Air Hostess Assault / କାମରେ ଯାଉଥିଲେ ଏୟାର ହୋଷ୍ଟେସ; ରାସ୍ତାରେ ଗାଡ଼ି ରଖି ଦୁଷ୍କର୍ମ କଲା କ୍ୟାବ୍ ଡ୍ରାଇଭର

ହାଇଦ୍ରାବାଦ: ପୁଣି ଦକ୍ଷିଣ ରାଜ୍ୟ ତେଲେଙ୍ଗାନାର କ୍ୟାପିଟାଲ ସିଟି ହାଇଦ୍ରାବାଦରେ ମହିଳାଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଛି । ଏକ ଘରୋଇ ଏୟାରଲାଇନର କ୍ୟାବିନ କ୍ରୁ ମେମ୍ବର କାମକୁ ଯାଉଥିବା ସମୟରେ ଦୁଷ୍କର୍ମର ଶିକାର ହୋଇଥିବା ଅଭିଯୋଗ କରିଛନ୍ତି । ଅଫିସ ପକ୍ଷରୁ ପଠାଯାଇଥିବା କ୍ୟାବର ଡ୍ରାଇଭର ତାଙ୍କୁ ଅଧାବାଟରେ ଗାଡ଼ି ଅଟକାଇ ଦୁଷ୍କର୍ମ କରିଥିବା ପୀଡ଼ିତା ଅଭିଯୋଗ ଆଣିଛନ୍ତି । ଘଟଣାରେ ପୋଲିସ ତ୍ଵରିତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ଡ୍ରାଇଭରକୁ ଗିରଫ କରିନେଇଛି ।

ପୋଲିସର କହିବାନୁସାରେ, ଏହି ଘଟଣାଟି ଜୁଲାଇ ୨୦ ତାରିଖ ଅପରାହ୍ନ ୨.୪୦ଟାରେ ଘଟିଛି । ମହିଳା ନିଜ କାମ ପାଇଁ ରାଜୀବ ଗାନ୍ଧୀ ଇଣ୍ଟରନ୍ୟାସନାଲ ଏୟାରପୋର୍ଟରୁ ଶମଶାବାଦକୁ ଯାଉଥିଲେ । ଏୟାରଲାଇନ ପକ୍ଷରୁ କର୍ମଚାରୀଙ୍କ ଲାଗି ଉପଲବ୍ଧ କରାଯାଇଥିବା ଅଫିସ କ୍ୟାବ୍ ତାଙ୍କୁ ନେବାକୁ ବିମାନବନ୍ଦରରେ ପହଞ୍ଚିଥିଲା । କିଛି ସମୟ ପରେ ଡ୍ରାଇଭର ଜଣକ ନିର୍ଦ୍ଧାରିତ ରୁଟକୁ ପରିବର୍ତ୍ତନ କରିଥିଲା ।

• ଶୂନଶାନକୁ ସ୍ଥାନକୁ ନେଇଗଲା

ପୀଡ଼ିତା ଅଭିଯୋଗ କରିଛନ୍ତି ଯେ ଡ୍ରାଇଭର ତାଙ୍କୁ ଏୟାରପୋର୍ଟ ନିକଟରେ ଏକ ନିର୍ମାଣଧୀନ ନିର୍ଜନ ସ୍ଥାନକୁ ନେଇଯାଇଥିଲା । ସେଠାରେ ସେ ଟଏଲେଟ୍ ଯିବ ବୋଲି ବାହାନା କରିଥିଲା ଓ ପରେ ଏୟାର ହୋଷ୍ଟେସଙ୍କୁ ଦୁଷ୍କର୍ମ କରିଥିଲା । ଏହି ଘଟଣା ପରେ ପୀଡ଼ିତା ସିଧା ଏୟାରପୋର୍ଟ ପୋଲିସ ଆଉଟପୋଷ୍ଟରେ ପହଞ୍ଚିଥିଲେ ଓ ପୂରା ଘଟଣା ସମ୍ପର୍କରେ ସୂଚନା ଦେଇଥିଲେ । ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରିଛି । ଯାଞ୍ଚ ସମୟରେ ପୋଲିସ ଅଭିଯୁକ୍ତର ପରିଚୟ ୨୩ ବର୍ଷୀୟ ପ୍ରଶାନ୍ତ କୁମାର ବୋଲି କହିଛି, ଯିଏକି ରଙ୍ଗାରେଡ୍ଡୀ ଜିଲ୍ଲାର ଅଧିବାସୀ ।

• ଘଟଣାର ଗୋଟିଏ ଦିନ ଭିତରେ ଅଭିଯୁକ୍ତ ଗିରଫ

ପୋଲିସ ଘଟଣା ଘଟିବାର ଗୋଟିଏ ଦିନ ପରେ ଅର୍ଥାତ ଜୁଲାଇ ୨୧ ତାରିଖରେ ଅଭିଯୁକ୍ତକୁ ଗିରଫ କରିଥିଲା । ପଚରାଉଚରା ଓ ଡାକ୍ତରୀ ମାଇନା ପରେ ଅଭିଯୁକ୍ତକୁ କୋର୍ଟରେ ହାଜର କରାଯାଇଥିଲା, ଏହାପରେ ତାକୁ ନ୍ୟାୟିକ ହେପାଜତକୁ ପଠାଯାଇଛି । ପୋଲିସ କହିଛି ଯେ ଏହି ଘଟଣାରେ ତଦନ୍ତ ଏବେ ବି ଜାରି ଅଛି ଓ ବିଭିନ୍ନ ଦିଗକୁ ଦୃଷ୍ଟିରେ ରଖି ଖୋଳତାଡ଼ କରାଯାଉଛି । ତଦନ୍ତ ବେଳେ ଏହା ଜଣାପଡ଼ିଛି ଯେ ପୀଡ଼ିତା ଜଣକ ଯେଉଁ କ୍ୟାବରେ ଯାତ୍ରା କରୁଥିଲେ, ତାହାକୁ ସ୍ଥାନୀୟ ଏକ ଟ୍ରାଭେଲ ଏଜେନ୍ସି ପରିଚାଳିତ କରୁଥିଲା ।

ପଢନ୍ତୁ ଏହି ଖବର: ମିଛ ଖବର ଦେଇ ହୋଟେଲକୁ ନେଲା; ଦୁଷ୍କର୍ମ କଲା ପଡ଼ୋଶୀ

ଏହି ଘଟଣା ପରେ ପୋଲିସ ଏୟାରଲାଇନ୍ସର ମହିଳା କର୍ମଚାରୀଙ୍କ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବାକୁ ପରାମର୍ଶ ଦେଇଛି । ବିଶେଷ କରି ମହିଳା କର୍ମଚାରୀମାନେ ବିମାନବନ୍ଦର ଯିବା ଆସିବା କରିବା ସମୟରେ କିପରି ସୁରକ୍ଷିତ ଭାବେ ନିଜର ଗନ୍ତବ୍ୟସ୍ଥଳରେ ପହଞ୍ଚିବେ, ସେହି ବ୍ୟବସ୍ଥାକୁ ଦୃଢ କରିବାକୁ ଗୁରୁତ୍ଵ ଦେବାକୁ କହିଛି ।