ଅଗ୍ନିକୁ ସାକ୍ଷୀ ରଖି ପରସ୍ପରର ହାତ ଧରିଥିଲେ । ସୁଖଦୁଃଖରେ ଠିଆ ହେବେ ବୋଲି ପ୍ରତିଜ୍ଞା ନେଇଥିଲେ । ସାତ ଜନ୍ମର ସାଥୀ ହୋଇ ନୂଆ ଜୀବନ ଆରମ୍ଭ କରିଥିଲେ । କିନ୍ତୁ ଯେମିତି ତାଙ୍କ ଖୁସିରେ ଲାଗିଥିଲା କାହାର ନଜର । ୨୫ ଦିନ ଭିତରେ ସରିଗଲା ସବୁ ଖୁସି । ବିବାହର ମାତ୍ର ୨୫ ଦିନ ପରେ ଚାଲିଗଲେ ସ୍ଵାମୀ-ସ୍ତ୍ରୀ । ପ୍ରଥମେ ସ୍ତ୍ରୀ ଓ ପରେ ସ୍ଵାମୀ । ନବଦମ୍ପତି ସାଥୀରେ ମାତ୍ର ୫ ଦିନ ରହିଥିବାବେଳେ ସମସ୍ତଙ୍କୁ ଦୁଃଖ ଦେଇ ଆରପାରିକୁ ଚାଲିଯାଇଛନ୍ତି ।

ମଧ୍ୟପ୍ରଦେଶ ଗ୍ଵାଲିଅରରୁ ଆସିଛି ଏପରି ଘଟଣା । ପ୍ରଥମେ ସ୍ତ୍ରୀଙ୍କ ମୃତ୍ୟୁ ଘଟିଥିଲା । ଏହାର ୨ ଦିନ ପରେ ଧୈର୍ଯ୍ୟହରା ସ୍ଵାମୀଙ୍କ ବି ମୃତ୍ୟୁ ଘଟିଛି । ବ୍ୟକ୍ତି ଜଣକ ସ୍ତ୍ରୀଙ୍କ ବିୟୋଗକୁ ସହିନପାରି ଶୁକ୍ରବାର ବାଥରୁମରେ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ପୋଲିସ ମୃତଦେହ ନିକଟରୁ କୌଣସି ସୁଇସାଇଡ୍ ନୋଟ୍ ପାଇନଥିବାବେଳେ ପୁରା ଘଟଣାକୁ ନେଇ ସନ୍ଦେହ ସୃଷ୍ଟି ହୋଇଛି ।

• ବୁଧବାର ବାପଘରେ ମେଘାଙ୍କ ମୃତ୍ୟୁ

୨୩ ବର୍ଷୀୟ ଯୁବତୀ ମେଘା ଓରଫ ଜ୍ୟୋତି ମୁରାର ପୋଲିସ ଷ୍ଟେସନ ଅଧୀନ ହୁରାୱାଲି ଲିଙ୍କ ରୋଡରେ ରହୁଥିଲେ । ସେ ୨୫ ଦିନ ପୂର୍ବରୁ କୁଞ୍ଜ ବିହାର କଲୋନି ଫେଜ୍-୧ ଅଧିବାସୀ ସିଦ୍ଧାର୍ଥ କାନ୍ଦିଲ (୨୬)ଙ୍କୁ ବିବାହ କରିଥିଲେ । ମେଘାଙ୍କ ବାପା ଗୁରଭୀର ସିଂ ଝିଅ ବାହାଘର ପାଇଁ ବିପୁଳ ଅର୍ଥ ଖର୍ଚ୍ଚ କରିଥିଲେ, ଯାହାଦ୍ଵାରା ବିବାହ ପରେ ଝିଅ ଖୁସିରେ ରହିବ । ହେଲେ ତାଙ୍କର ସବୁ ଆଶା ଯେପରି ପାଣି ଫୋଟକା ପରି ମିଳେଇଯାଇଛି । ଗତ ମେ ୧ ତାରିଖରେ ମେଘା ଶାଶୁ ଘରୁ ବାପଘରକୁ ଆସିଥିଲେ । ବୁଧବାର ଦିନ ମେଘାଙ୍କ ବାପା ଜଣେ ସମ୍ପର୍କୀୟଙ୍କ ଘରକୁ ଯାଇଥିଲେ ଓ ମାଆ ଗୀତା ଘରେ ଥିଲେ । ଯେତେବେଳେ ସେ ମଧ୍ୟାହ୍ନ ସମୟରେ ଉପର ମହଲାକୁ ଯାଇଥିଲେ, ସେତେବେଳେ ମେଘାଙ୍କୁ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ ।

• ୨ ଦିନ ପରେ ସ୍ଵାମୀର ମୃତ୍ୟୁ

ଉଭୟ ପରିବାର ମେଘାଙ୍କ ହଠାତ୍ ମୃତ୍ୟ କୌଣସି ଆତ୍ମହତ୍ୟା ନା ହତ୍ୟା ବୋଲି ଜାଣିପାରୁନଥିବାବେଳେ ଏପଟେ ମେଘାଙ୍କ ସ୍ଵାମୀ ସିଦ୍ଧାର୍ଥଙ୍କ ମୃତ୍ୟୁ ଆଉ ଏକ ଶକ୍ତ ଧକ୍କା ଦେଇଛି । ବୃତ୍ତିରେ କଣ୍ଟ୍ରାକ୍ଟର ଥିବା ସିଦ୍ଧାର୍ଥ ବାଥରୁମରେ ଆତ୍ମହତ୍ୟା କରିଛନ୍ତି । ମେଘାଙ୍କ ବିୟୋଗରେ ସେ ଏପରି ଚରମ ନିଷ୍ପତ୍ତି ନେଇଥିବା ପରିବାର ଓ ସମ୍ପର୍କୀୟ ସନ୍ଦେହ କରୁଛନ୍ତି । ସିଦ୍ଧାର୍ଥଙ୍କ ବାପା ପରମଲ୍ ସିଂ ପୁଅକୁ ରୁମରେ ଖୋଜିଥିଲେ ଓ ଏହାପରେ ଯେତେବେଳେ ସେ ବାଥରୁମ ଖୋଲିଥିଲେ, ତାଙ୍କ ପାଦ ତଳୁ ମାଟି ଖସିଯାଇଥିଲା । ସିଦ୍ଧାର୍ଥଙ୍କୁ ସେ ଝୁଲନ୍ତା ଅବସ୍ଥାରେ ଦେଖି ଅବାକ୍ ହୋଇଯାଇଥିଲେ । ଗୋଲାକା ମନ୍ଦିର ପୋଲିସ ଷ୍ଟେସନ ଘଟଣାସ୍ଥଳରେ ପହଞ୍ଚି ସିଦ୍ଧାର୍ଥଙ୍କ ମୃତଦେହକୁ ଉଦ୍ଧାର କରିଥିଲା ।

• ସାଥୀରେ ମାତ୍ର ୫ଦିନ ବିତାଇଛନ୍ତି ନବଦମ୍ପତି

ପରିବାରର କହିବାନୁସାରେ, ୨୫ ଦିନ ବିବାହ ମଧ୍ୟରେ ଏହି ନବଦମ୍ପତି ସାଥୀରେ ମାତ୍ର ୫ଦିନ ରହିଥିଲେ । ମେଘା କାହିଁକି ଆତ୍ମହତ୍ୟା କଲେ, ତାହା କେହି ଜାଣିପାରୁନାହାନ୍ତି । ପରିବାର ଲୋକେ ମେଘାଙ୍କ ଏପରି ନିଷ୍ପତ୍ତିକୁ ନେଇ ଭାଙ୍ଗିପଡ଼ିଛନ୍ତି । ସେପଟେ ପୋଲିସ ପୁରା ଘଟଣାକୁ ଗମ୍ଭୀର ଭାବେ ନେଇ ଅଧିକ ତଦନ୍ତ ଜାରି ରଖିଛି । ଫୋରେନସିକ୍ ଟିମ୍ ମଧ୍ୟ ଉଭୟ ଲୋକେସନକୁ ଯାଇ ନମୁନା ସଂଗ୍ରହ କରିଛି ।

ପଢନ୍ତୁ ଏହି ଖବର: ଅଭିନେତ୍ରୀ ତ୍ଵିଶା ଶର୍ମାଙ୍କ ହେବ ଦ୍ଵିତୀୟ ଶବ ବ୍ୟବଚ୍ଛେଦ, ହାଇକୋର୍ଟ ଦେଲେ ମଞ୍ଜୁରୀ

• ମୋବାଇଲ ଫୋନ ଓ ଡିଜିଟାଲ ପ୍ରମାଣ ଏକମାତ୍ର ଭରସା

ନବଦମ୍ପତିଙ୍କ ହଠାତ୍ ମୃତ୍ୟୁକୁ ନେଇ ଗ୍ଵାଲିଅର ପୋଲିସ ତଦନ୍ତ ପ୍ରକ୍ରିୟାକୁ ତ୍ଵରାନ୍ବିତ କରିଛି । ଉଭୟ କନ୍ୟା ପକ୍ଷ ଓ ବର ପକ୍ଷଙ୍କ ବୟାନ ରେକର୍ଡ କରିଛି ପୋଲିସ । ମେଘା ଓ ସିଦ୍ଧାର୍ଥଙ୍କ ମୋବାଇଲ ଫୋନକୁ ମଧ୍ୟ ଯାଞ୍ଚ କରାଯାଉଛି । ସାଇବର ସେଲ୍ ଉଭୟଙ୍କ ଶେଷ କଲ୍‌ ହ୍ଵାଟ୍ସଆପ୍ ଚାଟ୍‌ ଭିଡିଓ କିମ୍ବା କୌଣସି ଡିଜିଟାଲ ସୁଇସାଇଡ୍ ନୋଟ୍ ସନ୍ଦେହରେ ଯାଞ୍ଚ କରୁଛି । ଅନ୍ୟପଟେ ଗୋଲାକା ମନ୍ଦିର ପୋଲିସ ଷ୍ଟେସନ ଇନଚାର୍ଜ ଧର୍ମେନ୍ଦ୍ର ସିଂ ଯାଦବ ଏକ ବଡ଼ ଖୁଲାସା କରିଛନ୍ତି । ସେ କହିଛନ୍ତି ଯେ ସ୍ଵାମୀ-ସ୍ତ୍ରୀଙ୍କ ମଧ୍ୟରେ କୌଣସି ଯୁକ୍ତିତର୍କ ହୋଇଥିଲା, ହୁଏତ ସେଥିପାଇଁ ଏଭଳି ଗୋଟେ ଅଘଟଣ ଘଟିଯାଇଛି । ଏଯାବତ୍ କୌଣସି ସୁଇସାଇଡ୍ ନୋଟ୍ ମିଳିନଥିବା ସେ କହିଛନ୍ତି ।