Argus News - ମାଛ ପାଇଁ ମୁଥ ମାରିଲେ, ମୁଣ୍ଡକୁ ପଥରରେ ଛେଚି ସାଙ୍ଗକୁ ମାରିଦେଲେ

ମୁମ୍ବାଇ: ୩ ସାଙ୍ଗ ଏକାଠି ମିଶିଲେ, ମଦ ସହ ମାଛ ଆଣିଲେ । ରାତି ସାରା ଆସର ଜମିଲା । ମାଛ ଭଜା ସାଙ୍ଗକୁ ତଣ୍ଟି ପର୍ଯ୍ୟନ୍ତ ବସି ମଦ ପିଇ ନିଶାରେ ଶୋଇ ପଡ଼ିଲେ । ହେଲେ ମାଛ ଭଜା ଥିବା କଡ଼େଇକୁ ଢାଙ୍କିବାକୁ ଭୁଲିଗଲେ ।

ଆଉ ଏହି ଭୁଲ୍‌ ପାଇଁ ରାତିରେ ଘଟିଗଲା ବୀଭତ୍ସ କାଣ୍ଡ । ମଦ ନିଶାରେ ଚୂର୍ ହୋଇ ମାଛ କଡ଼େଇ ଘୋଡ଼ାଇ ନଥିଲେ । ଏହି ସୁଯୋଗରେ ମୂଷା ଆସି ସବୁ ମାଛ ଖାଇଗଲେ । ଆଉ ମଦ ନିଶାରେ ଶୋଇ ପଡ଼ିଥିବା ୨ ସାଙ୍ଗ ଉଠି ଖାଇବାକୁ ଯିବାବେଳେ ମାଛ ନଥିଲା ।

ଯାହାକୁ ନେଇ ୨ ସାଙ୍ଗ ତୃତୀୟ ସାଙ୍ଗକୁ ସନ୍ଦେହ କରିଥିଲେ । ସବୁ ମାଛ ସେ ଏକାକୀ ଖାଇ ଦେଇଥିବା ଭାବି ଯୁକ୍ତିତର୍କ, ଝଗଡ଼ା ଆରମ୍ଭ କରିଥିଲେ । ଆଉ ମାଛ ରାଗରେ ମୁହଁକୁ ମୁଥ ମାରିବା ସହ ମୁଣ୍ଡକୁ ପଥରରେ ଛେଚି ହତ୍ୟା କଲେ ।

ଏଥିସହ ପଢ଼ନ୍ତୁ: ଭାଇ ହେଲା ଭଗାରି; ବାଡ଼େଇ ବାଡ଼େଇ ବଡ଼ଭାଇ ଓ ମାଆକୁ ମାରିଦେଲା ସାନ ପୁଅ

ଏଭଳି ଭୀବତ୍ସ ହତ୍ୟାକାଣ୍ଡ ଘଟିଛି ମୁମ୍ବାଇର ଗୋରେଗାଓଁରେ । ସୂଚନା ଅନୁସାରେ, ଫେବ୍ରୁଆରୀ ୨୪ ତାରିଖରେ ଅଫସର ତାର ଦୁଇ ସାଙ୍ଗ ସୁରେଶ ଓ ରାଜେଶଙ୍କ ସହ ତାଙ୍କ ପ୍ଲାଟ୍‌ରେ ପାର୍ଟି କରିଥିଲେ । ରାତିରେ ପେଟେ ପେଟେ ମଦ ପିଇବା ସହ ମାଛ ଆଣି ଭାଜି ରଖିଥିଲେ ।

ହେଲେ ମାଛ ଘୋଡ଼ାଇ ନଥିବାରୁ ଖାଇ ଯାଇଥିଲା ମୂଷା । ନିଦ ନିଶାରେ ଥିବା ସୁରେଶ ଓ ରାଜେଶ ଉଠିବା ପରେ ଖାଲି କଡ଼େଇ ଦେଖି ରାଗି ଯାଇଥିଲେ । ଯାହାକୁ ନେଇ ଅଫସରଙ୍କ ସହ ସୁରେଶ ଓ ରାଜେଶଙ୍କ ଝଗଡ଼ା ହୋଇଥିଲା । ପରେ ଅଫସରଙ୍କୁ ପିଟି ପିଟି ମାରିଦେଲେ ଦୁଇ ସାଙ୍ଗ ।

ମୁମ୍ବାଇରେ ହତ୍ୟା ପରେ ସୁରେଶ ଓ ରାଜେଶ ହରିୟାଣା ଖସି ପଳାଇଥିଲେ । ସେପଟେ ହତ୍ୟା ମାମଲା ରୁଜୁ କରି ପୋଲିସ ଆରମ୍ଭ କରିଥିଲା ଛାନଭିନ୍ । ଶେଷରେ ପୋଲିସ ଦୁଇ ଅଭିଯୁକ୍ତ ସୁରେଶ ଓ ରାଜେଶଙ୍କୁ ଗିରଫ କରିଛି । ଦୁହେଁ କବାଡ଼ି ବ୍ୟବସାୟ କରୁଥିବା ଜଣାପଡ଼ିଛି ।

ଏଥିସହ ପଢ଼ନ୍ତୁ: ୟୁଟ୍ୟୁବର ରାହୁଲ ହତ୍ୟା ଘଟଣା,ଅଭିଯୁକ୍ତଙ୍କୁ ଚିହ୍ନିବେ ପ୍ରତ୍ୟକ୍ଷଦର୍ଶୀ

ସୁରେଶର ଘର ହରିୟାଣାର କୈଥଲରେ ହୋଇଥିବା ବେଳେ ରାଜେଶ ନେପାଳର ବାସିନ୍ଦା । ଦୁହିଁଙ୍କୁ ଧରିବା ପୋଲିସ ପାଇଁ ଚ୍ୟାଲେଞ୍ଜି ଥିଲା । କାରଣ ଦୁହେଁ ଫୋନ୍ ବ୍ୟବହାର କରୁନଥିବା ବେଳେ ଚିହ୍ନଟ ପାଇଁ କୌଣସି ଡକ୍ୟୁମେଣ୍ଟ ଛାଡ଼ି ନଥିଲେ ।

ଫଳରେ ପୋଲିସ ସ୍ଥାନୀୟ ଅଞ୍ଚଳର ପ୍ରାୟ ୫୦ ଜଣ ଜରି ଗୋଟାଳିଙ୍କୁ ପଚରାଉଚରା କରିଥିଲା । ଏହାପରେ ସୁରେଶର ଠିକଣା ହରିୟାଣା ଜଣାପଡ଼ିବା ପରେ ତାକୁ ଧରିଥିଲା ପୋଲିସ । ପରେ ରେଲୱେ ଷ୍ଟେସନରୁ ରାଜେଶ ଧରାପଡ଼ିଛି । ତଦନ୍ତରୁ ଜଣାପଡ଼ିଛି ରାଜେଶ ଏଭଳି ସଙ୍ଗୀନ ଅପରାଧରେ ଆଗରୁ ଜଡ଼ିତ ।