ଲକ୍ଷ୍ନୌ: ପ୍ରଥମେ ଗଦି ଚିରା ହେଲା, ତା ପରେ ସୋଫା । ଏହାପରେ ଛାତ ଫଟାଯିବା ସାଙ୍ଗକୁ ଘରର କାନ୍ଥ ମଧ୍ୟ ଭଙ୍ଗାଗଲା । ଭିଜିଲାନ୍ସ ଟିମ ଯୁଆଡ଼େ ହାତ ମାରିଲା ସେଠୁ ବାହାରିଲା ପୁଳା ପୁଳା ଟଙ୍କା । କେଉଁଠୁ ଗଦା ଗଦା ଟଙ୍କା ବିଡ଼ା ତ ଆଉ କେଉଁଠି କେଜିଏ କେଜିଏ ସୁନା, ରୁପା ଅଳଙ୍କାର । ଯାହାକୁ ଦେଖି ଭିଜିଲାନ୍ସର ଅଧିକାରୀ ତାଜୁବ୍ ହୋଇଯାଇଛନ୍ତି । ଆଗ୍ରାର ପୂର୍ବ ଏଆରଟିଓ ଲଲିତ କୁମାରଙ୍କ ଘରେ ରେଡ୍ ସମୟରେ ଦୃଶ୍ୟ ସମସ୍ତଙ୍କୁ ଚକିତ କରିଛି ।

ଉତ୍ତର ପ୍ରଦେଶ ଭିଜିଲାନ୍ସ ଚଢାଉ ବେଳେ ସାମ୍ନାକୁ ଆସିଥିବା ଦୃଶ୍ୟ ଆଲୋଚନାର ବିଷୟ ପାଲଟିଛି। ବର୍ଷ ବର୍ଷ ଧରି ଜମା ହୋଇଥିବା ଆୟ ବର୍ହିଭୂତ ସମ୍ପତ୍ତିକୁ ଲୁଚାଇବା ପାଇଁ ଘରର ବିଭିନ୍ନ ସ୍ଥାନକୁ ଗୁପ୍ତ କେନ୍ଦ୍ର କରାଯାଇଥିଲା । ତଦନ୍ତ ବେଳେ ପ୍ରାୟ ୧୩ କିଲୋଗ୍ରାମ ସୁନା, ₹୧.୬୨ କୋଟି ନଗଦ ଟଙ୍କା, ଏବଂ ଅନେକ ସମ୍ପତ୍ତିର ରେକର୍ଡ ଠାବ ହୋଇଛି । ଏହି ରେଡ୍ ପରେ ଲୋକେ ଏବେ ପୂରା RTO ଅଫିସ୍ ବ୍ୟବସ୍ଥା ଉପରେ ପ୍ରଶ୍ନ ଉଠାଇଛନ୍ତି ।

• ଲଳିତ କୁମାରଙ୍କ ବିରୋଧରେ ଆସିଥିଲା ଅଭିଯୋଗ

ଭିଜିଲାନ୍ସ ଅଧିକାରୀଙ୍କ ଅନୁଯାୟୀ, ଲଳିତ କୁମାରଙ୍କ ବିରୋଧରେ ଦୀର୍ଘ ଦିନ ଧରି ଆୟ ବହିର୍ଭୂତ ସମ୍ପତ୍ତି ଅଭିଯୋଗ ଆସିଥିଲା । ପ୍ରଥମେ ଏକ ଗୋପନୀୟ ଯାଞ୍ଚ କରାଯାଇଥିଲା । ପରବର୍ତ୍ତୀ ସମୟରେ ଅନେକ ସ୍ଥାନରେ ଏକକାଳୀନ ଅପରେସନ୍ ଆରମ୍ଭ ହୋଇଥିଲା । ତଦନ୍ତ ବେଳେ ଜଣାପଡ଼ିଥିଲା ଯେ ଲଳିତଙ୍କ ଘରର ଗଠନ ପ୍ରଣାଳୀ ଏପରି ଥିଲା, ଯାହା ସାଧାରଣ ବ୍ୟବହାର ପାଇଁ ନଥିଲା । ଯେପରିକି ବେଡ୍ ଭିତରେ ସ୍ୱତନ୍ତ୍ର ଥାକ, ସୋଫା ଭିତରେ ଗୁପ୍ତ ବାକ୍ସ, ଫଲ୍ସ ସିଲିଂରେ ବନ୍ଦ ଚାମ୍ବର, କାନ୍ଥ ଭିତରେ ଗୁପ୍ତ ଲକର ଏବଂ ଷ୍ଟୋରରୁମରେ ପୃଥକ ଲକର । ଯେତେବେଳେ ଏହି ସମସ୍ତ ସ୍ଥାନଗୁଡ଼ିକ ଯାଞ୍ଚ ହୋଇଥିଲା ସେତେବେଳେ ଏଠାରୁ ଟଙ୍କା ବିଡ଼ା, ସୁନା ଅଳଙ୍କାର ଜବତ ହୋଇଥିଲା । ଅବୈଧ ସମ୍ପତ୍ତିକୁ ଲୁଚାଇବାକୁ ଏହି ସ୍ଥାନଗୁଡ଼ିକ ଏପରି ଢଙ୍ଗରେ ନିର୍ମିତ ହୋଇଥିଲା, ଯାହାକୁ ଖାଲି ଆଖିରେ ଠାବ କରି ଅସମ୍ଭବ ଥିଲା ।

• କାନ୍ଥ ଦେଇଥିଲା ପ୍ରମାଣ

ତଦନ୍ତରେ ସବୁଠାରୁ ଗୁରୁତ୍ୱପୂର୍ଣ୍ଣ ମୋଡ଼ ସେତେବେଳେ ଆସିଥିଲା ​​ଯେତେବେଳେ ଭିଜିଲାନ୍ସ ଟିମକୁ କାନ୍ଥକୁ ଦେଖି ସନ୍ଦେହ ହୋଇଥିଲା । ଟିମ କାନ୍ଥ ନିର୍ମାଣ ଶୈଳୀରେ ପରିବର୍ତ୍ତନ ଦେଖିବା ପରେ ସେଗୁଡ଼ିକୁ ଯାଞ୍ଚ କରିବା ଆରମ୍ଭ କରିଥିଲେ । ଯେତେବେଳେ କାନ୍ଥର ଗୁପ୍ତ କୋଠରୀ ପର୍ଯ୍ୟନ୍ତ ଟିମ ପହଞ୍ଚିଥିଲା ସେତେବେଳେ ଏଠାରୁ ବହୁ ପରିମାଣର ସୁନା, ନଗଦ ଟଙ୍କା ଏବଂ ଗୁରୁତ୍ଵପୂର୍ଣ୍ଣ କାଗଜପତ୍ର ଜବତ କରାଯାଇଥିଲା ।

• ୧୩ କେଜି ସୁନା ଜବତ

ସବୁଠାରୁ ଚର୍ଚ୍ଚିତ କଥା ହେଉଛି ରେଡ୍ ବେଳେ ପ୍ରାୟ ୧୩ କିଲୋଗ୍ରାମ ସୁନା ଜବତ ହୋଇଛି । ବର୍ତ୍ତମାନର ବଜାର ମୂଲ୍ୟ ଅନୁସାରେ ଏହାର ମୂଲ୍ୟ କୋଟି କୋଟି ଟଙ୍କା ହେବ ବୋଲି କୁହାଯାଉଛି । ଏହି ସୁନା କେବେ କିଣାଯାଇଥିଲା, ଏହି ଟଙ୍କା ପୈଠ କରିବା ପାଇଁ କେଉଁ ଆକାଉଣ୍ଟ ବ୍ୟବହାର କରାଯାଇଥିଲା, କ୍ରୟ ପାଇଁ କୌଣସି ଡକ୍ୟୁମେଣ୍ଟ ଅଛି କି ? ଏହା ଘୋଷିତ ଆୟ ସହିତ ମେଳ ଖାଉଛି କି ? ଏହି ସମସ୍ତ ଦିଗ ଉପରେ ଭିଜିଲାନ୍ସ ଟିମ ତଦନ୍ତ କରୁଛି ।

• ୧.୬୨ କୋଟି ନଗଦ ଟଙ୍କା ଜବତ

ଭିଜିଲାନ୍ସ ଅଧିକାରୀଙ୍କ କହିବାନୁଯାୟୀ, ଟଙ୍କା ଗୋଟିଏ ସ୍ଥାନରେ ମିଳିନାହିଁ । ବିଭିନ୍ନ କୋଠରୀ, ଆଲମାରୀ ଏବଂ ଗୁପ୍ତ ସ୍ଥାନରୁ ଟଙ୍କା ବିଡାଗୁଡ଼ିକ ଜବତ କରାଯାଇଛି । ପ୍ରତ୍ୟେକ ବିଡ଼ାକୁ ବର୍ତ୍ତମାନ ତାଲିକାଭୁକ୍ତ କରାଯାଉଛି । ଯଦି ପ୍ୟାକେଟ ଗୁଡ଼ିକରେ କୌଣସି ବ୍ୟାଙ୍କ, ତାରିଖ କିମ୍ବା ଅନ୍ୟାନ୍ୟ ଚିହ୍ନ ମିଳେ, ତେବେ ସେଗୁଡ଼ିକ ତଦନ୍ତରେ ଗୁରୁତ୍ୱପୂର୍ଣ୍ଣ ପ୍ରମାଣ ହୋଇପାରିବ ।

ପଢନ୍ତୁ ଏହି ଖବର: ୧୪ ବର୍ଷ ପ୍ରେମ ବିବାହର ରକ୍ତାକ୍ତ ଅନ୍ତ; ସ୍ତ୍ରୀ ବାପଘରକୁ ଯିବାରୁ ହତ୍ୟା କଲା ସ୍ଵାମୀ

• ସମ୍ପତ୍ତିର ନେଟୱାର୍କ ୩ଟି ସହରରେ ବ୍ୟାପିଛି

ପ୍ରାଥମିକ ତଦନ୍ତରୁ ଏହା ମଧ୍ୟ ଜଣାପଡିଛି ଯେ ଲଳିତ କୁମାର ଏବଂ ତାଙ୍କ ପରିବାର ଲକ୍ଷ୍ନୌ, ଆଗ୍ରା ଏବଂ ନୋଏଡାରେ ଅନେକ ସମ୍ପତ୍ତିର ମାଲିକ । ଏଥିରେ ଜମି, ଘର ଏବଂ ପ୍ଲଟ୍ ବି ସାମିଲ । ତଦନ୍ତକାରୀ ଏଜେନ୍ସିଗୁଡ଼ିକ ଏବେ ଏହି ସମ୍ପତ୍ତି କ୍ରୟ ସମୟରେ ଘୋଷିତ ଆୟ ଏବଂ ପେମେଣ୍ଟ କରାଯାଇଥିବା ଟ୍ରାଞ୍ଜାକ୍ସନର ତଦନ୍ତ କରୁଛି । ଏବେ ସବୁଠୁ ବଡ଼ ପ୍ରଶ୍ନ ହେଉଛି ଯେ ଏହା କେବଳ ଜଣେ ଅଧିକାରୀଙ୍କ କାହାଣୀ, ନା ଏହା ପଛରେ ଏକ ବଡ଼ ନେଟୱାର୍କ ରହିଛି ? ଏହି ପ୍ରଶ୍ନଗୁଡ଼ିକର ଉତ୍ତର ଖୋଜୁଛି ଭିଜିଲାନ୍ସ ଟିମ ।