ରାଜଧାନୀ ଦିଲ୍ଲୀରେ ମୋବାଇଲ୍ ଚୋରିରେ ଜଡିତ ଏକ ଆନ୍ତଃରାଜ୍ୟ ଗ୍ୟାଙ୍ଗ୍ ଠାବ ହୋଇଛି । ଏହାର ମୂଳ ଚେର ଝାଡ଼ଖଣ୍ଡର ସାହିବଗଞ୍ଜ ଜିଲ୍ଲାର ମହାରାଜପୁର ଗାଁରେ ଥିବା ଜଣାପଡ଼ିଛି । ଉତ୍ତର ଦିଲ୍ଲୀ ପୋଲିସ ଏହି ଗାଁରୁ ୬ ଜଣ କୁଖ୍ୟାତ ଅପରାଧୀଙ୍କୁ ଗିରଫ କରିବା ସହିତ ସେମାନଙ୍କ ନିକଟରୁ ୪୬ଟି ଦାମୀ ମୋବାଇଲ୍ ଫୋନ୍ ଜବତ କରିଛି । ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଏମାନେ ୬ ମାସ କିମ୍ବା ଗୋଟିଏ ବର୍ଷ ପାଇଁ ପିଲାମାନଙ୍କୁ ଭଡ଼ାରେ ନେଇ ଚୋରି ବିଦ୍ୟା ଦେଉଥିଲେ ।

ପୋଲିସ ତଦନ୍ତରୁ ଜଣାପଡିଛି ଯେ ମହାରାଜପୁର ଗାଁରେ କିଛି ମାଫିଆମାନେ ବାସ କରୁଛନ୍ତି ଯେଉଁମାନେ ଏହି ପିଲାମାନଙ୍କୁ ଭଡ଼ାର ନେଇ ବହୁ ଦିନ ଧରି ଚୋରି ତାଲିମ ଦେଉଛନ୍ତି । ଚୋରି ବିଦ୍ୟା ଶିଖିବା ପରେ ସେମାନଙ୍କୁ ଦିଲ୍ଲୀ ଏବଂ ମୁମ୍ବାଇ ଭଳି ମହାନଗରକୁ ଅଣାଯାଏ ଏବଂ ଜନଗହଳିପୂର୍ଣ୍ଣ ଅଞ୍ଚଳରେ ବ୍ୟାଗରୁ ପକେଟମାର କରି ମୋବାଇଲ୍ ଫୋନ୍ ଚୋରି କରିବାକୁ ତାଲିମ ଦିଆଯାଏ ।

• ଏହି ଗ୍ୟାଙ୍ଗ କିପରି କାମ କରେ ?

ଉତ୍ତର ଦିଲ୍ଲୀ ଡିସିପି ରାଜା ବାଠିଆଙ୍କ ଅନୁଯାୟୀ, ଏହି ଗ୍ୟାଙ୍ଗର ସଦସ୍ୟମାନେ ଗାଜିଆବାଦର ଚମନ ବିହାର ଅଞ୍ଚଳରେ ଭଡା ଘରେ ରହୁଥିଲେ ଏବଂ ଦିଲ୍ଲୀର ସାପ୍ତାହିକ ବଜାର ଏବଂ ମେଳାକୁ ଟାର୍ଗେଟ କରୁଥିଲେ । ସେମାନେ ଚୋରି କରିବା ପାଇଁ ନାବାଳକ ପିଲାଙ୍କୁ ବ୍ୟବହାର କରୁଥିଲେ । ଏହି ପିଲାମାନେ ସହଜରେ ଭିଡ଼ରେ ପଶିଯାଉଥିଲେ, ଲୋକଙ୍କ ପକେଟ କିମ୍ବା ବ୍ୟାଗରୁ ମୋବାଇଲ୍ ଫୋନ୍ ଛଡ଼ାଇ ନେଉଥିଲେ ଏବଂ ତୁରନ୍ତ ସେଗୁଡ଼ିକୁ ବରିଷ୍ଠ ଗ୍ୟାଙ୍ଗ ସଦସ୍ୟମାନଙ୍କୁ ହସ୍ତାନ୍ତର କରୁଥିଲେ ।

ପଢନ୍ତୁ ଏହି ଖବର: ଜନ୍ମଦାତ୍ରୀ ନା ରାକ୍ଷସୀ ! ନିଜ ୭ ବର୍ଷର ପୁଅ ଆର୍ଯ୍ୟନର ଜୀବନ ନେଲା ମାଆ

ପୋଲିସ ଆହୁରି କହିଛି ଯେ ସେମାନଙ୍କଠାରୁ ଉଦ୍ଧାର ହୋଇଥିବା ୪୬ଟି ଚୋରି ମୋବାଇଲ୍ ଫୋନ୍ ମଧ୍ୟରୁ ୧୨ଟି ମୋବାଇଲ୍ ବିଭିନ୍ନ ଏଫଆଇଆର୍ ସହିତ ଜଡିତ ଥିବା ଜଣାପଡିଛି, ଯେତେବେଳେ ଅନେକ ଫୋନ୍ CEIR ପୋର୍ଟାଲରେ ବ୍ଲକ୍ କିମ୍ବା ଟ୍ରାକ୍ ମଧ୍ୟ କରାଯାଇଥିଲା । ସେମାନେ ଦେଶର ବିଭିନ୍ନ ରାଜ୍ୟ ଦେଇ ବାଂଲାଦେଶକୁ ଏହି ଚୋରି ମୋବାଇଲ୍ ଯୋଗାଣ କରୁଥିଲେ ।

• କେମିତି ଧରାପଡ଼ିଲେ ନାବାଳିକ ଚୋର ?

ପୋଲିସ କହିଛି ଯେ ଏହି ପୁରା ଅପରେସନର ଆରମ୍ଭ ଏପ୍ରିଲ ୧୦ରେ ହୋଇଥିଲା । ପୋଲିସକୁ ଖବର ମିଳିଥିଲା ଯେ କିଛି ଏକ ଚୋରି ଗ୍ୟାଙ୍ଗ ଆଇଏସବିଟି କାଶ୍ମୀର ଗେଟ୍ ନିକଟରେ ଚୋରି ହୋଇଥିବା ମୋବାଇଲ ଫୋନଗୁଡ଼ିକ ସହିତ ଅଛନ୍ତି । ଏହି ଖବର ପାଇବା ପରେ ସ୍ପେଶାଲ ଷ୍ଟାଫର ସଦସ୍ୟମାନେ ସେଠାରେ ପହଞ୍ଚି ଜାଲ ବିଛାଇଥିଲେ । ଏହାପରେ ୬ ଜଣ ଅଭିଯୁକ୍ତଙ୍କୁ ଗିରଫ କରିଥିଲେ । ପଚରାଉଚରା ସମୟରେ ସେମାନେ ସବୁ ସତ ଓଗାଳିଥିଲେ ।