In laws Assault / ଝିଅ ଜନ୍ମ ହେଲା କାଳ; ଗାଁଦାଣ୍ଡକୁ ଘୋଷାଡ଼ି ପୁଅବୋହୂଙ୍କୁ ନିର୍ଦ୍ଧୁମ ମାଡ଼

ଘରକୁ କୁନି ଶିଶୁଟିଏ ଆସିଲେ ପୁରା ମାହୋଲ ବଦଳିଯାଏ । କୁଆଁ କୁଆଁ ରାବରେ ପୁରା ଘର କମ୍ପିଉଠେ । କୁନି ନିଷ୍ପାପ ମୁହଁଟିକୁ ଦେଖିଲେ ପରିବାର ସବୁ ଦୁଃଖ ଭୁଲିଯାଏ । ଆଉ ଯେତେବେଳେ କୁନି ପିଲାଟି ହସିବା, କଥା କହିବା ଆରମ୍ଭ କରେ...ସେତେବେଳେ ପ୍ରତିଟି ମଣିଷ ତାର ଖନି ଖନି କଥାରେ ନିଜକୁ ହଜେଇଦିଏ । ସେ ପୁଅ ହେଉ କି ଝିଅ କୁନି ପିଲାଙ୍କୁ ସମସ୍ତେ ଆଦର କରନ୍ତି । ହେଲେ ଏଠି ଦେଖିବାକୁ ମିଳିଛି ପୁରା ଓଲଟା ଦୃଶ୍ୟ । ଯାଆଁଳା ଶିଶୁକନ୍ୟା ଜନ୍ମ ଦେବାରୁ ନିଜ ପୁଅବୋହୂଙ୍କୁ ଆକ୍ରମଣ କରିଛନ୍ତି ଶାଶୁଘର ଲୋକେ । ଶାଶୁ, ଶ୍ଵଶୁର, ନଣନ୍ଦ ସମସ୍ତେ ମିଶି ଗାଁଦାଣ୍ଡରେ ମାଡ଼ ମାରିଥିବା ନବଜାତର ପିତାମାତା ଅଭିଯୋଗ କରିଛନ୍ତି ।

ମାହାଙ୍ଗା ବ୍ଲକ୍ ଶ୍ରିକୃଷ୍ଣପୁର ପଞ୍ଚାୟତର ପଶୁଲୁଣ୍ଡା ଗ୍ରାମରୁ ଆସିଛି ଏପରି ଅଭିଯୋଗ । ସୂଚନା ଅନୁସାରେ କାନପୁର ଗ୍ରାମର ଅଜୟ ଜେନାଙ୍କ ଝିଅ ପାର୍ବତୀ ଜେନା ୪ ବର୍ଷ ତଳେ ପଶୁଲୁଣ୍ଡା ଗ୍ରାମର ସମୁଲ୍ୟ ଜେନାଙ୍କ ପୁଅ ଚନ୍ଦ୍ରଶେଖର ଜେନାଙ୍କ ସହିତ ବୈଦିକ ରୀତିନୀତିରେ ବିବାହ ହୋଇଥିଲା । ବିବାହ ପରେ ଶାଶୁ ଘର ଲୋକେ ବୋହୂ ପାର୍ବତୀଙ୍କୁ ଯୌତୁକ ନିର୍ଯାତନା ଦେଇ ଆସୁଥିଲେ । ଗୋଟେ ମାସ ତଳେ ବୋହୂ ପାର୍ବତୀଙ୍କ ଦୁଇଟି ଯାଆଁଳା କନ୍ୟା ସନ୍ତାନ ଜନ୍ମ ହୋଇଛନ୍ତି ।

କାହିଁକି କନ୍ୟା ସନ୍ତାନ ହେଲା ବୋଲି ବିରୋଧ କରିଥିଲେ ଶାଶୂ ଶଶୁର । ପୁଅ କାହିଁକି ଜନ୍ମ କଲୁନି, ଝିଅ ଦୁଇଟାକୁ ମାରିଦେ ନହେଲେ ଆମେ ତୋତେ ଜୀବନରୁ ମାରିଦେବୁ ବୋଲି କହିଥିଲେ ଶାଶୁ ଶ୍ଵଶୁର । ଏହାପରେ ପୁଅ ଓ ବୋହୂଙ୍କୁ ଗାଁ ଦାଣ୍ଡରେ ତଳେ ପକାଇ ଜୀବନରୁ ମାରି ଦେବାକୁ ଚେଷ୍ଟା କରିଥିଲେ ଶାଶୁ ଶଶୁର ଓ ନଣନ୍ଦ, ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏହି ଘଟଣାରେ ଶାଶୂ ଶଶୁର ଓ ନଣନ୍ଦଙ୍କ ନାମରେ ମାହାଙ୍ଗା ଥାନାରେ ଏକ ଲିଖିତ ଅଭିଯୋଗ କରିଛନ୍ତି ପୁଅ ଓ ବୋହୂ । ଏବେ ପୋଲିସ ଘଟଣାର ତଦନ୍ତ ଚଲେଇଛି ।

ପଢନ୍ତୁ ଏହି ଖବର: କେଉଁ ରାଜ୍ୟରେ ସର୍ବାଧିକ ଜନ୍ମହାର ଓ କେଉଁଠି ଅଧିକ ହୁଏ ଲୋକଙ୍କ ମୃତ୍ୟୁ ? ରିପୋର୍ଟରେ ଖୁଲାସା

ବୋହୂ ପାର୍ବତୀ ଜେନା ଅଭିଯୋଗ କରି କହିଛନ୍ତି ଯେ, ସେ ଯାଆଁଳା ଶିଶୁକନ୍ୟାଙ୍କୁ ଜନ୍ମ ଦେବା ପରେ ଶାଶୁ ତାଙ୍କୁ ହସ୍ପିଟାଲରେ ଏକାକୀ ଛାଡ଼ି ଚାଲିଆସିଥିଲେ । ଏହାପରେ ଯେତେବେଳେ ପାର୍ବତୀ ଘରକୁ ଆସିଲେ, କାମ କରିବା ପାଇଁ ସେ କୁନିଝିଅକୁ ଧରିବା ଲାଗି ଶାଶୁଙ୍କୁ ଅନୁରୋଧ କରିଥିଲେ । ମାତ୍ର ଶାଶୁ ଶିଶୁଙ୍କୁ ଧରିବା ପରିବର୍ତ୍ତେ ତାଙ୍କୁ ଗାଳି ଗୁଲଜ କରିବା ସହ ମାଡ଼ ମାରିଥିଲେ । ଏହାପରେ ଶ୍ଵଶୁର ଓ ନଣନ୍ଦ ମଧ୍ୟ ମାଡ଼ ମାରିଥିବା ସେ ଅଭିଯୋଗ କରିଛନ୍ତି ।