ଭୁବନେଶ୍ଵର: ଫସିଲେ ପୂର୍ବତନ କୋରାପୁଟ ITDAର ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ । ଭିଜିଲାନ୍ସ ଜାଲରେ ପୂର୍ବତନ ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ସଞ୍ଜୟ କିସ୍‌ପଟ୍ଟା । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଚଢ଼ାଉ ଜାରି ରହିଛି । ଏବେ ଭୁବନେଶ୍ୱର ଓଡ଼ିଶା କନ୍‌ଷ୍ଟ୍ରକ୍ସନ କର୍ପୋରେସନ ଲିମିଟେଡ୍‌ (OCC)ର କାର୍ଯ୍ୟନିର୍ବାହୀ ଯନ୍ତ୍ରୀ ଅଛନ୍ତି ସଞ୍ଜୟ । କୋରାପୁଟରେ ଥିବା ହୋଟେଲ ଓ ଭଡ଼ାଘରେ ଚାଲିଛି ଚଢ଼ାଉ । ପ୍ରାୟ ୨ କୋଟିର ହୋଟେଲ ଓ ଭଡ଼ାଘରେ ତଲାସି ଅଭିଯାନ ଜାରି ରହିଛି ।

• ୭ଟି ସ୍ଥାନରେ ଏକକାଳୀନ ଚଢ଼ାଉ

ଜୟପୁରର ସ୍ୱତନ୍ତ୍ର ଜଜ୍ ଭିଜିଲାନ୍ସ କୋର୍ଟଙ୍କ ଦ୍ୱାରା ଜାରି କରାଯାଇଥିବା ସର୍ଚ୍ଚ ୱାରେଣ୍ଟ ଆଧାରରେ ଭିଜିଲାନ୍ସ ୭ଟି ସ୍ଥାନରେ ଏକକାଳୀନ ଚଢ଼ାଉ କରିଛି । ଚଢ଼ାଉରେ ୬ ଜଣ ଡିଏସ୍‌ପି, ୮ ଜଣ ଇନ୍ସପେକ୍ଟର, ୭ ଜଣ ଏଏସ୍‌ଆଇ ସାମିଲ ଅଛନ୍ତି। କୋରାପୁଟ ଟିକ୍ରା ସାହିସ୍ଥିତ ସଞ୍ଜୟ କୁମାର କିସପଟ୍ଟାଙ୍କ ଭଡ଼ା ଘର, କୋରାପୁଟ ଟାଉନର ଚାରି ମହଲା ବିଶିଷ୍ଟ କମର୍ସିଆଲ ବିଲ୍ଡିଂ, କୋରାପୁଟର ନିର୍ମାଣାଧୀନ ଆବାସିକ ଗୃହ, ସୁନ୍ଦରଗଡ଼ ଲହୁଣୀପଡ଼ା ଥାନା ଅନ୍ତର୍ଗତ ଲାଟେଇମୁଣ୍ଡା ଗାଁରେ ଥିବା ପୈତୃକ ଘରରେ ଚଢ଼ାଉ ଚାଲିଛି ।

• ୨ କୋଟିର ହୋଟେଲ ଓ ଭଡ଼ାଘରେ ତଲାସି

ସେହିପରି ସୁନ୍ଦରଗଡ଼ ଜିଲ୍ଲା ଲହୁଣୀପଡ଼ା ଥାନା ଅନ୍ତର୍ଗତ ଲାଟେଇମୁଣ୍ଡା ଗାଁରେ ନିର୍ମାଣାଧୀନ ତିନି ମହଲା କୋଠା, ଭୁବନେଶ୍ୱର ଏବଂ ବଲାଙ୍ଗୀରଠାରେ ଥିବା ସରକାରୀ ବାସଭବନ ଏବଂ କାର୍ଯ୍ୟାଳୟ ଚ୍ୟାମ୍ବରରେ ରେଡ୍ ଚାଲିଛି । ସଞ୍ଜୟ କୁମାର କିସ୍ପଟ୍ଟା ପୂର୍ବରୁ କୋରାପୁଟ ଆଇଟିଡିଏରେ ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ଭାବେ କାର୍ଯ୍ୟରତ ଥିବାବେଳେ ବର୍ତ୍ତମାନ ଓସିସି ଲିମିଟେଡ୍‌ରେ ଏକ୍ସିକ୍ୟୁଟିଭ୍‌ ଇଞ୍ଜିନିୟର ଭାବେ କାମ କରୁଛନ୍ତି । ଆୟଠାରୁ ଅଧିକ ସମ୍ପତ୍ତି ଅଭିଯୋଗରେ ୭ ସ୍ଥାନରେ ଏକକାଳୀନ ରେଡ୍ ହେଉଛି । ସମ୍ପତ୍ତିର ହିସାବ ଖୋଜୁଛି ଭିଜିଲାନ୍ସ । ସଞ୍ଜୟ କିସ୍ପଟ୍ଟାଙ୍କ ବିରୋଧରେ ଡିଏ (DA) ମାମଲାରେ ତନାଘନା ଜୋରଦାର କରାଯାଇଛି ।

ପଢନ୍ତୁ ଏହି ଖବର: ARTO ଅଫିସରଙ୍କ ସମ୍ପତ୍ତି ଦେଖି ଆଖି ଟେରା; ଯୁଆଡେ ଦେଖିଲେ ଖାଲି ସୁନା, ୧.୬୨କୋଟି ଜବତ

ଚଢ଼ାଉ ବେଳେ ବିପୁଳ ସୁନା ଅଳଙ୍କାର ଜବତ
ତଦନ୍ତକାରୀ ଦଳ ପକ୍ଷରୁ ମିଳିଥିବା ସୂଚନା ଅନୁଯାୟୀ ଘରୁ ବିଭିନ୍ନ ପ୍ରକାରର ସୁନା ଅଳଙ୍କାର ଜବତ କରାଯାଇଛି । ସେଥିରେ ରହିଛି ଏକ ରାଣୀ ହାର, ଆଉ ଏକ ହାର, ଗୋଟିଏ ଯୋଡ଼ି ପୁରୁଣା ଚୁଡ଼ି, ଶିଶୁଙ୍କ ବାହୁଟି, ଛୋଟ ଆକାରର ହାର, ଚେନ୍, ମଙ୍ଗଳସୂତ୍ର, ଶଙ୍ଖା, କାନ ଟପ୍ସ, ନାକ ଫୁଲ ଏବଂ ସିଲଭର୍ ବ୍ରେସଲେଟ୍ ସହ ଅନ୍ୟାନ୍ୟ ଅଳଙ୍କାର । ପ୍ରତ୍ୟେକ ଅଳଙ୍କାରର ଓଜନ ଓ ଆନୁମାନିକ ମୂଲ୍ୟର ତାଲିକା ମଧ୍ୟ ପ୍ରସ୍ତୁତ କରାଯାଇଛି । ସମସ୍ତ ଅଳଙ୍କାରର ପ୍ରକୃତ ମୂଲ୍ୟ ଆକଳନ ପାଇଁ ତଦନ୍ତ ଜାରି ରହିଛି।"