Death Penalty / ସିରିଆର ପୂର୍ବତନ ରାଷ୍ଟ୍ରପତି ବାଶାର ଅଲ୍-ଆସାଦଙ୍କୁ ମୃତ୍ୟୁ ଦଣ୍ଡାଦେଶ; କଣ ଥିଲା ଦୋଷ

ଡାମାସକସ: ସିରିଆର ଏକ କୋର୍ଟ ପୂର୍ବତନ ରାଷ୍ଟ୍ରପତି ବାଶାର ଅଲ-ଆସାଦଙ୍କୁ ମୃତ୍ଯୁ ଦଣ୍ଡ । ସିରିଆର ଗୃହଯୁଦ୍ଧ ସମୟରେ ଯୁଦ୍ଧ ଅପରାଧ ଓ ମାନବତା ବିରୋଧୀ ଅପରାଧ ଅଭିଯୋଗରେ ସିରିଆର ପୂର୍ବତନ ରାଷ୍ଟ୍ରପତି ବାଶାର ଅଲ୍-ଆସାଦଙ୍କୁ ଏକ ଅଦାଲତ ମୃତ୍ୟୁ ଦଣ୍ଡ ଦଣ୍ଡ ଶୁଣାଇଛନ୍ତି । ବାଶାରଙ୍କ ସାନ ଭାଇ ମାହେର ଅଲ-ଆସାଦଙ୍କୁ ମଧ୍ୟ ମାନବତା ବିରୋଧୀ ଏବଂ ଯୁଦ୍ଧ ଅପରାଧ ପାଇଁ ମୃତ୍ୟୁଦଣ୍ଡ ଦେଇଛନ୍ତି କୋର୍ଟ ।

ଉଭୟଙ୍କ ଉପରେ ସିରିଆର ୧୪ ବର୍ଷର ସଂଘର୍ଷ ସମୟରେ ମାନବତା ବିରୋଧୀ ଅପରାଧ ଏବଂ ଯୁଦ୍ଧ ଅପରାଧ ଅଭିଯୋଗ ହୋଇଥିଲା, ଯେଉଁଥିରେ ପ୍ରାୟ ୫ ଲକ୍ଷ ଲୋକଙ୍କ ମୃତ୍ୟୁ ଘଟିଥିଲା । ସମାନ ମାମଲାରେ ଆସାଦଙ୍କ ଜଣେ ସମ୍ପର୍କୀୟ ଭାଇ ତଥା ମାମୁଁଙ୍କ ପୁଅ ଆତିଫ୍ ନଜିବଙ୍କୁ ମଧ୍ୟ ମୃତ୍ୟୁଦଣ୍ଡ ଦିଆଯାଇଛି । ନଜିବଙ୍କ ବିରୁଦ୍ଧରେ ଦକ୍ଷିଣ ପ୍ରଦେଶ ଦାରାରେ ହୋଇଥିବା କାର୍ଯ୍ୟାନୁଷ୍ଠାନର ନେତୃତ୍ୱ ନେବାର ଅଭିଯୋଗ ହୋଇଥିଲା, ଯାହା ଏକ ବିଦ୍ରୋହ ସୃଷ୍ଟି କରିଥିଲା ​​ଏବଂ ଗୃହଯୁଦ୍ଧର କାରଣ ହୋଇଥିଲା । ସିରିଆର ଏକ କୋର୍ଟ ଦଣ୍ଡ ଘୋଷଣା କରିବା ସମୟରେ, ନଜିବ ଏକ କଏଦୀଙ୍କ ପୋଷାକ ପିନ୍ଧି ଏକ ପିଞ୍ଜରା ଭିତରେ ଠିଆ ହୋଇଥିଲେ ।

• ୨୦୨୪ରେ ଋଷ ଖସି ପଳାଇଥିଲେ ବାଶାର ଏବଂ ମାହେର

ଡିସେମ୍ବର ୨୦୨୪ରେ ସରକାରର ପତନ ପରେ ବାଶାର ଏବଂ ମାହେର ଋଷକୁ ପଳାଇ ଯାଇଥିଲେ । ପୁଟିନ୍ ସରକାର ସେମାନଙ୍କୁ ଶରଣ ଦେଇଥିଲେ । ଆତେଫ୍ ନଜିବ ଋଷକୁ ପଳାଇବାରେ ଅସମର୍ଥ ହୋଇଥିଲେ । ତାଙ୍କୁ ଜାନୁଆରୀ ୨୦୨୫ରେ ଗିରଫ କରାଯାଇଥିଲା । ଆତେଫ୍ ମଙ୍ଗଳବାର କୋର୍ଟରେ ହାଜର ହୋଇଥିଲେ । ଏକ ଅନ୍ତର୍ଜାତୀୟ ଗଣମାଧ୍ୟମ ସଂସ୍ଥା ଅନୁଯାୟୀ, ଆତେଫଙ୍କୁ କଏଦୀ ପୋଷାକ ପିନ୍ଧି ଏକ ପିଞ୍ଜରାକୁ ଅଣାଯାଇଥିଲା, ଯେଉଁଠାରେ ତାଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା । ଆତେଫ ନଜିବ ସିରିଆର ସେନାର ପୂର୍ବତନ ବ୍ରିଗେଡିୟର ଜେନେରାଲ ଥିଲେ । ୨୦୧୧ ମସିହାରେ ସେ ଦାରା ପ୍ରଦେଶର ରାଜନୈତିକ ସୁରକ୍ଷା ଶାଖାର ମୁଖ୍ୟ ଥିଲେ।

ତାଙ୍କ ବିରୁଦ୍ଧରେ ୨୦୧୧ ମସିହାରେ ସିରିଆର ଦାରା ପ୍ରଦେଶରେ ପ୍ରତିବାଦକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାର ନିର୍ଦ୍ଦେଶ ଦେଇଥିବା ଅଭିଯୋଗ ହୋଇଛି । ଏହି ନିର୍ଦ୍ଦେଶ ଯୋଗୁଁ ସମଗ୍ର ସିରିଆରେ ବିରୋଧ ପ୍ରଦର୍ଶନ ଆରମ୍ଭ ହୋଇଥିଲା ଯାହା ୧୪ ବର୍ଷ ଧରି ଜାରି ରହିଥିଲା, ଯାହାର ପରିଣାମସ୍ୱରୂପ ୫ ଲକ୍ଷ ଲୋକଙ୍କ ମୃତ୍ୟୁ ଘଟିଥିଲା ।

ପଢନ୍ତୁ ଏହି ଖବର: ମସଜିଦ ପରିସରରେ ଟଳିପଡ଼ିଲା ଲସ୍କର କମାଣ୍ଡର; ରହସ୍ୟଘେରରେ ମୃତ୍ୟୁର କାରଣ

• ବାଶାର ଅଲ୍-ଆସାଦଙ୍କ ସମ୍ପର୍କରେ

ଆସାଦ ବର୍ଷ ୨୦୦୦ ମସିହାରେ ନିଜ ପିତା ହାଫେଜ୍ ଅଲ୍-ଆସାଦଙ୍କ ସ୍ଥାନ ନେଇଥିଲେ ଓ ଡିସେମ୍ବର ୨୦୨୪ରେ ସରକାରର ପତନ ହେବା ପର୍ଯ୍ୟନ୍ତ ଶାସନ କରିଥିଲେ । ତାଙ୍କ ପିତା ପ୍ରାୟ ୩ ଦଶନ୍ଧି ଧରି ଦେଶରେ ଶାସନ କରିଥିଲେ । ସିରିଆ ଯୁଦ୍ଧ ସମୟରେ ଆସାଦ ସରକାର ଉପରେ ବେଆଇନ କାର୍ଯ୍ଯାନୁଷ୍ଠାନ, ହତ୍ୟା, ନିର୍ଯାତନା, ଲୋକଙ୍କୁ ଜୋରଜବରଦସ୍ତ ଗାଏବ କରିବା, ମନଗଢା ଅଭିଯୋଗ ଆଣି ହେପାଜତକୁ ନେବା ଓ ସାଧାରଣ ଜନତା ଥିବା ସ୍ଥାନରେ ଆକ୍ରମଣ କରିବାର ଗମ୍ଭୀର ଅଭିଯୋଗ ରହିଥିଲା ।