iPhone Mass Death / ଆଇଫୋନ ପାଇଁ ଆତ୍ମହତ୍ୟା ଘଟଣା; ଫୋନ ନୁହଁ ଥିଲା ଅନେକ କିଛି କାରଣ, ପଡ଼ୋଶୀ କହିଦେଲେ

ମୁମ୍ବାଇ: ଆଇଫୋନ ପାଇଁ ଜିଦି କରି ଗୋଟିଏ ପୁଅଟିଏ ପାହାଡ଼ ପାଖରେ ଠିଆ ହୋଇଛି ଓ କିଛି ସମୟ ପରେ ପୂରା ପରିବାର ନିଶ୍ଚିହ୍ନ ହୋଇଯାଉଛି । ଏହି ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେଉଛି । ସାମାନ୍ୟ ଫୋନଟିଏ ପାଇଁ ଜୀବନ ହାରିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । କିନ୍ତୁ ଏବେ ପ୍ରକୃତ ଘଟଣା ସାମ୍ନାକୁ ଆସିଛି । ମୃତ ପରିବାରର ଜଣେ ପଡ଼ୋଶୀ କହିଛନ୍ତି ଯେ ଖାଲି ଆଇଫୋନ ନୁହଁ, ଏହା ପଛରେ ଅନେକ କାରଣ ରହିଛି ।

ଏହି ଘଟଣା ଭାଇରାଲ ହେବାପରେ ଅନେକ ୟୁଜର ପୁଅଟିକୁ ଦୋଷୀ ବୋଲି କହୁଥିବାବେଳେ ଅନ୍ୟ କିଛି ୟୁଜର ପିତାମାତାଙ୍କ ଲାଳନପାଳନ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି । ପାହାଡ଼ ଧାରରେ ପୁଅ ଠିଆ ହୋଇଥିବାବେଳେ ବାପା ତାକୁ ବୁଝାଇବାକୁ ପାଖକୁ ଆସୁଛନ୍ତି ଓ ଭାରସାମ୍ୟ ହରାଇ ଦୁଇ ଜଣ ଉଚ୍ଚ ପାହାଡ଼ରୁ ତଳକୁ ଖସିପଡୁଛନ୍ତି । ସେପଟେ ପୁଅ, ସ୍ଵାମୀର ଏପରି ଅବସ୍ଥା ଦେଖି ମହିଳା ଜଣକ ମଧ୍ୟ ଡେଇଁ ପଡୁଛନ୍ତି । ଏହି ଘଟଣାଟି ଗତ କିଛି ଦିନ ହେଲା ସମସ୍ତଙ୍କୁ ଚକିତ କରିଦେଇଛି । ଏବେ ମୁହଁ ଖୋଲିଛନ୍ତି ମୃତ ପରିବାରଙ୍କ ପଡ଼ୋଶୀ ।

• କଣ କହିଲେ ପଡ଼ୋଶୀ ?

ମୃତ ପରିବାର ସମ୍ଭାଜୀନଗର ଜିଲ୍ଲାର ଅଧିବାସୀ ଥିଲେ । ଯେତେବେଳେ ଗଣମାଧ୍ୟମ ପ୍ରତିନିଧି ଏହି ଘଟଣା ସମ୍ପର୍କରେ ପଡ଼ୋଶୀ ଓ ପୋଲିସ ସହିତ କଥାବାର୍ତ୍ତା କରିଥିଲେ, ଅନେକ କଥା ସାମ୍ନାକୁ ଆସିଛି । ସମ୍ଭାଜିନଗର ୱାଲୁଜ ଅଞ୍ଚଳର ଖବଡ୍ୟା ପାହାଡ଼ରୁ ଡେଇଁଥିବା ଏହି ପରିବାର ମଧ୍ୟରେ ଗତ କିଛି ମାସ ଧରି ବିବାଦ ଚାଲିଥିଲା ବୋଲି ପଡ଼ୋଶୀ ଖୁଲାସା କରିଛନ୍ତି । ପଡ଼ୋଶୀ କହିଛନ୍ତି, "ମରୁଲିଧରଙ୍କର ତାଙ୍କ ସ୍ତ୍ରୀ ଓ ପୁଅ ସହିତ ଅନେକ ଦିନ ଧରି ବିବାଦ ଥିଲା । ବିବାଦ ପାଇଁ ପିତା ଗୋଟିଏ ଗାଁରେ ଓ ମାଆପୁଅ ଆଉ ଏକ ଗାଁରେ ରହୁଥିଲେ । ୩ଜଣଙ୍କର ଏହି ଦୁଃଖଦ ମୃତ୍ୟ ପରେ ଅନ୍ତିମ ସଂସ୍କାର ମଧ୍ୟ ଅଲଗା ଅଲଗା ଗାଁରେ ହୋଇଛି । ମୁରଲିଧରଙ୍କର ଶେଷକୃତ୍ୟ ଜାଲନା ଜିଲ୍ଲାରେ ତାଙ୍କର ପୈତୃକ ଗାଁ ଧନଗର ପିପଲଗାଓଁରେ ହୋଇଥିବାବେଳେ ମାଆପୁଅଙ୍କର ସମ୍ଭାଜିନଗର ଜିଲ୍ଲାର ମୁକୁନ୍ଦୱାଡି ଶ୍ମଶାନରେ ହୋଇଛି । ମୁକୁନ୍ଦୱାଡି ସଙ୍ଗୀତାଙ୍କ ବାପାଘର । ସଙ୍ଗୀତା ପୁଅ କୃଣାଲ ସହ କିଛି ଦିନ ଧରି ସେଠାରେ ରହୁଥିଲେ ।"

• iPhoneର EMI ପାଇଁ ହୋଇଥିଲା ଯୁକ୍ତିତର୍କ

କୃଣାଳଙ୍କ ଆଇଫୋନର ଇଏମଆଇ ପେମେଣ୍ଟ ବାକି ଥିଲା । ଯାହାକୁ ନେଇ ବାପା ପୁଅଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏହାପରେ କୃଣାଳ ଆତ୍ମହତ୍ୟା କରିବା ଲାଗି ଖବଡ୍ୟା ପାହାଡ଼ ନିକଟକୁ ଚାଲିଯାଇଥିଲେ । ତାଙ୍କ ପଛେପଛେ ମାଆ ସଙ୍ଗୀତା ତୁରନ୍ତ ସେଠାରେ ପହଞ୍ଚିଥିଲେ । କାକୁତି ମିନତି ହୋଇ ଏପରି ନ କରିବାକୁ ସଙ୍ଗୀତା ପୁଅକୁ ଗୁହାରି କରିଥିଲେ । ମାତ୍ର କୃଣାଳ ପଛକୁ ହଟିନଥିଲା । ସେ ସଙ୍ଗେସଙ୍ଗେ ଆଇଫୋନ ଓ ଏକ ଘଣ୍ଟା ଏବଂ ରୂପା ଚେନ୍ ଖୋଲି ଫିଙ୍ଗିଦେଇଥିଲା । ଏହାପରେ ଯେତେବେଳେ ପିତା ମୁରଲିଧର ସେଠାରେ ପହଞ୍ଚି ପୁଅକୁ ବୁଝାଇଥିଲେ ଓ ତାକୁ ବଞ୍ଚାଇବା ଲାଗି ତା ପାଖକୁ ଯାଇଥିଲେ..ଠିକ୍ ସେତିକି ବେଳେ କୃଣାଳ ଡେଇଁପଡ଼ିଥିଲା । ଭାରସାମ୍ୟ ହରାଇ ମୁରଲିଧର ମଧ୍ୟ ପାହାଡ଼ ତଳକୁ ଖସିପଡ଼ିଥିଲେ । ଏହି ସବୁକିଛି ନିଜ ଆଖି ଆଗରେ ଦେଖି ସଙ୍ଗୀତା ମଧ୍ୟ ଡେଇଁପଡ଼ିଥିବା ଭାଇରାଲ ଭିଡିଓରେ ସ୍ପଷ୍ଟ ଦିଶୁଛି ।

• 'ପୂର୍ବରୁ ବି ସମସ୍ତେ ପାହାଡ଼଼ ଉପରକୁ ଯାଇଥିଲେ'

ମୁରଲିଧରଙ୍କ ସାଙ୍ଗରେ କାମ କରୁଥିବା ତଥା ତାଙ୍କ ପଡ଼ୋଶୀ ମହାଦେବ କହିଛନ୍ତି, "ଏହି ପରିବାରକୁ ମୁଁ ବହୁତ ଭଲ ଭାବେ ଜାଣିଛି । ଆମେ ପ୍ରାୟ ୭-୮ ବର୍ଷ ଧରି ଗୋଟିଏ ଜାଗାରେ କାମ କରୁଥିଲୁ । ଆମେ ଗୋଟିଏ ପରିବାର ପରି ଥିଲୁ । ସକାଳେ ତାଙ୍କ ସହ କଥା ହୋଇଥିଲି । ସେତେବେଳେ ମୁଁ ଜାଣିପାରିନଥିଲି ଯେ ଏପରି କିଛି ଘଟିଯିବ ବୋଲି । ପୂର୍ବରୁ ମଧ୍ୟ ଏପରି ଏକ ଘଟଣା ଘଟିଥିଲା । ସମସ୍ତେ ପାହାଡ଼କୁ ଯାଇଥିଲେ, ହେଲେ ସେଥର ସମସ୍ତେ ସୁରକ୍ଷିତ ଭାବେ ଫେରିଆସିଥିଲେ ।"

ପଢନ୍ତୁ ଏହି ଖବର: ଟିଚର ଗାଳିଦେଲେ, ଚାପୁଡ଼ା ମାରିଲେ...କାନ୍ଦି କାନ୍ଦି ଚାଲିଗଲା କୁନିପୁଅର ଜୀବନ

• ସେଦିନ କଣ ହୋଇଥିଲା କହିଲା ପୋଲିସ

ପୋଲିସ ଅଧିକାରୀ ରାମେଶ୍ଵର ଗାଡେ କହିଛନ୍ତି, "ଅଗଷ୍ଟ ୨୧ ତାରିଖରେ ୧୧୨କୁ କଲ୍ ଆସିଥିଲା ଯେ ଗୋଟିଏ ପରିବାର ପାହାଡ ଉପରେ ଆତ୍ମହତ୍ୟା କରିବାକୁ ପହଞ୍ଚିଛନ୍ତି । ସୂଚନା ମିଳିବା ପରେ ଏକ ପୋଲିସ ଟିମ ସେଠାରେ ପହଞ୍ଚିଥିଲା । ପିଲାଟିକୁ ବୁଝାଇବା ଲାଗି ବହୁତ ଉଦ୍ୟମ କରାଯାଇଥିଲା । ପିଲାଟି ମନରୁ ଆତ୍ମହତ୍ୟା କଥା ଚାଲିଯାଇଥିଲା । ଠିକ୍ ଏହି ସମୟରେ ପୁଅଟିର ବାପା ସେଠାରେ ପହଞ୍ଚିଥିଲେ । ସେହି ସମୟରେ ପୁଅଟି ଡେଇଁପଡ଼ିଥିଲା । ପିତା ପୁଅର ହାତ ଧରିଥିଲେ, ଏଣୁ ସେ ବି ଭାରସାମ୍ୟ ହରାଇ ଖସିପଡ଼ିଥିଲେ । କିଛି ସେକେଣ୍ଡ ମଧ୍ୟରେ ମହିଳା ଜଣକ ମଧ୍ୟ ଡେଇଁ ପଡ଼ିଥିଲେ ।"

ବି.ଦ୍ର: ଯଦି ଆପଣ କିମ୍ବା ଆପଣ ଜାଣିଥିବା କେହି ଆତ୍ମହତ୍ୟା କରିବାର ଚିନ୍ତା କରୁଛନ୍ତି, ତେବେ ଏହା ଏକ ଅତ୍ୟନ୍ତ ଗୁରୁତର ଡାକ୍ତରୀ ଜରୁରୀକାଳୀନ ପରିସ୍ଥିତି। ତୁରନ୍ତ ଭାରତ ସରକାରଙ୍କ ଜୀବନସାଥୀ ହେଲ୍ପଲାଇନ୍ 18002333330ରେ ଯୋଗାଯୋଗ କରନ୍ତୁ । ଆପଣ ଟେଲିମାନ୍ସ ହେଲ୍ପଲାଇନ୍ ନମ୍ବର 1800914416କୁ ମଧ୍ୟ କଲ୍ କରିପାରିବେ । ଏଠାରେ ଆପଣଙ୍କ ପରିଚୟକୁ ସମ୍ପୂର୍ଣ୍ଣ ଗୋପନୀୟ ରଖାଯିବ ଏବଂ ଏହି ପରିସ୍ଥିତିକୁ ଦୂର କରିବା ପାଇଁ ବିଶେଷଜ୍ଞମାନେ ଆପଣଙ୍କୁ ଆବଶ୍ୟକ ପରାମର୍ଶ ଦେବେ । ମନେ ରଖନ୍ତୁ, ଜୀବନ ଅତ୍ୟନ୍ତ ମୂଲ୍ୟବାନ।