Pregnant Woman Burnt Alive / ଗର୍ଭବତୀ ମହିଳାଙ୍କୁ ମାଡ଼ ମାରିଲେ; ବେହୋସ୍ ଅବସ୍ଥାରେ ମୃତ ଭାବି ଜାଳିଦେଲେ

ମୁମ୍ବାଇ: ମହାରାଷ୍ଟ୍ରର ଧୂଲେ ଜିଲ୍ଲାରେ ଏକ ଭୟଙ୍କର ଘଟଣା ସାମ୍ନାକୁ ଆସିଛି, ଯେଉଁଠାରେ ଜଣେ ଗର୍ଭବତୀ ମହିଳାଙ୍କୁ ବିବାଦ ସମୟରେ ଆକ୍ରମଣ କରାଯାଇଥିଲା । ଝଗଡ଼ା ସମୟରେ ସେ ଅଚେତ ହୋଇଯାଇଥିଲେ ଏବଂ ଅଭିଯୁକ୍ତମାନେ ତାଙ୍କୁ ମୃତ ଭାବି ଏକ ନିର୍ଜନ ପାହାଡ଼କୁ ନେଇଯାଇ ପ୍ରମାଣ ନଷ୍ଟ କରିବା ପାଇଁ ଜୀଅନ୍ତା ଜାଳି ଦେଇଥିଲେ । ଏହି ଘଟଣାରେ ପୋଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ।  ବିବାଦର ପ୍ରକୃତ କାରଣ କଣ ଥିଲା ଓ ଏମିତି କଣ ପରିସ୍ଥିତି ଆସିଲା ଯେ ଅଭିଯୁକ୍ତମାନେ ଗର୍ଭବତୀଙ୍କୁ ମାଡ଼ ମାରିବାକୁ ପଛାଇଲେ ନାହିଁ, ସେସବୁକୁ ବିଚାରକୁ ନେଇ ଘଟଣାର ଅଧିକ ତଦନ୍ତ ଜାରି ରଖିଛି ପୋଲିସ । 

• ନିର୍ଜନ ଜଙ୍ଗଲକୁ ନେଇ ଜାଳିଦେଲେ

ପ୍ରାୟ ୧୧ ଘଣ୍ଟାର ସିସିଟିଭି ଫୁଟେଜ୍ ଏବଂ ବୈଷୟିକ ତଦନ୍ତ ଯାଞ୍ଚ କରିବା ପରେ ପୋଲିସ ଏହି ଜଘନ୍ୟ ହତ୍ୟା ମାମଲାର ସମାଧାନ କରିଛି । ଏହି ଘଟଣାରେ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଛି, ଯେତେବେଳେ ଅନ୍ୟ ଦୁଇଜଣ ଫେରାର ଅଛନ୍ତି । ସେମାନଙ୍କୁ ଖୋଜା ଚାଲିଛି । ଫୁଟେଜ୍ ଏବଂ ବୈଷୟିକ ବିଶ୍ଳେଷଣ ମାଧ୍ୟମରେ ହିଁ ପୋଲିସ ସନ୍ଦେହଜନକ ଗାଡ଼ିଟିକୁ ଅହଲ୍ୟାନଗର ଜିଲ୍ଲାର ଜାମଖେଦ ଅଞ୍ଚଳରେ ଅବସ୍ଥିତ ସପ୍ତସୁର ସାଂସ୍କୃତିକ କଳା କେନ୍ଦ୍ରରୁ ଠାବ କରିଥିଲା ।

• କାହିଁକି ଗର୍ଭବତୀ ମହିଳାଙ୍କୁ ଆକ୍ରମଣ ?

ତଦନ୍ତରୁ ଜଣାପଡିଛି ଯେ ବୀଡ ଜିଲ୍ଲା ନିକଟସ୍ଥ ଏକ ସାଂସ୍କୃତିକ କେନ୍ଦ୍ରରେ ଏକ ଆଭ୍ୟନ୍ତରୀଣ ବିବାଦକୁ ନେଇ ଜଣେ ୩୧ ବର୍ଷୀୟ ଗର୍ଭବତୀ ମହିଳା ପିଙ୍କି ହନୁମନ୍ତ କାଟକାଙ୍କ ଉପରେ ଆକ୍ରମଣ କରାଯାଇଥିଲା । ଆକ୍ରମଣ ସମୟରେ ସେ ଚେତାଶୂନ୍ୟ ହୋଇଯିବା ପରେ ତାଙ୍କର ମୃତ୍ୟୁ ହୋଇଯାଇଥିବା ଅଭିଯୁକ୍ତମାନେ ଭାବିଥିଲେ ଏବଂ ତା'ପରେ ମୃତଦେହକୁ ଫିଙ୍ଗି ଦେବାକୁ ଷଡ଼ଯନ୍ତ୍ର କରାଯାଇଥିଲା ।

ପଢନ୍ତୁ ଏହି ଖବର: ଯୁବକଙ୍କୁ ତାଲିବାନୀ ଦଣ୍ଡ; ମୁଣ୍ଡ ଲଣ୍ଡା କରି ମୂତ୍ର ପିଆଇଲେ, ଏହା ଥିଲା କାରଣ

ଅଭିଯୁକ୍ତମାନେ ଅଚେତ ମହିଳାଙ୍କୁ ମୃତ ଭାବି ପ୍ରମାଣ ନଷ୍ଟ କରିବାକୁ ଚାହୁଁଥିଲେ ଏବଂ ତାଙ୍କୁ ୨୭୫ କିଲୋମିଟର ଦୂର ଧୂଲେ-ସୋଲାପୁର ରାଜପଥ ନିକଟସ୍ଥ ଏକ ନିର୍ଜନ ପାହାଡିଆ ଅଞ୍ଚଳକୁ ନେଇ ଯାଇଥିଲେ । ସେଠାରେ ସେମାନେ ତାଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ । ଏହି ପୂରା ଘଟଣା ସାମ୍ନାକୁ ଆସିବା ପରେ ସମସ୍ତଙ୍କୁ ଦୋହଲାଇ ଦେଇଛି । କାରଣ ଏକାବେଳେ ମଣିଷ ରୂପୀ ରାକ୍ଷସମାନେ ଦୁଇ ଦୁଇଟା ଜୀବନ ନେଇଛନ୍ତି । ଗର୍ଭବତୀଙ୍କୁ ମାଡ଼ ମାରିବା ବେଳେ ସେମାନେ ଗର୍ଭରେ ଥିବା ନିଷ୍ପାପ ଶିଶୁ ସମ୍ପର୍କରେ ମଧ୍ୟ ତିଳେ ଚିନ୍ତା କରିନଥିଲେ । ଶେଷରେ ଗର୍ଭବତୀ ମହିଳାଙ୍କୁ ନିର୍ମମ ଭାବେ ପିଟିବା ପରେ ତାଙ୍କୁ ଜୀଅନ୍ତା ଜାଳିଥିଲେ ।