Insurance Murder / ଜୀବନ ବୀମା ଟଙ୍କା ପାଇଁ ସ୍ତ୍ରୀ-ଝିଅର ଷଡ଼ଯନ୍ତ୍ର; ଛାତି ଥରାଇଦେବ ଏହି ହତ୍ୟା କାହାଣୀ

ଗାନ୍ଧୀନଗର: ଗୁଜରାଟ ମେହସାଣାର ଏକ ସଡ଼କ ଦୁର୍ଘଟଣାର ତଦନ୍ତ ଆରମ୍ଭ ହୋଇଥିଲା, କିନ୍ତୁ ଯେତେବେଳେ ପୋଲିସ ଘଟଣାର ସିସିଟିଭି ଫୁଟେଜ ଯାଞ୍ଚ କରିଥିଲା ସେତେବେଳେ ଘଟଣାଟି ଏମିତି ମୋଡ଼ ନେଇଥିଲା ଯେ ନିଜେ ପୋଲିସ ଚମକିପଡ଼ିଥିଲା । ମେଡିକାଲ ଷ୍ଟୋରର ବ୍ୟବସାୟୀଙ୍କ ମୃତ୍ୟୁ କୌଣସି ଦୁର୍ଘଟଣା ନୁହେଁ ବରଂ ହତ୍ୟାକାଣ୍ଡ ଥିଲା ବୋଲି ଜଣାପଡ଼ିଥିଲା । ଏଥିରେ ବ୍ୟବସାୟୀଙ୍କ ନିଜ ସ୍ତ୍ରୀ ଓ ଝିଅ ଜଡ଼ିତ ଥିବା ଜଣାପଡ଼ିଛି ।

ବିନୋଦଭାଇ ପଟେଲ ବିଜାପୁରରେ ଏକ ମେଡିକାଲ ଷ୍ଟୋର ଚଲାନ୍ତି । ପ୍ରତିଦିନ ପରି ସେଦିନ ମଧ୍ୟ ଦୋକାନ ବନ୍ଦ କରି ସେ ନିଜ ସ୍କୁଟି ଧରି ଘରକୁ ଫେରୁଥିଲେ । ଠିକ୍ ସେହି ସମୟରେ ଆନନ୍ଦପୁରା ଛକ ନିକଟରେ ଏକ କାର ଆସି ତାଙ୍କୁ ଜୋରରେ ଧକ୍କା ମାରିଥିଲା । ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ତାଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା । ପ୍ରଥମେ ସମସ୍ତେ ଭାବିଥିଲେ ଏହା ନିଶ୍ଚିତ ଏକ ମର୍ମନ୍ତୁଦ ସଡ଼କ ଦୁର୍ଘଟଣା । ମାତ୍ର ଯେତେବେଳେ ପୋଲିସ ସିସିଟିଭି ଫୁଟେଜ ଯାଞ୍ଚ କରିଥିଲା, ସେତେବେଳେ ପ୍ରକୃତ ଘଟଣା ସାମ୍ନାକୁ ଆସିଥିଲା ।

• କଣ ଥିଲା ପ୍ରକୃତ ଘଟଣା ?

ପୋଲିସ ତଦନ୍ତ ବେଳେ ଜଣାପଡ଼ିଥିଲା ଯେ ଯେଉଁ କାରଟି ମୃତକ ବିନୋଦଭାଇଙ୍କୁ ଧକ୍କା ଦେଇଥିଲା, ସେତେବେଳେ ଉକ୍ତ କାରଟି ଘଟଣା ଦିନର ଅନେକ ଦିନ ପୂର୍ବରୁ ବାରମ୍ବାର ତାଙ୍କ ପଛେ ପଛେ ଯାଉଥିବା ଦେଖାଯାଇଥିଲା । ପୋଲିସ ସନ୍ଦେହ କରିଥିଲା ଯେ ଏହା ପୂର୍ବରୁ ଯୋଜନାବଦ୍ଧ ଥିଲା । ଏହାପରେ ପୋଲିସ ବୈଷୟିକ ପ୍ରମାଣ, ମୋବାଇଲ ଲୋକେସନ ଓ ପଚରାଉଚରା କରି ତଦନ୍ତକୁ ତ୍ଵରାନ୍ଵିତ କରିଥିଲା । ଏହାପରେ ଘଟଣାଟି ଏମିତି ଏକ ମୋଡ଼ ନେଇଥିଲା, ଯାହାକି କେବେ ବି କେହି କଳ୍ପନା କରିନଥିଲେ ।

• ଅଭିଯୁକ୍ତ ପତ୍ନୀ ନିକଟରେ ପହଞ୍ଚିଲା ପୋଲିସ

ତଦନ୍ତ ବେଳେ ପୋଲିସ ଜାଣିବାକୁ ପାଇଥିଲା ଯେ ଦୁର୍ଘଟଣା ଘଟାଇଥିଲା କାରଟି ମୃତକଙ୍କ ପତ୍ନୀ ରିଟାଙ୍କ ଭଣଜା ବିମଲ ପଟେଲ ଥିଲା । ରିଟାବେନ୍ ନିଜ ସ୍ଵାମୀଙ୍କ ହତ୍ୟା ଲାଗି ଭଣଜାକୁ ୫୦ହଜାର ଟଙ୍କା ଦେଇଥିଲେ । ଯୋଜନା ଥିଲା ବିନା ନମ୍ବର ପ୍ଲେଟ ଥିବା ଗାଡ଼ି ଧରି ଏହି ହତ୍ୟାକାଣ୍ଡକୁ ସାଧାରଣ ସଡ଼କ ଦୁର୍ଘଟଣାର ରୂପ ଦିଆଯିବ । ପୋଲିସ ପରେ ଜାଣିବାକୁ ପାଇଥିଲା ଯେ ଏହି ଘଟଣାରେ ମୃତକଙ୍କ ଝିଅ ମଧ୍ୟ ସାମିଲ ଥିଲା । ସେ ନିଜ ବାପାଙ୍କ ସମସ୍ତ କାର୍ଯ୍ୟକଳାପ ଉପରେ ନଜର ରଖୁଥିଲା ଓ ତାଙ୍କର ଲୋକେସନ ଭଣଜା ନିକଟକୁ ପଠାଉଥିଲା ।

ପଢନ୍ତୁ ଏହି ଖବର: ଦାଦାବଟି ନମିଳିବାରୁ ଅଣ୍ଡା ବ୍ୟବସାୟୀଙ୍କ କାର୍ଯ୍ୟାଳୟରେ ଆକ୍ରମଣ, ଭଙ୍ଗାରୁଜା

• ଜୀବନ ବୀମା ଟଙ୍କା ପାଇଁ ହତ୍ୟା

ପୋଲିସ ଜାଣିବାକୁ ପାଇଥିଲା ଯେ ଜୀବନ ବୀମା ଟଙ୍କା ୧୦ ଲକ୍ଷ ପାଇଁ ସ୍ଵାମୀକୁ ହତ୍ୟା କରିଥିଲେ ପତ୍ନୀ ରିଟାବେନ୍ । ଏହାପଛରେ ଆଉ ଏକ କାରଣ ଥିଲା ଦୀର୍ଘ ଦିନ ଧରି ଲାଗିରହିଥିବା ପାରିବାରିକ କଳହ । ମୃତକଙ୍କ ଭଉଣୀ ସୂର୍ଯ୍ୟାବେନ୍ ପଟେଲଙ୍କ କହିବା କଥା ହେଉଛି, ଘରେ ପ୍ରାୟ ସବୁଦିନ ଝଗଡ଼ା ହେଉଥଲା । ଘଟଣା ପୂର୍ବରୁ ପରିବାରର ମାହୋଲ ବଦଳିଥିଲା । ଏହାର ଆଭାସ୍ ବିନୋଦଭାଇଙ୍କୁ ମଧ୍ୟ ଜଣାପଡ଼ିଥିଲା, ହେଲେ ଏପରି ଷଡ଼ଯନ୍ତ୍ର ସମ୍ପର୍କରେ ସେ କେବେ ବି କଳ୍ପନା କରିନଥିଲେ । ପୋଲିସ ପତ୍ନୀ ରିଟାବେନ୍‌, ଝିଅ ଓ ଭଣଜାକୁ ଗିରଫ କରିଛି । ହତ୍ୟାକାଣ୍ଡରେ ବ୍ୟବହାର ହୋଇଥିବା କାରକୁ ମଧ୍ୟ ଜବତ କରାଯାଇଛି । ଏବେ ପୋଲିସ ଅଭିଯୁକ୍ତମାନଙ୍କୁ ପଚରାଉଚରା କରି ଅଧିକ ତଦନ୍ତ ଜାରି ରଖିଛି ।