Porn App Trap / ପର୍ଣ୍ଣ ଦେଖୁଥିଲେ ସାବଧାନ ! ଡାଟା ଚୋରି କରୁଛନ୍ତି ସାଇବର ଠକ, ଜାରି ହେଲା ୭ଟି ଠକ ଆପ୍‌

ନୂଆଦିଲ୍ଲୀ: ସୋସିଆଲ ମିଡିଆରେ ବିଜ୍ଞାପନ ଜରିଆରେ ଲୋକଙ୍କୁ ଠକିବାର ଏକ ନୂଆ ତରିକା ସାମ୍ନାକୁ ଆସିଛି । ଗୃହ ମନ୍ତ୍ରାଳୟର ସାଇବର ୱିଙ୍ଗ୍ 'ନ୍ୟାସନାଲ ସାଇବରକ୍ରାଇମ୍ ଥ୍ରେଟ୍ ଆନାଲିଟିକ୍ସ ୟୁନିଟ୍' (NCTAU) ଏକ ଆଡଭାଇଜରି ଜାରି କରିଛି । ତଦନ୍ତକାରୀ ସଂସ୍ଥା ଜାଣିବାକୁ ପାଇଛି ଯେ, ଠକମାନେ ଫେସ୍‌ବୁକ୍ ଏବଂ ଇନ୍‌ଷ୍ଟାଗ୍ରାମ୍‌ରେ ପର୍ଣ୍ଣ ଆପ୍‌ଗୁଡ଼ିକର ବିଜ୍ଞାପନ ଚଳାଇ ଲୋକଙ୍କ ବ୍ୟାଙ୍କ ଖାତା ଖାଲି କରୁଛନ୍ତି । ସ୍ମାର୍ଟଫୋନ୍ ବ୍ୟବହାରକାରୀଙ୍କୁ ଟାର୍ଗେଟ କରୁଥିବା ଏହି ଠକେଇକୁ ନେଇ ସରକାର ସତର୍କ ରହିବାକୁ କହିଛନ୍ତି ।

ଗୃହ ମନ୍ତ୍ରାଳୟର ଏହି ୱିଙ୍ଗ୍ କିଛି ସନ୍ଦିଗ୍ଧ ଆପ୍‌ର ନାଁ ପ୍ରକାଶ କରିଛି, ଯାହା ଏବେ ସୋସିଆଲ ମିଡିଆରେ ସବୁଠାରୁ ଅଧିକ ସକ୍ରିୟ ଅଛନ୍ତି । ସରକାର ମୁଖ୍ୟତଃ ଏହିସବୁ ନାଁ ଏବଂ ଏଗୁଡ଼ିକର ଅନ୍ୟାନ୍ୟ ଭାରିଏଣ୍ଟ୍‌ଠାରୁ ସତର୍କ ରହିବାକୁ ପରାମର୍ଶ ଦେଇଛନ୍ତି । ସାଇବର ଠକେଇର ମାଧ୍ୟମ ସାଜିଥିବା ଏହି ପର୍ଣ୍ଣ ଆପ୍ ଗୁଡ଼ିକ ହେଉଛି NIGHT PLAY, RELOOP, KYSS, VIMO, VIXA, NEXO ଏବଂ RIVO ।

• ପର୍ଣ୍ଣୋଗ୍ରାଫିକ୍ କଣ୍ଟେଣ୍ଟ ଦେଖାଇ ଠକେଇ

NCTAU ରିପୋର୍ଟ ଅନୁଯାୟୀ, ସାଇବର ଅପରାଧୀମାନେ ଫେସ୍‌ବୁକ୍ ଏବଂ ଇନଷ୍ଟାଗ୍ରାମ୍ ଭଳି ଲୋକପ୍ରିୟ ସୋସିଆଲ ମିଡିଆ ପ୍ଲାଟଫର୍ମର ସାହାଯ୍ୟ ନେଉଛନ୍ତି । ଏଠାରେ ସେମାନେ ଅଡଲ୍ଟ ବା ପର୍ଣ୍ଣୋଗ୍ରାଫିକ୍ କଣ୍ଟେଣ୍ଟର ପ୍ରଲୋଭନ ଦେଖାଉଥିବା ବିଜ୍ଞାପନ ଚଲାଉଛନ୍ତି । ଯେତେବେଳେ ୟୁଜର୍ ଏହି ବିଜ୍ଞାପନଗୁଡ଼ିକ ଉପରେ କ୍ଲିକ୍ କରନ୍ତି, ସେତେବେଳେ ତାଙ୍କୁ ଏକ ବାହ୍ୟ ୱେବସାଇଟ୍‌କୁ ନିଆଯାଏ । ଏହି ୱେବସାଇଟ୍‌କୁ ଗଲା ପରେ ୟୁଜର୍‌ଙ୍କ ସାମ୍ନାରେ ଏକ ପପ୍-ଅପ୍ ଆସେ, ଯେଉଁଥିରେ ତାଙ୍କୁ ଏକ APK ଫାଇଲ୍ ଅର୍ଥାତ୍ ଆପ୍ ଡାଉନଲୋଡ୍ କରିବା ପାଇଁ ବାଧ୍ୟ କରାଯାଇଥାଏ ।

• ଏମିତି ଡାଟା ଚୋରି କରନ୍ତି ଠକ

ଫୋନରେ ଆପ୍ ଚାଲୁ କରିବାର ତରବରିଆରେ ଲୋକମାନେ ପ୍ରାୟତଃ ବିନା ଭାବିଚିନ୍ତି ସମସ୍ତ ପରମିସନ୍‌କୁ 'ଆଲାଓ' କରିଦିଅନ୍ତି । ଏହି ବିପଜ୍ଜନକ ଆପ୍‌ଗୁଡ଼ିକ ବିଶେଷ ଭାବରେ ଆପଣଙ୍କ ଫୋନର 'ଏକ୍ସେସିବିଲିଟି ପରମିସନ୍'ର ଭୁଲ୍ ବ୍ୟବହାର କରିଥାନ୍ତି । ଥରେ ଏହି ଅନୁମତି ମିଳିଗଲେ, ଆପ୍‌କୁ ଆପଣଙ୍କ ଫୋନର ରିମୋଟ୍ କଣ୍ଟ୍ରୋଲ୍ ମିଳିଯାଏ । ଏହାପରେ ଏହା ବ୍ୟାକଗ୍ରାଉଣ୍ଡରେ ଆପଣଙ୍କ ଇଚ୍ଛା ବିନା ଅନ୍ୟ ଭାଇରସ୍ ଯୁକ୍ତ ଆପ୍ ଡାଉନଲୋଡ୍ କରିନିଏ ଏବଂ ଆପଣଙ୍କ ସମ୍ପୂର୍ଣ୍ଣ ସ୍ମାର୍ଟଫୋନ୍‌କୁ ସମ୍ପୂର୍ଣ୍ଣ ଭାବରେ ନିଜ କବଜାକୁ ନେଇଯାଏ ।

ପଢନ୍ତୁ ଏହି ଖବର: ଭାରତରେ ୧୪୬% ବଢୁଛି ସ୍କାମ; ୨୨,୦୦୦ କୋଟିରୁ ଅଧିକ ସାଇବର ଠକେଇ

• ଏମିତି ସିଧାସଳଖ ବ୍ୟାଙ୍କ ଖାତାକୁ ଟାର୍ଗେଟ୍

ସ୍ମାର୍ଟଫୋନ୍‌ର କଣ୍ଟ୍ରୋଲ୍ ମିଳିବା ମାତ୍ରେ ହ୍ୟାକର୍ସମାନେ ଆପଣଙ୍କ ବ୍ୟାଙ୍କିଙ୍ଗ୍ ପାସୱାର୍ଡ ଏବଂ OTP ସହଜରେ ଚୋରି କରିନିଅନ୍ତି । ଏହାପରେ ସେମାନେ ଚୁପ୍‌ଚାପ୍ ଆପଣଙ୍କ ବ୍ୟାଙ୍କ ଖାତାରୁ ପଇସା ଟ୍ରାନ୍ସଫର୍ କରିନିଅନ୍ତି । ଯେହେତୁ ଏହି ସମସ୍ତ ଖେଳ ଫୋନର ବ୍ୟାକଗ୍ରାଉଣ୍ଡରେ ଚାଲିଥାଏ, ତେଣୁ ମୋବାଇଲରେ ପଇସା କଟିବାର ମେସେଜ୍ ନ ଆସିବା ପର୍ଯ୍ୟନ୍ତ ଆପଣ କିଛି ବି ଜାଣିପାରିବେ ନାହିଁ ।