PEO Bribery case / ଗରିବ ବିଧବାଙ୍କଠାରୁ ଲୁଟୁଥିଲେ; ଧରାପଡ଼ିଲେ ଲାଞ୍ଚୁଆ PEO

ଯାଜପୁର: ଓଡ଼ିଶା ଭିଜିଲାନ୍ସକୁ ଆଉ ଏକ ସଫଳତା । ୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ କୋରେଇ ବ୍ଲକ କାଚରାସାହି ଗ୍ରାମ ପଞ୍ଚାୟତର ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ (PEO) ପ୍ରଫୁଲ୍ଲ କୁମାର ନାଥଙ୍କୁ ମାଡ଼ି ବସିଲା ଟିମ । ସେ ରାଜ୍ୟ ସରକାରଙ୍କ ଅନ୍ତ୍ୟୋଦୟ ଗୃହ ଯୋଜନା (AGY) ଅନ୍ତର୍ଗତ ଶେଷ କିସ୍ତି ଏବଂ ବୋନସ୍ ରାଶି ପ୍ରଦାନ କରିବା ପାଇଁ ଜଣେ ଗରିବ ବିଧବାଙ୍କଠାରୁ ୫୦୦୦ ଟଙ୍କା ଲାଞ୍ଚ ନେଉଥିଲେ ଏହି ସରକାରୀ ବାବୁ ।

ଭିଜିଲାନ୍ସ ଅଧିକାରୀଙ୍କ କହିବା ଅନୁଯାୟୀ, ଅଭିଯୋଗକାରୀ ତଥା ଲାଞ୍ଚର ଶିକାର ହୋଇଥିବା ଗ୍ରାମର ଜଣେ ବିଧବା ତଥା ଗ୍ରାମୀଣ ଗୃହ ଯୋଜନାର ହିତାଧିକାରୀ ନିର୍ଦ୍ଧାରିତ ସମୟ ମଧ୍ୟରେ ତାଙ୍କର ପକ୍କା ଘର ନିର୍ମାଣ ସମାପ୍ତ କରିଥିଲେ । ଯୋଜନାର ବ୍ୟବସ୍ଥା ଅନୁଯାୟୀ ସେ ବୋନସ ସହିତ ଶେଷ କିସ୍ତି ପାଇବା କଥା । ତଥାପି କିସ୍ତି ପାଇବା ପାଇଁ ତାଙ୍କଠୁ ଲାଞ୍ଚ ନେଉଥିଲେ ପିଇଓ ।

• ୧୦,୦୦୦ ଲାଞ୍ଚ ଦାବି କରୁଥିଲେ

ପ୍ରଫୁଲ୍ଲ କୁମାର ନାଥ ତାଙ୍କଠାରୁ ଦେୟ ପ୍ରଦାନ କରିବା ପାଇଁ ୧୦,୦୦୦ ଟଙ୍କା ଦାବି କରିଥିବା ଅଭିଯୋଗ ହୋଇଛି । ଯେତେବେଳେ ହିତାଧିକାରୀ ଏତେ ପରିମାଣ ଦେବାକୁ ଅସମର୍ଥ ଥିବା ପ୍ରକାଶ କରିଥିଲେ, ସେତେବେଳେ ପିଇଓ ଜଣକ ତାଙ୍କ ଦାବିକୁ ୫,୦୦୦ ଟଙ୍କାକୁ ହ୍ରାସ କରିଥିଲେ । ସେ ସିଧାସିଧା କହିଥିଲେ ଯେ ଲାଞ୍ଚ ନଦେଲେ ଶେଷ କିସ୍ତି ଏବଂ ବୋନସ୍ ପ୍ରଦାନ କରିବେ ନାହିଁ ।

• ଭିଜିଲାନ୍ସର ଦ୍ଵାରସ୍ଥ ହେଲେ ବିଧବା ମହିଳା

ପିଇଓଙ୍କ ଧମକ ପରେ ବିଧବା ମହିଳା ଜଣକ ଏହାକୁ ସହଜରେ ହଜମ କରିନଥିଲେ କି ପିଇଓଙ୍କ କଥାରେ ରାଜି ହୋଇନଥିଲେ । ମହିଳା ଜଣକ ଓଡ଼ିଶା ଭିଜିଲାନ୍ସକୁ ଯାଇ ଅଭିଯୋଗ କରିଥିଲେ । ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ଏକ ଭିଜିଲାନ୍ସ ଦଳ ଜାଲ ବିଛାଇଥିଲା । ସରକାରୀ ବାବୁ ଜଣକ ୫,୦୦୦ ଟଙ୍କା ଲାଞ୍ଚ ନେଉଥିବାବେଳେ ତାଙ୍କୁ ମାଡ଼ି ବସିଥିଲା ।

ପଢନ୍ତୁ ଏହି ଖବର: ଭିଜିଲାନ୍ସ ଜାଲରେ ଆଉ ଜଣେ ବାବୁ; ୪ ମହଲା ବିଶିଷ୍ଟ କମର୍ସିଆଲ୍ ବିଲ୍ଡିଂ ଓ ଏକାଧିକ ଘରେ ତଲାସି

• ପିଇଓଙ୍କ ଦୁଇଟି ସ୍ଥାନରେ ଚଢାଉ

ଭିଜିଲାନ୍ସ ଟିମ ୫୦୦୦ ଟଙ୍କା ଜବତ କରି ମହିଳାଙ୍କୁ ଫେରସ୍ତ କରିଥିଲେ । ଏହାପରେ ଅଭିଯୁକ୍ତ ସରକାରୀ ବାବୁଙ୍କୁ କାବୁ କରିବା ସହ ତାଙ୍କର ଆୟ ବର୍ହିଭୂତ ସମ୍ପତ୍ତିର ଯାଞ୍ଚ କରିବା ପାଇଁ ତାଙ୍କର ଦୁଇଟି ସ୍ଥାନରେ ଏକକାଳୀନ ଚଢାଉ କରିଛି । ଅନ୍ୟପଟେ ଭିଜିଲାନ୍ସ ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ କଟକ ଭିଜିଲାନ୍ସ ଥାନାରେ କେସ୍ ନମ୍ବର ୨୬/୨୦୨୬ ଅନୁଯାୟୀ ଏକ ମାମଲା ରୁଜୁ କରିଛି । ସରକାରୀ ବାବୁ ଆଉ କାହାକୁ ଏପରି ଠକିଛନ୍ତି ଓ ଲାଞ୍ଚ ଅର୍ଥ ନେଇ କଣ ସମ୍ପତ୍ତି ରଖିଛନ୍ତି ସେନେଇ ଖୋଳତାଡ଼ ଚାଲିଛି ।