Jagatsinghpur Crime / ପାର୍ବଣ ପୂର୍ବରୁ ଅଶାନ୍ତ ଜଗତସିଂହପୁର; ବନ୍ଧୁକ ମୁନରେ ଲକ୍ଷାଧିକ ଟଙ୍କା ଲୁଟ୍, ବୋମା ଜବତ

ପାର୍ବଣ ପୂର୍ବରୁ ଅଶାନ୍ତ ହୋଇପଡ଼ିଛି ଜଗତସିଂହପୁର । ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି । ବନ୍ଧୁକ ମୁନରେ ଲକ୍ଷାଧିକ ଟଙ୍କା ଲୁଟ୍ କରି ପୋଲିସକୁ ଖୋଲା ଚ୍ୟାଲେଞ୍ଜ ଦେଇଛନ୍ତି ଅପରାଧୀ । ଜଗତସିଂହପୁର ସଦର ଥାନା ସୋମନାଥ ହାଟ ନିକଟ ଏକ ବଣ ଭିତରୁ ତିନୋଟି ଜୀବନ୍ତ ବୋମା ଜବତ କରାଯାଇଛି । ଏହାପରେ ପୋଲିସ ପାଟ୍ରୋଲିଂକୁ ନେଇ ଉଠିଛି ପ୍ରଶ୍ନ । ସେପଟେ ଜୀବନ୍ତ ବୋମା ମିଳିବା ପରେ ସ୍ଥାନୀୟ ଲୋକେ ଭୟଭୀତ ହୋଇପଡ଼ିଛନ୍ତି ।

• ବନ୍ଧୁକ ମୁନରେ ୨ ଲକ୍ଷ ଲୁଟ୍

ସୂଚନା ଅନୁଯାୟୀ ରାତିରେ ପରିବା ବ୍ୟବସାୟୀଙ୍କୁ ବନ୍ଧୁକ, ଖଣ୍ଡା, ଭୁଜାଲି ଓ ବୋମା ଦେଖାଇ ପ୍ରାୟ ୨ ଲକ୍ଷ ଟଙ୍କା ଲୁଟି ନେଇଥିଲେ ଦୁର୍ବୃତ୍ତ । ଫେରାର ହେବା ବେଳେ ଦୁର୍ବୃତ୍ତମାନେ ଛାଡି ଯାଇଥିବା ୩ଟି ଅଫୁଟା ବୋମାକୁ ପୋଲିସ ଉଦ୍ଧାର କରିଛି । ଘଟଣାସ୍ଥଳରେ ପୋଲିସ ପହଞ୍ଚି ବମ୍ ସ୍କ୍ୱାର୍ଡ ସହାୟତାରେ ବୋମାକୁ ନିଷ୍କ୍ରିୟ କରିଛି । ପାର୍ବଣ ପୂର୍ବରୁ ଜିଲ୍ଲାରେ ଲୁଟ୍, ରାହାଜାନୀ ବଢିବାରେ ଲାଗିଛି । ଯାହାକି ପୋଲିସ ପାଇଁ ବଡ ଚ୍ୟାଲେଞ୍ଜ ସୃଷ୍ଟି କରିଛି । ଶାନ୍ତ ପ୍ରିୟ ଜଗତସିଂହପୁର ଜିଲ୍ଲାରେ ଦିନକୁ ଦିନ ଅପରାଧୀ ମାନେ ପୋଲିସକୁ ଖୋଲା ଚ୍ୟାଲେଞ୍ଜ ଦେବା ଏବେ ଆଇନଶୃଙ୍ଖଳକୁ ନେଇ ବଡ ପ୍ରଶ୍ନ ଚିହ୍ନ ଲଗାଇଛି । ଆଉ ଯାହାକୁ ନେଇ ସାଧାରଣରେ ପ୍ରକାଶ ପାଇଛି ଅସନ୍ତୋଷ ।

• କିଛି ଦିନ ପୂର୍ବରୁ ଜୀବନ୍ତୁ ଗୁଳି ଜବତ ହୋଇଥିଲା

କିଛି ଦିନ ପୂର୍ବରୁ ସଦର ଥାନା ଅଞ୍ଚଳରେ ନିଶାଡି ଶିବା ହାତରୁ US ମେଡ୍ ବନ୍ଧୁକ ସହ ଜୀବନ୍ତ ଗୁଳି ଜବତ ହୋଇଥିଲା, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ଶିବାର ସହଯୋଗୀ ପାଖରେ ଆଉ ଏକ ବନ୍ଧୁକ ଥିବା ପୋଲିସ ସ୍ୱୀକାର କରିଛି ହେଲେ ତାକୁ ଧରିବାରେ ବିଫଳ ହୋଇଛି । ଏହାର କିଛି ଦିନ ପରେ ସୋମନାଥ ହାଟ ବଜାରରେ ମାରଣାସ୍ତ୍ର ଦେଖାଇ ଲୁଟ୍ ହେବା ଘଟଣାର ତଦନ୍ତ ପାଇଁ ୨ଟି ସ୍ୱତନ୍ତ୍ର ଟିମ୍ ଗଠନ କରାଯାଇଛି ବୋଲି SDPO ଜଗତସିଂହପୁର ସୂଚନା ଦେଇଛନ୍ତି ।

ପଢନ୍ତୁ ଏହି ଖବର: "ପଶ୍ଚାତ୍ତାପ ନାହିଁ, ଭୁଲ ବି ମାଗିବିନି"; ସ୍ତ୍ରୀର କଟାମୁଣ୍ଡ ଫ୍ରିଜରେ ରଖି କହିଲା ଏମିତି

ସହରରେ ଅପରାଧୀମାନେ ପୋଲିସକୁ ଖୁଲା ଚ୍ୟାଲେଞ୍ଜ ଦେଇ ଅପରାଧ ଘଟାଉଛନ୍ତି । କେଉଁଠି ସୁନା ଦୋକାନ ଲୁଟ୍ ତ ଆଉ କେଉଁଠି ମାଡ଼ ମାରି ଟଙ୍କା ଲୁଟ୍ । ଏଭଳି ଘଟଣାକୁ ସ୍ଥାନୀୟ ଲୋକେ ତୀବ୍ର ନିନ୍ଦା କରିଛନ୍ତି । ଅପରାଧ ମୁକାବିଲା କରିବା ପାଇଁ ପୋଲିସ କି ପ୍ରକାର ପଦକ୍ଷେପ ଗ୍ରହଣ କରୁଛି ତାହା ଉପରେ ସମସ୍ତଙ୍କ ନଜର ।