Argus News - ମିଛ ଖବର ଦେଇ ହୋଟେଲକୁ ନେଲା; ଦୁଷ୍କର୍ମ କଲା ପଡ଼ୋଶୀ

ସାମ୍ନାକୁ ଆସିଲା ଏକ ପଡ଼ୋଶୀର ଜଘନ୍ୟକାଣ୍ଡ । ବହୁ ଦିନ ଧରି ମହିଳାଙ୍କ ଉପରେ ପକାଇଥିଲା ଖରାପ ଦୃଷ୍ଟି । ମହିଳାଙ୍କ ସରଳତାର ସୁଯୋଗ ନେଇ କଲା ଦୁଷ୍କର୍ମ । ପୀଡ଼ିତାଙ୍କ ସ୍ଵାମୀଙ୍କ ଦୁର୍ଘଟଣା ହୋଇଛି କହି ମିଛ ଖବର ଦେଲା । ଏହାପରେ ମହିଳା ଜଣକ ଚିନ୍ତିତ ହୋଇଯିବା ପରେ ତାଙ୍କୁ ସାଥୀରେ ନେଇ ହୋଟେଲକୁ ଗଲା । ଏହାପରେ ମହିଳାଙ୍କୁ ଜୀବନରୁ ମାରିଦେବାକୁ ଧମକ ଦେଇ ଦୁଷ୍କର୍ମ କଲା । ଏହି ନିନ୍ଦନୀୟ ଘଟଣା ମଧ୍ୟପ୍ରଦେଶ ଗ୍ଵାଲିଅରର ଏକ ହୋଟେଲରେ ଘଟିଛି ।

ଫିଜିକଲ୍ ଥାନା ଅଞ୍ଚଳରେ ୩୮ ବର୍ଷୀୟ ମହିଳା ଜଣକ କହିଛନ୍ତି ଯେ ସେ ବସଷ୍ଟାଣ୍ଡ ନିକଟ ଦେଇ ଯାଉଥିଲେ । ଏହି ସମୟରେ ତାଙ୍କର ପଡ଼ୋଶୀ ୪୦ ବର୍ଷୀୟ ପଙ୍କଜ ରାଠୋର ତାଙ୍କ ନିକଟକୁ ଆସିଥିଲା ଏବଂ ତାଙ୍କ ସ୍ଵାମୀଙ୍କ ଦୁର୍ଘଟଣା ହୋଇଛି ବୋଲି ମିଛ ଖବର ଦେଇଥିଲା । ପଡ଼ୋଶୀ ହୋଇଥିବାରୁ ମହିଳା ଜଣକ ଅଭିଯୁକ୍ତ ଉପରେ ସହଜରେ ବିଶ୍ଵାସ କରିନେବା ସହ ତା' ସାଥୀରେ ଯାଇଥିଲେ । ଏହା ଶେଷରେ ତାଙ୍କ ପାଇଁ ଏକ ବଡ଼ ଭୁଲ୍ ହୋଇଛି । ପଡ଼ୋଶୀ ଜଣକ ବିଶ୍ଵାସରେ ବିଷ ଦେଇ ତାଙ୍କ ସହ କରିଛି ଖରାପ କାମ । ଅଭିଯୁକ୍ତ ମହିଳାଙ୍କୁ ଗ୍ଵାଲିଅରର ଏକ ହୋଟେଲକୁ ନେଇ ଜୋରଜବରଦସ୍ତ ଦୁଷ୍କର୍ମ କରିଥିବା ଜଣାପଡ଼ିଛି ।

• ଝାନ୍ସୀରେ ପୁଣିଥରେ ଦୁଷ୍କର୍ମ

ଏହାପରେ ସେ ପୀଡ଼ିତାଙ୍କୁ ଶିବପୁରୀକୁ ନେଇକି ଆସିଥିଲା । ସେଠାରେ ଝାନ୍ସୀ ତିହାରା ଅଞ୍ଚଳରେ ମହିଳାଙ୍କୁ ଦ୍ଵିତୀୟ ଥର ଦୁଷ୍କର୍ମ କରିଥିଲା । ମହିଳା ଘରେ ପହଞ୍ଚିବା ପରେ ପୂରା ଘଟଣା ନିଜ ସ୍ଵାମୀଙ୍କୁ କହିଥିଲେ । ଏହାପରେ ଦମ୍ପତି କୋତବାଲି ଥାନାରେ ଅଭିଯୁକ୍ତ ପଙ୍କଜ ରାଠୋର ବିରୋଧରେ ଅଭିଯୋଗ କରିଥିଲେ । ପୋଲିସ ମାମଲା ରୁଜୁ କରି ଘଟଣାର ଯାଞ୍ଚ ପ୍ରକ୍ରିୟା ଆରମ୍ଭ କରିଥିଲା ।

ପଢନ୍ତୁ ଏହି ଖବର: କୋଟାରେ ଗୋଟିଏ ପରିବାରରୁ ୧୨ ଜଣଙ୍କୁ ଆଜୀବନ କାରାଦଣ୍ଡ; ଅପରାଧ କଣ ଥିଲା ?

• ଦୁଷ୍କର୍ମକାରୀକୁ ଗିରଫ କଲା ପୋଲିସ

କୋତବାଲି ପୋଲିସ ଏହି ମାମଲାକୁ ଗମ୍ଭୀରତାର ସହ ନେଇ ତ୍ଵରିତ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ପୋଲିସ ଗୁରୁବାର ଅଭିଯୁକ୍ତ ପଙ୍କଜ ରାଠୋରକୁ ଗିରଫ କରି କୋର୍ଟ ଚାଲାଣ କରିଥିଲା । ସେଠାରୁ ତାକୁ ଜେଲକୁ ପଠାଯାଇଛି । ଏହାସହିତ କୋତବାଲି ଥାନା ମୁଖ୍ୟ ରୋହିତ ଦୁବେ ଘଟଣାର ଅଧିକ ତଦନ୍ତ ଜାରି ରଖିଥିବା କହିଛନ୍ତି ।