ରାଜଧାନୀର ହାଇପ୍ରୋଫାଇଲ୍ ଝାରପଡ଼ା ସ୍ପେଶାଲ ଜେଲ୍‌ର ସୁରକ୍ଷା ବ୍ୟବସ୍ଥାକୁ ନେଇ ଉଠିଲା ବଡ଼ ପ୍ରଶ୍ନବାଚୀ । ଜେଲ୍ ଭିତରେ ନିଶା ପାଇଁ ବ୍ୟବହାର ହେଉଛି କଫ୍ ସିରଫ୍ ଓ ଏକ୍ସପାୟରୀ ମେଡିସିନ୍ । ଯାହାକୁ ଅତ୍ୟଧିକ ମାତ୍ରାରେ ସେବନ କରି ୭ ଜଣ କଏଦୀ ଗୁରୁତର ହୋଇଥିବା ବେଳେ ଜଣେ କଏଦୀ ଏବେ ବି ଆଇସିୟୁରେ ଜୀବନ ସହ ସଂଗ୍ରାମ କରୁଛନ୍ତି । ପ୍ରଥମେ ଫୁଡ୍ ପଏଜନିଂ କୁହାଯାଉଥିବା ବେଳେ ଚିକିତ୍ସା କରୁଥିବା ଡାକ୍ତରଙ୍କ ବୟାନ ପରେ ଘଟଣାରେ ଆସିଛି ସାଙ୍ଘାତିକ ଟ୍ୱିଷ୍ଟ । ପ୍ରଶ୍ନ ଉଠୁଛି, ଜେଲ୍ ଭିତରେ ନିଶାର ଜାଗା ନେଲାଣି କି କଫ୍ ସିରଫ୍ ?

ଭୁଷୁଡ଼ି ପଡ଼ିଲା ଜେଲ୍‌ର ସୁରକ୍ଷା ପ୍ରାଚୀର । ରାତି ଅଧରେ ଝାରପଡ଼ା ସ୍ପେଶାଲ ଜେଲ୍‌ର ଢିଲା ସୁରକ୍ଷା ବ୍ୟବସ୍ଥାର ପୋଲ୍ ଖୋଲିଦେଲେ ୭ କଏଦୀ । ପ୍ରଶାସନର ବିନା ଅନୁମତିରେ ଜେଲ୍ ଭିତରକୁ ଛୁଞ୍ଚିଟିଏ ବି ଗଲିପାରିବ ନାହିଁ ବୋଲି ଡିଣ୍ଡିମ ପିଟୁଥିବା ଜେଲ୍ କର୍ତ୍ତୃପକ୍ଷଙ୍କ ସୁରକ୍ଷା ପ୍ରାଚୀର ଏବେ ଭୁଷୁଡ଼ି ପଡ଼ିଛି । ନିଶା ପାଇଁ କଫ୍ ସିରଫ୍ ଓ ମେଡିସିନ୍‌କୁ ମାଧ୍ୟମ କରି ଗୁରୁତର ହୋଇଛନ୍ତି ୭ ଅନ୍ତେବାସୀ ।

ଅଧିକ ପଢ଼ନ୍ତୁ: ଝାରପଡ଼ା ଜେଲ୍‌ରେ କଏଦୀ ଅସୁସ୍ଥ ଘଟଣା.: ଜେଲ୍‌ ହସ୍ପିଟାଲର ମେଡିସିନ୍ ଖାଇ କଏଦୀ ଅସୁସ୍ଥ ସୂଚନା

ଗତକାଲି ରାତିରେ ହଠାତ୍ ଅସୁସ୍ଥ ହେବା ପରେ ଗୁରୁତର ଅବସ୍ଥାରେ ସେମାନଙ୍କୁ କ୍ୟାପିଟାଲ ହସ୍ପିଟାଲ ଓ ଏମ୍ସରେ ଭର୍ତ୍ତି କରାଯାଇଛି । ୧୨ ଘଣ୍ଟା ପରେ କଏଦୀଙ୍କ ସ୍ୱାସ୍ଥ୍ୟାବସ୍ଥା ସିନା ସାମାନ୍ୟ ସୁଧୁରୁଛି, କିନ୍ତୁ ବିଗିଡ଼ି ଯାଇଛି ଜେଲ୍ ବିଭାଗର ଅବସ୍ଥା । ଚିକିତ୍ସା କରୁଥିବା ଡାକ୍ତରଙ୍କ ପ୍ରତିକ୍ରିୟା ଜେଲ୍ ପ୍ରଶାସନକୁ କାଠଗଡ଼ାକୁ ଟାଣି ଆଣିଛି ।
ଘଟଣାର ଗୁରୁତ୍ୱକୁ ଦେଖି ଗତକାଲି ରାତିରୁ ହିଁ ହସ୍ପିଟାଲ ପରିସରରେ ବ୍ୟାପକ ପୋଲିସ ଫୋର୍ସ ମୁତୟନ ହୋଇଛନ୍ତି । ଖୋଦ୍ ଭୁବନେଶ୍ୱର ଡିସିପି ମଧ୍ୟ ମେଡିକାଲରେ ପହଞ୍ଚି କଏଦୀଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ କରିଛନ୍ତି ।

ପ୍ରଥମେ ଏହା ଫୁଡ୍ ପଏଜନିଂ କିମ୍ବା ଏକ୍ସପାୟରୀ ମେଡିସିନ୍ ଖାଇବା ଯୋଗୁଁ ହୋଇଥିବା ସନ୍ଦେହ କରାଯାଉଥିଲା, ହେଲେ ଡାକ୍ତରଙ୍କ ବୟାନ ପରେ ସାରା କାହାଣୀରେ ଆସିଛି ନୂଆ ଟ୍ୱିଷ୍ଟ । ନିଶା ପାଇଁ କଫ୍ ସିରଫ୍ ନେବା ଘଟଣା ପଦାକୁ ଆସିବା ପରେ ଏବେ ବିଭାଗ ଭିତରେ ଆରମ୍ଭ ହୋଇଛି ଖୋଳତାଡ । ଆଜି ସକାଳୁ ଜେଲ୍ ଡିଆଇଜି ଝାରପଡ଼ା ଜେଲ୍‌ରେ ପହଞ୍ଚି ସିସିଟିଭି ଯାଞ୍ଚ କରିବା ସହ ୱାର୍ଡରେ ରହୁଥିବା ଅନ୍ତେବାସୀଙ୍କୁ ପଚରାଉଚରା କରି ସର୍‌ଜମିନ୍ ତଦନ୍ତ ଆରମ୍ଭ କରିଛନ୍ତି ।

ତେବେ କେଉଁ ପରିସ୍ଥିତିରେ ଏବଂ କାହା ମାଧ୍ୟମରେ ଜେଲ୍ ପରିସର ଭିତରକୁ ଏତେ ପରିମାଣର କଫ୍ ସିରଫ୍ କିମ୍ବା ମେଡିସିନ୍ ଗଲା, ତାହା ଏବେ ସବୁଠାରୁ ବଡ଼ ପ୍ରଶ୍ନ ?