ରାଜଧାନୀ ଉପକଣ୍ଠ କୋଳଥିଆ ଡବଲ ମର୍ଡର ଘଟଣା । ଏହି ହତ୍ୟାକାଣ୍ଡକୁ ନେଇ ପ୍ରେସମିଟ୍‌ରେ ବଡ଼ ଖୁଲାସା କରିଛନ୍ତି ପୋଲିସ୍ କମିଶନର ଏସ୍‌.ଦେବଦତ୍ତ ସିଂ । ଡବଲ ମର୍ଡର ପଛରେ ରହିଛନ୍ତି ଦୁଇ ଜଣ ସ୍କୁଲ ଛାତ୍ର । ଏହି ଘଟଣାରେ ଦୁଇ ଜଣଙ୍କୁ ଗିରଫ କରାଯାଇଥିବା ବେଳେ ସେମାନେ ନାବାଳକ ଥିବାରୁ ସେମାନଙ୍କ ବିରୋଧରେ ଜୁଭେନାଲ କେସ୍ ରୁଜୁ କରାଯାଇଛି ।

ମୃତ କୃଷ୍ଣ ପାଢୀ ଏକ ଘରୋଇ କଲେଜରେ ପଢ଼ୁଥିବା ବେଳେ ଜଣେ ଯୁବତୀଙ୍କୁ ବାରମ୍ବାର ପ୍ରେମ ନିବେଦନ କରୁଥିଲେ । ଯୁବତୀ ଜଣକ ମନା କରିବା ସତ୍ତ୍ୱେ କୃଷ୍ଣ ତାଙ୍କୁ ହଇରାଣ କରୁଥିଲେ । ଏ ବିଷୟରେ ଯୁବତୀ ଜଣକ ନିଜ ଭାଇଙ୍କୁ ଜଣାଇଥିଲେ । ଯୁବତୀଙ୍କ ଭାଇ ନିଜ ସାଙ୍ଗ ସହିତ ମିଶି ପ୍ରାୟ ୨୦ ଦିନ ତଳେ କୃଷ୍ଣଙ୍କୁ ଡାକି ଏନେଇ ବୁଝାଇବାକୁ ଚେଷ୍ଟା କରିଥିଲେ । ମାତ୍ର ସେହି ସମୟରେ କୃଷ୍ଣ ଏବଂ ଦୁଇ ନାବାଳକଙ୍କ ମଧ୍ୟରେ ପ୍ରବଳ ଝଗଡ଼ା ହୋଇଥିଲା । ଏପରିକି କୃଷ୍ଣ ରାଗିଯାଇ ଯୁବତୀଙ୍କ ଭାଇର କଲର ଧରି ଗାଳିଗୁଲଜ କରିଥିଲେ ।

ଅଧିକ ପଢ଼ନ୍ତୁ: ସ୍କୁଲ୍ ଛାତ୍ରୀଙ୍କ ଉପରେ ଢାଳି ଦେଲା ପେଟ୍ରୋଲ୍; ନିଆଁ ଲଗାଇବା ପୂର୍ବରୁ ଧରି ଛେଚିଲେ ଲୋକେ

ଏହି ଅପମାନକୁ ସହ୍ୟ ନକରି ଯୁବତୀଙ୍କ ଭାଇ ପ୍ରତିଶୋଧ ପରାୟଣ ହୋଇଯାଇଥିଲେ । ଗତ ରବିବାର ରାତିରେ ଦୁଇ ନାବାଳକ ଯୋଜନାବଦ୍ଧ ଭାବେ କୃଷ୍ଣଙ୍କୁ ମରଣାତ୍ମକ ଆକ୍ରମଣ କରିଥିଲେ । ହତ୍ୟାକାଣ୍ଡ ସମୟରେ ଅଭିଯୁକ୍ତମାନେ ଲଙ୍କାଗୁଣ୍ଡ ଏବଂ ଲୁହା ରଡ୍‌ର ବ୍ୟବହାର କରିଥିଲେ । କୃଷ୍ଣଙ୍କୁ ଅତି ବୀଭତ୍ସ ଭାବେ ପିଟିପିଟି ହତ୍ୟା କରାଯାଇଥିଲା । ଏହି ସମୟରେ କୃଷ୍ଣଙ୍କ ବାପା ତାଙ୍କୁ ବଞ୍ଚାଇବାକୁ ଆସିଥିବା ବେଳେ ଦୁଇ ନାବାଳକ ତାଙ୍କୁ ମଧ୍ୟ ମରଣାନ୍ତକ ଆକ୍ରମଣ କରିଥିଲେ । ଯେଉଁଥିରେ ସେ ମଧ୍ୟ ପ୍ରାଣ ହରାଇଛନ୍ତି ।