ନୂଆଦିଲ୍ଲୀ: ଟାର୍ଗେଟ୍‌ରେ ଥିଲା ସ୍କୁଲ୍ କ୍ୟାମ୍ପସ୍ । କାର୍‌ରେ ରଖିଥିଲା ଖାଲି ବନ୍ଧୁକ । ଏକାଧିକ ବନ୍ଧୁକ ସହ ଧରାପଡ଼ିଛି ପାକିସ୍ତାନୀ ଯୁବକ । ୨୫ ବର୍ଷର ପାକିସ୍ତାନୀ ଯୁବକ ଲୁକମାନ ଖାନ ବିଦ୍ୟାଳୟ କ୍ୟାମ୍ପସ୍‌ରେ ଗଣ ଗୁଳିକାଣ୍ଡ ପାଇଁ ଯୋଜନା କରିଥିଲା ।

ଲୁକମାନକୁ ପୋଲିସ ହେପାଜତକୁ ନେଇଛି । ତା' ଠାରୁ ଏକାଧିକ ବନ୍ଧୁକ ସହ ଗୁଳିଗୋଳ ଏବଂ ଗୁଳିକାଣ୍ଡ ଯୋଜନାର ଚିଠା ମିଳିଛି । ଅନେକଙ୍କୁ ହତ୍ୟା କରି ନିଜକୁ ସହିଦ ସଜାଇବାକୁ ଯୋଜନା କରିଥିଲା ଲୁକମାନ ଖାନ ।

ଆମେରିକାର ଡିପାର୍ଟମେଣ୍ଟ ଅପ୍ ଜଷ୍ଟିସ୍ (DoJ) ଅନୁସାରେ, ଲୁକମାନ ଖାନ ଡେଲାୱେୟାର ବିଶ୍ଵବିଦ୍ୟାଳୟରେ ପାଠ ପଢ଼ୁଥିଲା । ନଭେମ୍ବର ୨୪ ତାରିଖରେ ପୋଲିସ ତାକୁ ଏକ ପିକଅପ୍ ଟ୍ରକ୍ ସହ ଧରିଛି ।

ଏଥିସହ ପଢ଼ନ୍ତୁ: 'ଗୁଳି ମାରିବି... ଖଣ୍ଡ ଖଣ୍ଡ କରି ଟ୍ରେନ୍ ଲାଇନ୍‌ରେ ଫିଙ୍ଗିଦେବି'; ବିଧାୟକଙ୍କୁ ଦାଦନ ଦଲାଲଙ୍କ ଧମକ

ସର୍ଚ୍ଚ ଅପରେସନ୍ ସମୟରେ ପୋଲିସ ଟ୍ରକ୍‌ରୁ ଗୋଟିଏ ୩୫୭ କାଲିବର ଗ୍ଲକ ହ୍ୟାଣ୍ଡଗନ୍ ସହ ୨୭ ରାଉଣ୍ଡ ଗୁଳି ପାଇଛି । ଯାହାକି ଗାଡ଼ି ଭିତରେ ରହିଥିଲା । ପିକଅପ୍ ଟ୍ରକ୍ ଭିତରୁ ଆଉ ୩ଟି ରାଇଫଲ୍ ମିଳିଛି । ପୋଲିସ ଏକ ନୋଟବୁକ୍ ମଧ୍ୟ ଜବତ କରିଛି ।

ଏକ ହାତଲେଖା ନୋଟବୁକ୍ ପୋଲିସକୁ ମିଳିଛି । ଯେଉଁଥିରେ ଲୁକମାନ ପାଖେ ଥିବା ଅସ୍ତ୍ରଶସ୍ତ୍ର ସହ ବନ୍ଧୁକ ବାବଦରେ ଲେଖା ଯାଇଛି । ଜବତ ଅସ୍ତ୍ରଶସ୍ତ୍ରକୁ ଲୁକମାନ ଆକ୍ରମଣ ଲାଗି କିଭଳି ବ୍ୟବହାର କରିଥାନ୍ତା ତାହା ସେଥିରେ ବର୍ଣ୍ଣନା କରାଯାଇଛି ।

ଉକ୍ତ ନୋଟବୁକ୍‌ରେ ଲୁକମାନ ଖାନ ପଢ଼ୁଥିବା ବିଶ୍ଵବିଦ୍ୟାଳୟର ନାଁ ସହିତ ପୋଲିସ ଷ୍ଟେସନ ନାଁ ରହିଛି । ନୋଟ୍ ଭିତରେ ଏକ ବିଲ୍ଡିଂର ଲେଆଉଟ୍ ଚିତ୍ର ରହିଛି । ବିଲ୍ଡିଂର ପ୍ରବେଶ ପଥ ସହ ପ୍ରସ୍ଥାନ ପଥ ବାବଦରେ ଲେଖା ଯାଇଛି ।

ପୋଲିସ ଅନୁସାରେ, ଗଣ ଆକ୍ରମଣର ଯୋଜନାର ସବୁ କିଛି ସେହି ନୋଟବୁକ୍‌ରେ ଲେଖା ଯାଇଛି । ତେବେ ଲୁକମାନର ପୂରା ଲକ୍ଷ୍ୟ କ'ଣ ଥିଲା ? କେଉଁ ସ୍ଥାନରେ ଆକ୍ରମଣ ପାଇଁ ଯୋଜନା କରିଥିଲା ତାହା ସ୍ପଷ୍ଟ ହୋଇପାରି ନାହିଁ ।

ଏଥିସହ ପଢ଼ନ୍ତୁ: ବଞ୍ଚିଗଲେ ଅଂଶୁମାନ, ଚାଲିଗଲେ ଉଦିତ; ସାଙ୍ଗକୁ ଛଡ଼ାଇନେଲା ବିରୂପା

ସୂଚନା ଅନୁସାରେ, ପାକିସ୍ତାନରେ ଜନ୍ମିତ ଲୁକମାନ ଅନେକ ଦିନ ହେଲା ଆମେରିକାରେ ରହୁଛି । ଏପରିକି ତା'ପାଖରେ ଆମେରିକାର ନାଗରିକତ୍ଵ ରହିଛି । ଲୁକମାନକୁ ଗିରଫ ପରେ FBI ତାର ୱିଲିମିଂଟନ୍ ଘରେ ରେଡ୍ କରିଛି । ଯେଉଁଠୁ ରାଇଫଲ୍ ସହ ପିସ୍ତଲ୍ ମିଳିଛି ।

ମିଳିଥିବା ଗ୍ଲକ ପିସ୍ତଲକୁ ବେଆଇନ୍ ଭାବେ ପରିବର୍ତ୍ତନ କରାଯାଇ ସମ୍ପୂର୍ଣ୍ଣ ସ୍ଵୟଂଚାଳିତ ମେସିନ୍ ଚାଳିତ ବନ୍ଧୁକରେ ପରିଣତ କରାଯାଇଛି । ଉକ୍ତ ବନ୍ଧୁକରୁ ଗୋଟିଏ ମିନିଟ୍‌ରେ ୧୨୦୦ ରାଉଣ୍ଡ ଗୁଳି କରାଯାଇ ପାରିବ । ତେବେ ଲୁକମାନ ଠାରୁ ମିଳିଥିବା ଅସ୍ତ୍ରଶସ୍ତ୍ରରୁ ଗୋଟିଏ ବି ତା ନାଁରେ ପଞ୍ଜିକରଣ ହୋଇ ନଥିବା FBI ତଦନ୍ତ ବେଳେ ଜାଣିବାକୁ ପାଇଛି ।