ହିମାଚଳ ପ୍ରଦେଶ ସିରମୌର ଜିଲ୍ଲାରେ ଲଜ୍ଜାଜନକ ଘଟଣା । ବିଶ୍ଵବିଦ୍ୟାଳୟ ବାଥରୁମରେ ଛାତ୍ରୀଙ୍କ ଅଶ୍ଳୀଳ ଭିଡିଓ ହେଉଥିଲା ସୁଟ୍ । ଶେଷରେ ଧରାପଡ଼ିଲା ଅଭିଯୁକ୍ତ ସଫେଇ କର୍ମଚାରୀ । ଛାତ୍ରୀମାନଙ୍କ ଅଭିଯୋଗ ଅନୁସାରେ ଛାତ୍ରୀ ନିବାସ ବାଥରୁମରେ ସେମାନଙ୍କର ଗାଧୋଉଥିବା ଓ ଶୌଚ ସମୟର ଭିଡିଓ ରେକର୍ଡ ହେଉଥିଲା । ଏହି ଘଟଣା ଛାତ୍ରୀମାନେ ଜାଣିବା ପରେ ସମସ୍ତଙ୍କ ମଧ୍ୟରେ ଆକ୍ରୋଶ ଦେଖିବାକୁ ମିଳିଛି । ଛାତ୍ରୀମାନେ ବିଶ୍ଵବିଦ୍ୟାଳୟ କର୍ତ୍ତୃପକ୍ଷଙ୍କୁ ଏ ନେଇ ଅବଗତ କରିଥିବାବେଳେ ଅଭିଯୁକ୍ତକୁ କାବୁ କରିଛି ପୋଲିସ ।

ଏହି ଘଟଣା ଜଣାପଡ଼ିବା ପରେ ଛାତ୍ରୀମାନେ ବିରୋଧ ପ୍ରଦର୍ଶନ କରିଥିଲେ । ବିରୋଧ ହେବାର ପ୍ରାୟ ଦେଢ ଘଣ୍ଟା ମଧ୍ୟରେ ବିଶ୍ଵବିଦ୍ୟାଳୟ କର୍ତ୍ତୃପକ୍ଷ ଶୁକ୍ରବାର ଅପରାହ୍ନରେ ସ୍ଥାନୀୟ ପୋଲିସକୁ ଖବର ଦେଇଥିଲେ । ଏହାପରେ ପୋଲିସର ଏକ ଦଳ ଘଟଣାସ୍ଥଳରେ ପହଞ୍ଚିଥିଲା ଓ ତଦନ୍ତ ପ୍ରକ୍ରିୟା ଆରମ୍ଭ କରିଥିଲା । ଅଭିଯୁକ୍ତ ସଫେଇ କର୍ମଚାରୀକୁ ପୋଲିସ ଗିରଫ କରିଥିବା ଜଣାପଡ଼ିଛି । ଅଭିଯୁକ୍ତ ଜଣକ ଝାଡ଼ଖଣ୍ଡର ଅଧିବାସୀ । ଏହି ନିନ୍ଦନୀୟ କାଣ୍ଡ ଭିଆଇବା ପରେ ସେ କ୍ୟାମ୍ପସରୁ ପଳାୟନ କରିବାକୁ ଉଦ୍ୟମ କରୁଥିଲା । କିନ୍ତୁ ଛାତ୍ରୀମାନେ ତାକୁ ମାଡ଼ି ବସିଥିଲେ । ଛାତ୍ରୀମାନେ ସଫେଇ କର୍ମଚାରୀକୁ ମାଡ଼ ମାରିବା ପରେ ପୋଲିସକୁ ହସ୍ତାନ୍ତର କରିଛନ୍ତି ।

• ବାଥରୁମରେ କରୁଥିଲା ଭିଡିଓ ରେକର୍ଡିଂ

ଅଭିଯୁକ୍ତ ସଫେଇ କର୍ମଚାରୀ ଛେଦନ ସାହୁ କିଛି ମାସ ପୂର୍ବରୁ ବିଶ୍ଵବିଦ୍ୟାଳୟରେ ସଫେଇ କର୍ମଚାରୀ ଭାବେ କାମ ଆରମ୍ଭ କରିଥିଲା । ଛାତ୍ରୀମାନେ ତା ଉପରେ ବାଥରୁମରେ ଅଶ୍ଳୀଳ ଭିଡିଓ ରେକର୍ଡ କରୁଥିବା ନେଇ ଅଭିଯୋଗ କରିଛନ୍ତି । ବିଶ୍ଵବିଦ୍ୟାଳୟ କ୍ୟାମ୍ପସ ଭିତରୁ ଏହି ଅଭିଯୋଗ ଏବେ ଛାତ୍ରୀଙ୍କ ସୁରକ୍ଷା ଉପରେ ଅନେକ ପ୍ରଶ୍ନ ଠିଆ କରିଛି । ତେବେ ଅଭିଯୁକ୍ତ ଜଣକ ଏହି ଭିଡିଓ କେତେବେଳେ ସୁଟ୍ କରିଥିଲା ଓ ଏହାର ଦୁରୂପଯୋଗ କରିଛି କି ନାହିଁ କିମ୍ବା କାହା ସହିତ ସେୟାର କରିଛି କି ନାହିଁ ସେ ନେଇ ପୋଲିସ ତଦନ୍ତ କରୁଛି । ପୋଲିସ ତା ଫୋନରୁ ସବୁ ଭିଡିଓକୁ ଡିଲିଟ୍ କରିଛି ।

ପଢନ୍ତୁ ଏହି ଖବର: ମହଙ୍ଗା ପଡ଼ିଲା WhatsAppରେ ଭିଡିଓ ଭାଇରାଲ୍; ୫ ବର୍ଷ ଜେଲ୍ ସହ ଗଣିବେ ୫ ଲକ୍ଷ ଲେଖାଏଁ ଜରିମାନା

ଏଠାରେ କହିରଖୁଛୁ କି, ପୂର୍ବରୁ ମଧ୍ୟ ଏହି ବିଶ୍ଵବିଦ୍ୟାଳୟଟି ବିବାଦ ଘେରକୁ ଆସିଥିଲା । କିଛି ମାସ ପୂର୍ବରୁ ଛାତ୍ରୀମାନେ ଅଭିଯୋଗ କରିଥିଲେ ଯେ ସେମାନଙ୍କୁ ପୋକ ବାହାରୁଥିବା ଖାଦ୍ୟ ପରଷାଯାଇଥିଲା । ଏହାକୁ ନେଇ ଛାତ୍ରୀମାନେ ବିରୋଧ ପ୍ରଦର୍ଶନ କରିଥିଲେ । ସେହି ଘଟଣାଟି ଥମିବା ପରେ ଏବେ ଅଶ୍ଳୀଳ ଭିଡିଓ ସୁଟିଂକୁ ନେଇ ପୁଣି ଥରେ ବିବାଦ ଦେଖାଦେଇଛି ।