Ketan Grandfather Death / ନାତି କେତନ ଗଲା; ପଛକୁ ପଛ ଜେଜେବାପା ବି ଗଲେ, କାନ୍ଦିକାନ୍ଦି ନାତି ପାଇଁ ଏମିତି କହିଥିଲେ

ମୁମ୍ବାଇ: ବହୁଚର୍ଚ୍ଚିତ କେତନ ଅଗ୍ରୱାଲଙ୍କ ମୃତ୍ୟୁରେ ପୂର୍ବରୁ ସ୍ତବ୍ଧ ଥିବା ଅଗ୍ରୱାଲ ପରିବାର ଉପରେ ଆଉ ଏକ ଦୁଃଖର ପାହାଡ଼ ଲଦି ହୋଇଯାଇଛି । କେତନଙ୍କ ମୃତ୍ୟୁର ୧୭ ଦିନ ପରେ ଜେଜେବାପା ଦେବୀଚାନ୍ଦ ଅଗ୍ରୱାଲଙ୍କ ଶନିବାର ରାତିରେ ପୁଣେର ଏକ ହସ୍ପିଟାଲରେ ଦେହାନ୍ତ ଘଟିଛି । ନାତିର ମୃତ୍ୟୁକୁ ସହ୍ୟ କରିପାରି ନଥିଲେ ଦେବୀଚାନ୍ଦ । କେତନଙ୍କ ମୃତ୍ୟୁ ପରେ ସେ ସମ୍ପୂର୍ଣ୍ଣ ଭାଙ୍ଗିପଡ଼ିଥିଲେ । ଶେଷରେ ହୃଦଘାତ ଯୋଗୁଁ ତାଙ୍କର ମୃତ୍ୟୁ ଘଟିଛି ।

ପରିବାର ସଦସ୍ୟଙ୍କ ଅନୁଯାୟୀ, କେତନଙ୍କ ମୃତ୍ୟୁ ପରେ ଦେବୀଚାନ୍ଦ ଅଗ୍ରୱାଲଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ଏବଂ ତାଙ୍କ ସ୍ୱାସ୍ଥ୍ୟାବସ୍ଥା ଆହୁରି ଖରାପ ହୋଇଯାଇଥିଲା । ଶନିବାର ରାତି ୯.୪୫ଟାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତାଙ୍କୁ ମୃତ୍ୟୁ ବେଳକୁ ୭୧ ବର୍ଷ ବୟସ ହୋଇଥିଲା । ନାତି କେତନକୁ ବେଶ ଭଲ ପାଉଥିଲେ ଜେଜେବାପା ଓ ତାଙ୍କର ବିବାହକୁ ନେଇ ମଧ୍ୟ ବେଶ ଖୁସି ଥିଲେ । ଶେଷରେ ପିଲାଠୁ ବଡ଼ କରିଥିବା ଗେହ୍ଲାର ନାତି ଚାଲିଯିବା ତାଙ୍କୁ ବେଶ ଆଘାତ ଦେଇଥିଲା ।

• କେତନଙ୍କ ମୃତ୍ୟୁ ପରେ ଭାଙ୍ଗିପଡ଼ିଥିଲେ

ପରିବାର ପକ୍ଷରୁ କୁହାଯାଇଛି ଯେ ଦେବୀଚାନ୍ଦ ତାଙ୍କ ନାତିର ମୃତ୍ୟୁରେ ଗଭୀର ମର୍ମାହତ ହୋଇଥିଲେ ଏବଂ ସେବେଠାରୁ ସେ ମାନସିକ ଭାବରେ ବିଚଳିତ ହୋଇପଡ଼ିଥିଲେ । ସେମାନେ ବିଶ୍ୱାସ କରନ୍ତି ଯେ ଏହି ଆଘାତ ଏବଂ ଦୁଃଖ ତାଙ୍କ ସ୍ୱାସ୍ଥ୍ୟ ଉପରେ ଭୟଙ୍କର ପ୍ରଭାବ ପକାଇଥିଲା । ତାଙ୍କ ସ୍ଵାସ୍ଥ୍ୟ ଆହୁରି ବିଗିଡ଼ି ଯାଇଥିଲା ।

ଅସୁସ୍ଥତା ସତ୍ତ୍ୱେ, ଦେବୀଚାନ୍ଦ ଅଗ୍ରୱାଲ ଜୁନ ୨୭ ତାରିଖରେ ତାଙ୍କ ହାଉସିଂ ସୋସାଇଟିରେ ଆୟୋଜିତ ଏକ ମହମବତୀ ଶୋଭାଯାତ୍ରାରେ ଅଂଶଗ୍ରହଣ କରିଥିଲେ । ମୃତ୍ୟୁର କିଛି ଦିନ ପୂର୍ବରୁ ଦେବୀଚାନ୍ଦ ଅଗ୍ରୱାଲ ତାଙ୍କ ନାତି ପାଇଁ ନ୍ୟାୟ ପାଇଁ ଏକ ଭାବପ୍ରବଣ ନିବେଦନ କରିଥିଲେ । ମିଡିଆ ଆଗରେ ନ୍ୟାୟ ଭିକ୍ଷା କରି ସେ କାନ୍ଦି ପକାଇଥିଲେ । ଲୁହକୁ ଚାପି ରଖି ସେ ଦାବି କଲେ, "ସିଆ ଏବଂ ଚେତନକୁ ମୃତ୍ୟୁଦଣ୍ଡ ଦିଆଯିବା ଉଚିତ ।" ନାତି କେତନକୁ ମନେ ପକାଇ ସେ କହିଲେଥି, "ବୃଦ୍ଧ ଅବସ୍ଥାରେ ମୋର ସାହାରା ଚାଲିଗଲା।"

ପଢନ୍ତୁ ଏହି ଖବର: ୧୧ ବର୍ଷ, ୩ ପୁରୁଷ, ରକ୍ତାକ୍ତ ଅନ୍ତ...ଏମିତି ଜୀବନ କାହିଁକି ଜିଉଁଥିଲେ ଆରତୀ ?

କେତନଙ୍କ ଭାବି ପତ୍ନୀ ତଥା ଅଭିଯୁକ୍ତା ସିଆଙ୍କ ପରିବାର ସହିତ ତାଙ୍କ ପରିବାରର ଦୀର୍ଘ ସମ୍ପର୍କକୁ ମନେ ପକାଇ ଦେବୀଚାନ୍ଦ କହିଥିଲେ, "ଆମେ ଝିଅର ପରିବାରକୁ ୩୫ ବର୍ଷ ଧରି ଜାଣିଥିଲୁ । ତାଙ୍କ ପରିବାର ଜାଣିଥିଲେ ଯେ ସେମାନଙ୍କ ଝିଅ ଅନ୍ୟ କାହାକୁ ଭଲ ପାଉଛି । ତାଙ୍କ ମାଉସୀ ଏବଂ ମାମୁଁ ଆମକୁ ବିବାହ ପାଇଁ ଚାପ ପକାଇଥିଲେ । ସେମାନେ ମୋତେ ବାରମ୍ବାର କହିଥିଲେ ଯେ ଚିନ୍ତା ଆଦୌ କରନାହିଁ, ସିଆ ଜଣେ ଭଲ ଝିଅ ।"

• କେମିତି ଘଟିଲା କେତନଙ୍କ ମୃତ୍ୟୁ ?

୨୬ ବର୍ଷୀୟ କେତନ ଅଗ୍ରୱାଲ ତାଙ୍କ ଭାବି ପତ୍ନୀ ସିଆ ଗୋଏଲଙ୍କ ସହ ପର୍ଯ୍ୟଟକ ଏବଂ ଟ୍ରେକରମାନଙ୍କ ମଧ୍ୟରେ ପ୍ରସିଦ୍ଧ ତଥା ମନୋରମ ସ୍ଥାନ ଲୋହାଗଡ ଦୁର୍ଗ ପରିଦର୍ଶନ କରିବାକୁ ଯାଇଥିଲେ । ଏହି ସମୟରେ ସେ ଏକ ଖାଲରେ ପଡ଼ିଯାଇଥିଲେ । କିନ୍ତୁ କିଛି ଦିନ ପରେ, ପୋଲିସ କେତନଙ୍କ ଭାବି ପତ୍ନୀ ୨୦ ବର୍ଷୀୟ ସିଆ ଏବଂ ତାଙ୍କ ପୁରୁଷ ବନ୍ଧୁ ଚେତନ ଚୌଧୁରୀ (୨୨)ଙ୍କୁ ଗିରଫ କରିଥିଲା । ସେମାନେ କେତନଙ୍କୁ ପାହାଡ଼ ଉପରୁ ଠେଲି ହତ୍ୟା କରିଥିବା ଜଣାପଡ଼ିଥିଲା ।