ଭୁବନେଶ୍ଵର: ବୟସର ଅପରାହ୍ନରେ ପରକୀୟା ପ୍ରୀତି ମହଙ୍ଗା ପଡ଼ିଛି । ରାଜଧାନୀ ଭୁବନେଶ୍ୱରରେ ଦେଖିବାକୁ ମିଳିଛି ପରକୀୟା ପ୍ରୀତିର ଭୟଙ୍କର ତଥା କରୁଣ ପରିଣତି । ମଞ୍ଚେଶ୍ୱର ଥାନା ଗାଡ଼କଣ ସାଇବିହାର ବସ୍ତି କୁଞ୍ଜରେ ଘଟିଛି ବୀଭତ୍ସ ହତ୍ୟାକାଣ୍ଡ ।

ଶନିବାର ସକାଳ ପ୍ରାୟ ୧୧ଟା । ମଞ୍ଚେଶ୍ୱର ଗାଡ଼କଣ ସାଇ ବିହାର ବସ୍ତି କୁଞ୍ଜ ଦେଇ ମନ୍ଦିରରୁ ବାଇକ୍‌ରେ ଫେରୁଥିଲେ ବସ୍ତିର ପୂର୍ବତନ ସଭାପତି ସୁଶୀଲ ସିଂ । କେହି କିଛି ବୁଝିବା ପୂର୍ବରୁ ହଠାତ୍ ଅତର୍କିତ ଭାବେ ତାଙ୍କୁ ଗୋଡ଼ାଇ ଗୋଡ଼ାଇ ପେଟ ଆଉ ବେକକୁ ଛୁରୀରେ ହାଣି ଚାଲିଲା ଅଭିଯୁକ୍ତ ।

ଏଥିସହ ପଢ଼ନ୍ତୁ: ଜେନେରାଲ ବଗିରେ ବାଡ଼ିଆପିଟା; ପିଟିପିଟି ନେଲେ ଯାତ୍ରୀଙ୍କ ଜୀବନ 

ପଡ଼ୋଶୀ, ପରକୀୟା ପ୍ରୀତି...

ଘଟଣାସ୍ଥଳରେ ହିଁ ସୁଶୀଲ ସିଂଙ୍କର ମୃତ୍ୟୁ ହୋଇଥିବା ବେଳେ ହତ୍ୟାକାରୀ ସାଜିଥିଲା ତାଙ୍କରି ପଡ଼ୋଶୀ ନୀଳକଣ୍ଠ ମହାନ୍ତି । ଏହି ହତ୍ୟାକାଣ୍ଡ ପଛରେ ପରକୀୟା ପ୍ରୀତିର କାହାଣୀ ଥିବା ନେଇ ଅଭିଯୁକ୍ତର ସ୍ତ୍ରୀ ଚାଞ୍ଚଲ୍ୟକର ବୟାନ ଦେଇଛନ୍ତି ।

୬ ମାସ ତଳେ ନୀଳକଣ୍ଠ ଓ ତାଙ୍କ ପତ୍ନୀଙ୍କ ମଧ୍ୟରେ ଝଗଡ଼ା ହୋଇଥିଲା । ସମାଧାନ ପାଇଁ କଥା ପହଞ୍ଚିଥିଲା ବସ୍ତି ସଭାପତି ସୁଶୀଲ ସିଂଙ୍କ ପାଖରେ । ସୁଶୀଲ ସମାଧାନ କରିବା ବଦଳରେ ନୀଳକଣ୍ଠଙ୍କୁ ତାଙ୍କ ସ୍ତ୍ରୀକୁ ଘରୁ ବାହାର କରିଦେବାକୁ କହିଥିଲେ । ପରେ ସ୍ୱାମୀ-ସ୍ତ୍ରୀଙ୍କ କଳି ମହିଳା ଥାନାରେ ପହଞ୍ଚିଥିଲା ଏବଂ ନୀଳକଣ୍ଠ ଜେଲ୍ ଯାଇଥିଲେ ।

ଅଭିଯୁକ୍ତଙ୍କ ସ୍ତ୍ରୀଙ୍କ ଅଭିଯୋଗ ଅନୁଯାୟୀ, ନୀଳକଣ୍ଠ ଜେଲ୍‌ରେ ଥିବା ବେଳେ ସୁଶୀଲ ସିଂ ତାଙ୍କୁ ବିବାହର ପ୍ରତିଶ୍ରୁତି ଦେଇ ଶୈଳଶ୍ରୀବିହାର ଅଞ୍ଚଳର ଏକ ଘରକୁ ନେଇ ଦୁଷ୍କର୍ମ କରିଥିଲେ । ପରବର୍ତ୍ତୀ ସମୟରେ ସୁଶୀଲ ତାଙ୍କୁ ଧୋକା ଦେଇଥିଲେ ।

ଜେଲ୍‌ରୁ ଫେରିବା ପରେ ଏକଥା ଜାଣିବାକୁ ପାଇଥିଲେ ସ୍ୱାମୀ ନୀଳକଣ୍ଠ ମହାନ୍ତି । ଆଉ ସେବେଠାରୁ ପ୍ରତିଶୋଧ ନେବାକୁ ସୁଯୋଗ ଖୋଜୁଥିଲେ । ଶନିବାର ସୁଶୀଲ ମନ୍ଦିରରୁ ଫେରୁଥିବା ବେଳେ ନୀଳକଣ୍ଠ ତାଙ୍କୁ ନିର୍ମମ ଭାବେ ହତ୍ୟା କରିଛି ନୀଳକଣ୍ଠ ।

ଏଥିସହ ପଢ଼ନ୍ତୁ: ରାଜଧାନୀରୁ ରାୟଗଡ଼ା... କାହିଁକି ହିଂସ୍ର ପାଲଟି ଯାଉଛି ମଣିଷ ? 

ପୋଲିସ ଏହି ମାମଲାରେ ଅଭିଯୁକ୍ତ ନୀଳକଣ୍ଠ ମହାନ୍ତିକୁ ଗିରଫ କରିବା ସହ ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚି ଯାଞ୍ଚ ଆରମ୍ଭ କରିଛି । ବସ୍ତି ବାସିନ୍ଦାମାନଙ୍କୁ ପଚରାଉଚରା କରିବା ସହ ଅଞ୍ଚଳର ସିସିଟିଭି ଫୁଟେଜ୍ ଜବତ କରି ଅଧିକ ତଦନ୍ତ ଜାରି ରଖିଛି ।

ହତ୍ୟାକାଣ୍ଡ ପଛରେ ପ୍ରକୃତରେ ପରକୀୟା ପ୍ରୀତି ଓ ପ୍ରତିଶୋଧ ରହିଛି ନା ଏହା ପଛରେ ଆଉ କିଛି ବଡ଼ କାରଣ ରହିଛି, ସେ ନେଇ ମଞ୍ଚେଶ୍ୱର ଥାନା ପୋଲିସ ସମସ୍ତ ଦିଗକୁ ନେଇ ତନାଘନା ତଦନ୍ତ କରୁଛି ।