Kanpur 16 rupees offer ruckus / ରାତି ଅଧିଆ ଅଫର ପାଇଁ ହୋଇଥିଲା ହଙ୍ଗାମା; ତତ୍କାଳ ଆରମ୍ଭ ହୋଇଗଲା ଆକ୍ସନ

Kanpur 16 minutes offer ruckus: ସୋସିଆଲ ମିଡି଼ଆରେ ଗ୍ରାହକଙ୍କ ଲାଗି ଦିଆଯାଇଥିବା ଏକ ଆକର୍ଷଣୀୟ ଅଫର ଦୋକାନୀଙ୍କ ପାଇଁ ସମସ୍ୟାର କାରଣ ପାଲଟିଛି। ନିକଟରେ କାନପୁର ସହରର ଅନୱରଗଞ୍ଜ ଥାନା ଅଞ୍ଚଳରେ ଅବସ୍ଥିତ ଆଲାମ ମାର୍କେଟ୍ ପକ୍ଷରୁ ଦିଆଯାଇଥିବା ୧୬ ଟଙ୍କାରେ ପୋଷାକ ବିକ୍ରି କରିବାର ଏକ ଜନ୍ମଦିନ ଅଫର ପାଇଁ ଏପରି ହଙ୍ଗାମା ସୃଷ୍ଟି ହୋଇଥିଲା। ଏହି ଅଫର ପାଇଁ ମଧ୍ୟରାତ୍ରିରେ ହଜାର ହଜାର ଲୋକ ରାସ୍ତାରେ ଜମା ହୋଇଥିଲେ। ଯାହା ଫଳରେ ଦଳାଚକଟା ଭଳି ପରିସ୍ଥିତି ସୃଷ୍ଟି ହୋଇଥିଲା। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ହସ୍ତକ୍ଷେପ କରିବାକୁ ବାଧ୍ୟ ହୋଇଥିଲା। ଏହି ଘଟଣାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରି ପୋଲିସ ଆଲାମ ମାର୍ଟ ପରିଚାଳକଙ୍କ ବିରୋଧରେ ଏକ ମାମଲା ରୁଜୁ କରିବା ସହ ଜଣେ ଅଭିଯୁକ୍ତଙ୍କୁ ଗିରଫ କରିଛି।

କ'ଣ ଥିଲା ଏହି ୧୬ ଟଙ୍କିଆ ଅଫର?
ଆଲାମ ମାର୍କେଟ୍ ର ଜଣେ କପଡ଼ା ବ୍ୟବସାୟୀ ରଇସ ଆଲାମଙ୍କ ଜନ୍ମଦିନ ଅଗଷ୍ଟ ୧୬ ତାରିଖରେ ଥିଲା। ତାଙ୍କ ଜନ୍ମଦିନକୁ ସ୍ୱତନ୍ତ୍ର କରିବା ପାଇଁ, ରଇସ ଆଲାମ ଇନଷ୍ଟାଗ୍ରାମ ଏବଂ ଫେସବୁକ ଭଳି ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ତାଙ୍କ ଦୋକାନ ଆଲାମ ମାର୍ଟ ପକ୍ଷରୁ ଦିଆଯାଇଥିବା ଏହି ବମ୍ପର ଅଫର ବିଷୟ ପ୍ରଚାର କରିଥିଲେ।

ମଧ୍ୟରାତ୍ରିରେ ଜମିଥିଲା ହଜାର ହଜାର ଲୋକଙ୍କ ଭିଡ଼; ଯାହାକୁ ନେଇ ସୃଷ୍ଟି ହୋଇଥିଲା ବିଶୃଙ୍ଖଳା ପରିସ୍ଥିତି
ଏହି ଅଫର ସମ୍ପର୍କିତ ଖବର ସୋସିଆଲ ମିଡି଼ଆରେ ନିଆଁ ପରି ବ୍ୟାପି ଯାଇଥିଲା। ଅଗଷ୍ଟ ୧୫ ତାରିଖ ରାତି ପ୍ରାୟ ଏଗାରଟା (11:00 PM) ପରେ ଆଲାମ ମାର୍ଟ ବାହାରେ ଲୋକଙ୍କ ଭିଡ଼ ଜମିବାକୁ ଲାଗିଲା। କିଛି ସମୟ ମଧ୍ୟରେ ହଜାର ହଜାର ଲୋକ ଏକାଠି ହୋଇ ସମଗ୍ର ରାସ୍ତା ଏବଂ ଛକରେ ଏକ ବିରାଟ ଟ୍ରାଫିକ ଜାମ୍ ସୃଷ୍ଟି କରିଲେ। ଦୋକାନ ମାଲିକ ବହୁ ସଂଖ୍ୟକ ଲୋକଙ୍କ ଭିଡ଼ ଦେଖିବା ପରେ ନିଜ ଦୋକାନ ବନ୍ଦ କରି ଦେଇଥିଲେ। ଭିଡ଼କୁ ପ୍ରବେଶ କରିବାରୁ ରୋକିବା ପାଇଁ ତାଙ୍କୁ ତାଙ୍କ ଦୋକାନ ବନ୍ଦ କରିବାକୁ ପଡ଼ିଥିଲା।

ଏହା ସହ ପଢନ୍ତୁ: ଲୁଡ଼ୋ ଖେଳିବାକୁ ନେଇ ମହାଭାରତ; ରାସ୍ତାରେ ମୁହାଁମୁହିଁ ହେଲେ ଦୁଇ ପକ୍ଷ, ମାମଲା ରୁଜୁ

ଯେତେବେଳେ ଲୋକ ଏହି ଅଫର ପ୍ରଦାନ କରିବାକୁ ନେଇ, ତାଙ୍କ ଦୋକାନ ବାହାରେ ପ୍ରତିବାଦ କରିବାକୁ ଲାଗିଲେ, ସେତେବେଳେ ଅଭିଯୋଗ ହୋଇଥିଲା ଯେ ଆଲମ ମାର୍ଟ ପରିଚାଳକ ମହମ୍ମଦ ଆଲାମ, ରଇସ ଆଲାମ, ସଲମାନ ଆଲାମ ଏବଂ ତାଙ୍କ କର୍ମଚାରୀ ଜମା ହୋଇଥିବା ଲୋକଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିଲେ। ଏପରିକି ସେମାନେ ଲୋକଙ୍କ ଉପରେ ଆକ୍ରମଣ କରିବା ସହ ହତ୍ୟା ଧମକ ଦେଇଥିଲେ। ଏହା ଦ୍ୱାରା ଭିଡ଼ ଆହୁରି ଉତ୍ତେଜିତ ହୋଇ ଉଠିଥିଲା। ଯାହା ଫଳରେ ଆଇନ ଶୃଙ୍ଖଳା ପରିସ୍ଥିତି ଉପୁଜିବା ସହ ଦଳାଚକଟା ଭଳି ପରିସ୍ଥିତି ସୃଷ୍ଟି ହୋଇଥିଲା। ଏହି ଘଟଣା ଘଟିବା ସମୟରେ, ଅନେକ ଲୋକ ତଳେ ପଡ଼ିଯାଇ ଆହତ ହୋଇଥିଲେ। ଏପରିକି ସେମାନଙ୍କ ଚପଲ ମଧ୍ୟ ଛାଡି ଦେଇଥିଲା।

ଇନ୍ସପେକ୍ଟରଙ୍କ ଅଭିଯୋଗ ଆଧାରରେ ଏଫଆଇଆର ଦାଖଲ, ଜଣେ ଅପରେଟର ଗିରଫ
ଅନୱରଗଞ୍ଜ ଥାନା ସବ-ଇନ୍ସପେକ୍ଟର ଏବଂ ତାଙ୍କ ଦଳକୁ ଯେତେବେଳେ ଏହି ଘଟଣା ସମ୍ପର୍କରେ ଖବର ମିଳିଲା ସେତେବେଳେ ସେମାନେ ତୁରନ୍ତ ଘଟଣାସ୍ଥଳରେ ପହଞ୍ଚିଲେ। ପରିସ୍ଥିତି ନିୟନ୍ତ୍ରଣ ବାହାରକୁ ଯାଉଥିବା ଦେଖି, ନିକଟବର୍ତ୍ତୀ ଥାନାରୁ ଅତିରିକ୍ତ ପୋଲିସ ଫୋର୍ସ ଡକାଯାଇଥିଲା। ଯଥେଷ୍ଟ ପ୍ରୟାସ ଏବଂ ଉପସ୍ଥିତ ବୁଦ୍ଧି ସହିତ ପୋଲିସ ଅନିୟନ୍ତ୍ରିତ ଭିଡ଼କୁ ଶାନ୍ତ କରିବାରେ ଏବଂ ସେମାନଙ୍କୁ ଘଉଡ଼ାଇବାରେ ସଫଳ ହୋଇଥିଲା।

୧୫-୧୬ ଅଗଷ୍ଟ ମଧ୍ୟରାତ୍ରୀରେ କର୍ତ୍ତବ୍ୟରତ ଜଣେ ଇନ୍ସପେକ୍ଟରଙ୍କ ଅଭିଯୋଗ ଆଧାରରେ, ଆଲାମ ମାର୍ଟ ଅପରେଟର ମହମ୍ମଦ ଆଲମ, ରଇସ ଆଲମ, ସଲମାନ ଆଲମ, ପୁତ୍ର-ଅବଦୁଲ ଖାଲିଦ ଏବଂ ଅନ୍ୟାନ୍ୟ ସହଯୋଗୀଙ୍କ ବିରୋଧରେ ଶାନ୍ତି ବ୍ୟବସ୍ଥା ଭଙ୍ଗ କରିବା, ଜନସାଧାରଣଙ୍କ ଜୀବନକୁ ବିପଦରେ ପକାଇବା ପାଇଁ ଏକ ମାମଲା ରୁଜୁ କରାଯାଇଛି। ଏହି ଘଟଣାରେ କାର୍ଯ୍ୟାନୁଷ୍ଠାନ ଗ୍ରହଣ କରି ପୋଲିସ ସଲମାନ ଆଲମକୁ ଗିରଫ କରିଛି। ଅନ୍ୟପଟେ ମୁଖ୍ୟ ଅଭିଯୁକ୍ତ ରଇସ ଆଲମ ଏବଂ ମହମ୍ମଦ ଆଲମଙ୍କୁ ଖୋଜି ବାହାର କରିବା ପାଇଁ ବିଭିନ୍ନ ସ୍ଥାନରେ ଚଢାଉ କରାଯାଉଛି।