UP police blame monkeys for gold theft: ଉତ୍ତର ପ୍ରଦେଶର ଲଖିମପୁର ଖେରି ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଦଳେ ମାଙ୍କଡ଼ ପୋଲିସ ଗୋଦାମରୁ ଲକ୍ଷ ଲକ୍ଷ ଟଙ୍କାର ଅଳଙ୍କାର ଚୋରି କରି ନେଇଛନ୍ତି। ଏହି ଘଟଣା ସମ୍ପର୍କରେ ଖେରୀ ସଦର ପୋଲିସ ଗତ ୨୦୨୪ରେ ଜିଲ୍ଲା ଏବଂ ସେସନ୍ସ କୋର୍ଟ୍ କୁ ଜଣାଇଥିଲା। ଏହି ରିପୋର୍ଟ ଗତ ୨୦୧୩ ରେ ଥାନାରେ ରେକର୍ଡ଼ ହୋଇଥିବା ଷ୍ଟେସନ୍ ଡାଏରୀ ତଥ୍ୟକୁ ଆଧାର କରି ଦେଇଥିଲ। ରିପୋର୍ଟ ହୋଇଥିଲା ଯେ ଜଣେ ମହିଳାଙ୍କ ପୋଷ୍ଟମର୍ଟମ ପରେ ଗତ ୨୦୦୭ରୁ ପୋଲିସ ଗାଦାମରେ ସୁରକ୍ଷିତ ହେପାଜତରେ ରଖାଯାଇଥିବା ଲକ୍ଷ ଲକ୍ଷ ଟଙ୍କାର ସୁନା ଅଳଙ୍କାର ପ୍ରବଳ ବର୍ଷାରେ କ୍ଷତିଗ୍ରସ୍ତ ହୋଇଥିଲା। ଏହା ପରେ ଏକ ମାଙ୍କଡ଼ ଗୋଷ୍ଠୀ ଏହାକୁ ଦ୍ୱାରା ଚୋରି କରି ନେଇଥିଲେ। ହେଲେ ଜିଲ୍ଲା ଏବଂ ସେସନ୍ସ କୋର୍ଟ ଖେରୀ ପୋଲିସ ଦ୍ୱାରା ଦିଆଯାଇଥିବା ଏହି ଅଜବ ଯୁକ୍ତିକୁ ଗ୍ରହଣ କରିବାକୁ ମନା କରିଦେଇଥିଲା।

ଜିଲ୍ଲା ଏବଂ ସେସନ୍ସ କୋର୍ଟ, ୨୦୨୪ ଜୁଲାଇ ୨୬ ତାରିଖରେ ତାଙ୍କର ଆଦେଶ ମାଧ୍ୟମରେ, ଏହି ଚୋରି ପାଇଁ ଦାୟୀ ପୋଲିସ କର୍ମଚାରୀଙ୍କୁ ଚିହ୍ନଟ କରିବା, ଉପଯୁକ୍ତ ବିଭାଗୀୟ ଏବଂ ଫୌଜଦାରୀ କାର୍ଯ୍ୟାନୁଷ୍ଠାନ ସୁନିଶ୍ଚିତ କରିବା ଏବଂ ଆବେଦନକାରୀଙ୍କୁ ହୋଇଥିବା କ୍ଷତି ପାଇଁ କ୍ଷତିପୂରଣ ଦେବାକୁ ତତ୍କାଳୀନ ଖେରୀ ପୋଲିସ ଏସପିଙ୍କୁ ନିର୍ଦ୍ଦେଶ ଦେଇଥିଲେ। ହେଲେ ତଥାପି, କୋର୍ଟ ଆଦେଶ ଦେବାର ପ୍ରାୟ ୨ ବର୍ଷ ପରେ ଅଭିଯୋଗକାରୀ ମୁଦିତ କୁମାର ଅଗ୍ରୱାଲ ତାଙ୍କ ସ୍ୱର୍ଗତ ପତ୍ନୀ ଆଭା ରାଣୀ ଓରଫ ଜୁଲି ଅଗ୍ରୱାଲଙ୍କ ସମ୍ପତ୍ତି ପାଇବାକୁ ଅପେକ୍ଷା କରିଛନ୍ତି।

ଘଟଣାକୁ ନେଇ କ'ଣ କହିଲା ପୋଲିସ?
ଏହି ଘଟଣାରେ ପ୍ରତିକ୍ରିୟା ରଖି ଖେରୀ ଏସଏସପି ଡକ୍ଟର ଖ୍ୟାତି ଗର୍ଗ କହିଛନ୍ତି ଯେ ୨୦୨୪ ଜୁଲାଇ ୨୬ ତାରିଖରେ କୋର୍ଟ ଆଦେଶ ପରେ, ୨୦୨୫ ମେ ୨୮ ତାରିଖରେ ଭାରତୀୟ ଦଣ୍ଡ ସଂହିତା ଧାରା ୪୦୯ ଅନୁଯାୟୀ ତତ୍କାଳୀନ ମୁଖ୍ୟ କିରାଣୀଙ୍କ ବିରୋଧରେ ଏକ ଫୌଜଦାରୀ ମାମଲା ରୁଜୁ କରାଯାଇଥିଲା। ସେ ଆହୁରି କହିଛନ୍ତି, ସଦର ମାଲଖାନାରୁ ହଜିଯାଇଥିବା ଅଳଙ୍କାର ସମ୍ପର୍କରେ ସବ-ଇନ୍ସପେକ୍ଟର ଅରବିନ୍ଦ କୁମାର ତିୱାରୀଙ୍କ ଦ୍ୱାରା କରାଯାଇଥିବା ଏଫଆଇଆର ତଦନ୍ତରୁ ଏହା ଜଣାପଡିଛି ଯେ ସୁନା ଗତ ୨୦୦୭ ରେ ହୋଇଥିବା ଏକ ପୋଷ୍ଟମର୍ଟମ୍ ସହିତ ଜଡ଼ିତ ଥିଲା।

ଏହା ସହ ପଢନ୍ତୁ: ଚାଷୀଙ୍କୁ ମିଳିଲା ଆୟକର ନୋଟିସ; ଜିଲ୍ଲାପାଳ ଦେଲେ ଯାଞ୍ଚ ନିର୍ଦ୍ଦେଶ

କୋର୍ଟରେ ଚୂଡ଼ାନ୍ତ ରିପୋର୍ଟ ଦାଖଲ କରିବା ପରେ ମାମଲା ବନ୍ଦ
ସେ କହିଛନ୍ତି ଯେ ତଦନ୍ତରେ ନିଶ୍ଚିତ ଭାବରେ ପ୍ରମାଣିତ ହୋଇଛି ଯେ ପୂର୍ବତନ ମୁଖ୍ୟ କିରାଣୀ ଚନ୍ଦ୍ରିକା ପ୍ରସାଦ ଏବଂ ରାମବଖ୍ସ ପାଲଙ୍କ କାର୍ଯ୍ୟକାଳ ସମୟରେ ସମ୍ପତ୍ତି ଗାଏବ ହୋଇଥିଲା। ସେ କହିଛନ୍ତି ଯେ ଉଭୟ କିରାଣୀଙ୍କ ମୃତ୍ୟୁ ହୋଇଥିବାରୁ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇ ପାରିବ ନାହିଁ। ଆଇନଗତ ପ୍ରକ୍ରିୟା ପରେ ଚୂଡ଼ାନ୍ତ ରିପୋର୍ଟ କୋର୍ଟରେ ଦାଖଲ କରାଯିବା ସହ ଏହି ମାମଲା ବନ୍ଦ କରାଯାଇଛି।

ଅଭିଯୋଗକାରୀ ମୁଦିତ କୁମାର ଅଗ୍ରୱାଲଙ୍କ ପ୍ରତିନିଧିତ୍ୱ କରୁଥିବା ଓକିଲ ଶୈଳେନ୍ଦ୍ର ସିଂହ ଗୌରଙ୍କ ଅନୁଯାୟୀ, ମୁଦିତଙ୍କ ପତ୍ନୀ ଆଭା ରାଣୀ ଓରଫ ଜୁଲି ଅଗ୍ରୱାଲଙ୍କ ଗତ ୨୦୦୭ ଦୀପାବଳି ରାତିରେ ମୃତ୍ୟୁ ହୋଇଥିଲା। ମୃତକଙ୍କ ପିତାମାତା ମୁଦିତ ଏବଂ ତାଙ୍କ ପରିବାର ସଦସ୍ୟଙ୍କ ବିରୋଧରେ ଯୌତୁକ ମାମଲା ଦାୟର କରିଥିଲେ। ଗତ ୨୦୦୭ରେ ହୋଇଥିବା ପୋଷ୍ଟମର୍ଟମ୍ ସମୟରେ ଡାକ୍ତର ମୃତକଙ୍କ ଶରୀରରୁ ମିଳିଥିବା ସୁନା ଅଳଙ୍କାରଙ୍କୁ ମୁଖ୍ୟ କିରାଣୀଙ୍କୁ ଦେଇଥିଲେ। ଯାହାକୁ ସଦର ଥାନାରେ ପୋଲିସ ହେପାଜତରେ ରଖାଯାଇଥିଲା।

୨୦୨୪ ରେ ସାମ୍ନାକୁ ଆସିଥିଲା ଏହି ଘଟଣା
ଓକିଲ ଶୈଳେନ୍ଦ୍ର ସିଂହ ଗୌର କହିଛନ୍ତି ଯେ ୨୦୦୭ ରେ ଜାମିନ ପାଇବା ପରେ, ମୁଦିତ କୁମାର ଅଗ୍ରୱାଲ ୨୦୨୪ ରେ ଜିଲ୍ଲା ଏବଂ ସେସନ୍ସ କୋର୍ଟରେ ଏକ ଆବେଦନ ଦାଖଲ କରିଥିଲେ। ଯେଉଁଥିରେ ତାଙ୍କ ପତ୍ନୀ ଆଭା ରାଣୀ ଓରଫ ଜୁଲି ଅଗ୍ରୱାଲଙ୍କ ଶରୀରରୁ ଉଦ୍ଧାର ହୋଇଥିବା ସୁନା ଅଳଙ୍କାରକୁ ଫେରାଇ ଦେବାକୁ ଅନୁରୋଧ କରାଯାଇଥିଲା। ଏହି ସମୟରେ ବର୍ଷାରେ ସୁନା ଅଳଙ୍କାର କ୍ଷତିଗ୍ରସ୍ତ ହେବା ଏବଂ ପରେ ମାଙ୍କଡ଼ ଏହାକୁ ଚୋରି କରି ନେଇଯିବାର ଏକ ଅଜବ ଘଟଣା ସାମ୍ନାକୁ ଆସିଥିଲା।

୨୦୨୪ ଜୁଲାଇ ୨୬ ତାରିଖର କୋର୍ଟ ଆଦେଶ ଅନୁଯାୟୀ, ସଦର ପୋଲିସ ୨୦୨୪ ଜୁଲାଇ ୧୦ ତାରିଖରେ ଏକ ରିପୋର୍ଟ ଦାଖଲ କରିଥିଲା। ଯେଉଁଥିରେ ଅଧିକାରୀ ଗତ ୨୦୧୩ ରେ ଥାନାରେ ରେକର୍ଡ଼ ହୋଇଥିବା ଷ୍ଟେସନ୍ ଡାଏରୀ ତଥ୍ୟକୁ ଆଧାର କରି ଦେଇଥିଲ। ଯେଉଁଥିରେ କୁହାଯାଇଥିଲା ଯେ ଯେତେବେଳେ ସୁନା ରଖାଯାଇଥିବା ବଣ୍ଡଲକୁ ଶୁଖିବା ପାଇଁ ଛାଡି ଦିଆଯାଇଥିଲା, ସେତେବେଳେ ବର୍ଷାରେ ଅଳଙ୍କାର କ୍ଷତିଗ୍ରସ୍ତ ହୋଇଥିଲା। ପରେ ଏହାକୁ ମାଙ୍କଡ଼ ଚୋରି କରି ନେଇଥିଲେ।

ଏହି ପୋଲିସ ରିପୋର୍ଟକୁ ଅଯୌକ୍ତିକ ବୋଲି କହି ଜିଲ୍ଲା ଏବଂ ସେସନ୍ସ ଜଜ୍ ସମ୍ପୃକ୍ତ ପୋଲିସ କର୍ମଚାରୀଙ୍କୁ ଚିହ୍ନଟ କରିବା, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଏବଂ ଅଭିଯୋଗକାରୀଙ୍କୁ କ୍ଷତିପୂରଣ ଦେବାକୁ ୨୦୨୪ ଜୁଲାଇ ୨୬ ତାରିଖରେ ନିର୍ଦ୍ଦେଶ ଦେଇଥିଲେ। ଅଭିଯୋଗକାରୀଙ୍କ ଓକିଲ ଶୈଳେନ୍ଦ୍ର ସିଂହ ଗୌର କହିଛନ୍ତି ଯେ ତାଙ୍କ ମହକିଲ ଏହି ସମ୍ବନ୍ଧରେ ଆଶ୍ୱସ୍ତି ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହେବେ। କାରଣ ଅନେକ ଆବେଦନ ଦାଖଲ କରିବା ସତ୍ତ୍ୱେ ସେ ତାଙ୍କର ଚୋରି ହୋଇଥିବା ସମ୍ପତ୍ତି ପାଇ ନାହାଁନ୍ତି।