ଟଙ୍କା ଠକେଇ କରିଥିବା ଅଭିଯୋଗରେ ଅଶୋକନଗରର ଚନ୍ଦେରୀରେ ତୃପ୍ତିଙ୍କ ବିରୋଧରେ ପ୍ରଥମ ମାମଲା ରୁଜୁ ହୋଇଥିଲା । ଏହା ପରେ ଆଉ ଏକ ମାମଲା ସାମ୍ନାକୁ ଆସିଥିଲା । ଅଗଷ୍ଟ ୨୩ ତାରିଖରେ ଚନ୍ଦେରୀ ପୋଲିସ ତୃପ୍ତି ଏବଂ ତା; ଭାଇ ସୁଧାଂଶୁ ସିଂକୁ ଗିରଫ କରିଥିଲା । ଅଶୋକନଗର ପୋଲିସ ପ୍ରଖର ସିଂହଙ୍କୁ ମଧ୍ୟ ଗିରଫ କରିଛି । ତେବେ ତୃପ୍ତି ସିଂ ଏବଂ ତାର ସହଯୋଗୀମାନଙ୍କୁ ଗୁରୁବାର ଅଶୋକନଗର ଜେଲରୁ ଭୋପାଳ ଅଣାଯିବ । ସେଠାରେ ସେମାନଙ୍କୁ ସେମାନଙ୍କ ଗ୍ୟାଙ୍ଗ ସମ୍ପର୍କରେ ପୁଙ୍ଖାନୁପୁଙ୍ଖ ପଚରାଉଚରା କରାଯିବ ବୋଲି ଭୋପାଳ ବାଗସେୱାନିଆ ଷ୍ଟେସନ ହାଉସ୍ ଅଫିସର ଅମିତ ସୋନି ସୂଚନା ଦେଇଛନ୍ତି ।