Indian Origin Fraud Case / ମୂଳ ଭାରତୀୟଙ୍କ କାରନାମା; ୬୪ ଧନୀଙ୍କୁ ୩୩୬ କୋଟି ଲୁଟ୍‍ ତାଲିକାରେ ଥିଲେ ଟେଲର ସ୍ଵିଫ୍ଟଙ୍କ ସ୍ଵାମୀ

ଆମେରିକାରେ ଭାରତୀୟ ମୂଳ ବ୍ୟବସାୟୀଙ୍କ କାରନାମା । ପୋଞ୍ଜି ସ୍କିମ ନାଁରେ ପ୍ରାୟ ୬୪ ଧନୀ ବ୍ୟକ୍ତିଙ୍କୁ ଚୂନା ଲଗାଇଛନ୍ତି । ଏପରିକି ଆମେରିକାର ଲୋକପ୍ରିୟ ସିଙ୍ଗର ଟେଲର୍ ସ୍ଵିଫ୍ଟ ମଧ୍ଯ ଏହି ଠକେଇର ଶିକାର ହୋଇଛନ୍ତି । ଏହି ଠକ ଜଣକ ୩୫ ମିଲିଅନ ଆମେରିକୀୟ ଡଲାର ବା ୩୩୬ କୋଟି ଟଙ୍କାରୁ ଅଧିକ ଲୁଟିଛି । ଏହାପରେ ଏହି ଲୁଟ୍ ଟଙ୍କାକୁ ସେ ପାକିସ୍ତାନ ପଠାଉଥିବା ଜଣାପଡ଼ିଛି । ଏହି ଠକର ପରିଚୟ ସିଦ୍ଧାର୍ଥ ଜୱାହର ହୋଇଥିବାବେଳେ ସେ ଜଣେ ଫାଇନାନ୍ସିଆଲ୍ ଆଡଭାଇଜର ବୋଲି ଜଣାପଡ଼ିଛି ।

• କଣ ପୂରା ଘଟଣା ?

ଆମେରିକାର ମିସୋରୀ ଇଷ୍ଟର୍ଣ୍ଣ ଡିଷ୍ଟ୍ରିକ୍ଟର ଆମେରିକୀୟ ଆଟର୍ଣ୍ଣ ଅଫିସ ଅନୁସାରେ, ଏହି ଘଟଣାରେ ସିଦ୍ଧାର୍ଥକୁ ଦଣ୍ଡାଦେଶ ଶୁଣାଯାଇଛି । ଏପରିକି ତାକୁ ସମସ୍ତ ନିବେଶକଙ୍କୁ ୩.୧୩ କୋଟି ଡଲାର ଫେରସ୍ତ କରିବାକୁ ନିର୍ଦ୍ଦେଶ ଦିଆଯାଇଛି । ୩୮ ବର୍ଷୀୟ ଠକ ସିଦ୍ଧାର୍ଥ ଟେକ୍ସାସର ଏକ କମ୍ପାନୀ ସ୍ଵିଫ୍ଟଆର୍କ କ୍ୟାପିଟାଲର ସହ ପ୍ରତିଷ୍ଠାତା ଏବଂ ମ୍ୟାଜେନିଂ ପାର୍ଟନର ଥିଲା । ଟେଲର୍ ସ୍ଵିଫ୍ଟଙ୍କ ସ୍ଵାମୀ ଟ୍ରାଭିସ୍ ମଧ୍ୟ ଏହି କମ୍ପାନୀର ଜଣେ ନିବେଶକ ଥିଲେ । କୋର୍ଟ କହିଛନ୍ତି ଯେ ଏହି ଠକେଇ ୨୦୧୬ରୁ ଆରମ୍ଭ ହୋଇଥିଲା ।

• ପାକିସ୍ତାନକୁ ପଠାଉଥିଲେ ଲୁଟ୍ ଟଙ୍କା

ସିଦ୍ଧାର୍ଥ ଜୱାହର ନିବେଶରୁ ମିଳିଥିବା ସବୁ ଟଙ୍କାକୁ ଫିଲିଫ୍ ମରିସ୍ ପାକିସ୍ତାନ (PMP)ରେ ଲଗାଇଥିଲା । ଏଠାରେ କହିରଖୁଛୁ କି, PMP ହେଉଛି ପାକିସ୍ତାନରେ ତମାଖୁ ସେବନ କରୁଥିବା କମ୍ପାନୀ । ଯେତେବେଳେ ଏହି କମ୍ପାନୀର ମୂଲ୍ୟ ହ୍ରାସ ପାଇଥିଲା, ଏ ସମ୍ପର୍କରେ ଠକ ସିଦ୍ଧାର୍ଥ ନିବେଶକଙ୍କୁ ସତକଥା କହିନଥିଲା । ବରଂ ନିବେଶକମାନଙ୍କୁ ଲାଭ ହେଉଥିବା କହିଥିଲା । ଏପରିକି ସେ କିଛି ନିବେଶକଙ୍କୁ କହିଥିଲା ଯେ ସେମାନଙ୍କ ଟଙ୍କା ଭିନ୍ନ ଭିନ୍ନ କମ୍ପାନୀରେ ଲଗାଯାଇଛି ଓ ସେଥିରୁ ତାଙ୍କୁ ଲାଭ ହେଉଛି ।

ପଢନ୍ତୁ ଏହି ଖବର: କିଏ ଦ୍ଵାଦଶ ପାସ୍ ତ କିଏ କମ୍ପାଉଣ୍ଡର, ସାଜିଥିଲେ ଡାକ୍ତର; ୧୦ବର୍ଷ ହେଲାଣି ଚାଲୁଥିଲା କ୍ଲିନିକ୍

• ଆଉ କେଉଁଠି ଟଙ୍କା ନିବେଶ କରୁଥିଲା ?

କୋର୍ଟଙ୍କ କହିବାନୁସାରେ, ଜୁଲାଇ ୨୦୧୬ରୁ ଡିସେମ୍ବର ୨୦୨୩ ପର୍ଯ୍ୟନ୍ତ ଠକ ସିଦ୍ଧାର୍ଥ ସ୍ଵିଫ୍ଟଆର୍କରୁ ୩.୫ କୋଟି ଡଲାରରୁ ଅଧିକ ନେଇଥିଲା । ହେଲେ ସେଥିରୁ କେବଳ ୧ କୋଟି ଡଲାର ସେ ନିବେଶ ରିଥିଲା । ବାକି ଟଙ୍କାକୁ ପ୍ରାଇଭେଟ୍ ଜେଟ୍‍ ମହଙ୍ଗା ହୋଟେଲ୍‍ ଟେକ୍ସାସ୍ ଓ ନ୍ୟୁୟର୍କର ବିଳାସପୂର୍ଣ୍ଣ ଆପାର୍ଟମେଣ୍ଟ ମହଙ୍ଗା ପୋଷାକ ଓ ଖାଦ୍ୟରେ ବିନିଯୋଗ କରିଥିଲା । ଠକ ସିଦ୍ଧାର୍ଥ ବିରୋଧରେ ରୁଜୁ ହୋଇଥିବା ୩ଟି ଠକେଇ ମାମଲାରେ ସେ ନିଜ ଦୋଷ ସ୍ଵୀକାର କରିଛି । କୋର୍ଟ ଏହା ମଧ୍ୟ ଜାଣିବାକୁ ପାଇଛନ୍ତି ଯେ ସେ ୨୦୦୫ରୁ ଆମେରିକାରେ ଅବୈଧ ଭାବେ ରହୁଥିଲା । ଏହାପରେ କୋର୍ଟ ଠକ ସିଦ୍ଧାର୍ଥକୁ ୧୧ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ଶୁଣାଇଛନ୍ତି ।