Muzaffarpur Murder / ରୁମ୍ ଖୋଲିଲା ପରେ ଚମକିପଡ଼ିଲେ ! ହତ୍ୟା କରି ବ୍ୟକ୍ତିଙ୍କ ଆଖି ତାଡ଼ିଲେ, ପତ୍ନୀ ପିଲା ଗାଏବ

ପାଟନା: ୩୫ ବର୍ଷୀୟ ଯୁବକ ଭଡ଼ାଘରେ ରହୁଥିଲେ । ପୋଲିସ ରୁମ୍ ଖୋଲିବା ପରେ ମିଳିଥିଲା ଶବ । ହେଲେ ରୁମ୍ ଖୋଲୁଖୋଲୁ ଚମକିପଡ଼ିଥିଲା ପୋଲିସ । କାରଣ ମୃତଦେହର ଆଖି ତଡ଼ା ହୋଇଥିଲା, ଯାହାର ଦୃଶ୍ୟ ବେଶ ଭୟଙ୍କର ଥିଲା । ବିହାର ମୁଜ୍ଜଫରପୁରରେ ଘଟିଛି ଏପରି ଘଟଣା । ଚାଣକ୍ୟପୁରୀ ରୋଡ୍ ନମ୍ବର-୬ ସ୍ଥିତ ଏକ ଭଡ଼ା ଘରୁ ଏପରି ଭାବେ ଜଣେ ଯୁବକଙ୍କ ମୃତଦେହ ମିଳିଛି । ସେପଟେ ମୃତ ଯୁବକଙ୍କ ପତ୍ନୀ ଓ ପିଲା ଗାଏବ ଥିବା ଜଣାପଡ଼ିଛି ।

ଘର ମାଲିକ ଶିବ ଶଙ୍କର ସିଂହଙ୍କ କହିବାନୁସାରେ, ଯୁବକ ପ୍ରାୟ ୨ ମାସ ପୂର୍ବରୁ ମାସକୁ ୧୮୦୦ ଟଙ୍କା ଘରରେ ଭଡାରେ ରହିଥିଲେ । ସେ ଜଣେ ଶ୍ରମିକ ଥିଲେ ଓ ପତ୍ନୀ ଏବଂ ଦୁଇ ପିଲା ସାଥୀରେ ରହୁଥିଲେ । ପରିବାର ଭିତରେ କିଛି ବିବାଦ ଥିଲା କି ନାହିଁ ସେ ନେଇ ଘର ମାଲିକ ଜାଣିନଥିବା ପୋଲିସକୁ କହିଛନ୍ତି ।

• କ୍ଷୀର ଦେବାକୁ ଯାଇଥିବା ବ୍ୟକ୍ତି ଦେଖିଥିଲେ ଶବ

ଶୁକ୍ରବାର ସକାଳେ ପ୍ରତିଦିନ ଧରି ଦୁଗ୍ଧ ବ୍ୟବସାୟୀ ଜଣକ ଯୁବକଙ୍କ ଘରେ ପହଞ୍ଚିଥିଲେ । ପୁରା ବିଲ୍ଡିଂରେ କ୍ଷୀର ଦେବା ପରେ ସେ ଯୁବକଙ୍କ ରୁମ୍ ନିକଟରେ ପହଞ୍ଚିଥିଲେ । ଯେତେବେଳେ ଘର କବାଟ ବାଡ଼େଇଥିଲେ, ସେତେବେଳେ ଭିତରୁ କୌଣସି ଜବାବ ଆସିନଥିଲା । କବାଟ ଯେପରି ଜାମ୍ ଥିଲା । ଏହାପରେ ସେ କବାଟକୁ ଧକ୍କା ଦେବାପରେ ଏହା ଖୋଲିଯାଇଥିଲା । ହେଲେ ବ୍ୟବସାୟୀ ଜଣକ ଯାହା ଦେଖିଲେ, ସେ ଡରିଯାଇଥିଲେ । ତଳେ ପଡ଼ିଥିଲା ଯୁବକଙ୍କ ମୃତଦେହ । ଏହାପରେ ସେ ଜୋରରେ ଚିତ୍କାର କରିଥିଲେ । ତାଙ୍କ ଚିତ୍କାର ଶୁଣି ଘର ମାଲିକ ସେଠାରେ ପହଞ୍ଚିଥିଲେ ଓ ୧୧୨କୁ କଲ୍ କରିଥିଲେ ।

ପଢନ୍ତୁ ଏହି ଖବର: ୩ ମାସ ହୋଟେଲରେ ଲୁଚିଥିଲେ, ଶାଢୀ ପିନ୍ଧି ବୁଲୁଥିଲେ ୪ ବାଂଲାଦେଶୀ

• ପୋଲିସ ବି ମୃତଦେହ ଦେଖି ଚମକିପଡ଼ିଲା

ଆହିୟାପୁର ଥାନାର ପୋଲିସ ଘଟଣାସ୍ଥଳରେ ପହଞ୍ଚିଥିଲା । ଟାଉନ୍-୨ ଏସଡିପିଓ କାର୍ତ୍ତିକେୟନ କେ. ଏ ବି ଘଟଣାସ୍ଥଳରେ ପହଞ୍ଚିଥିଲେ । ଏଫଏସଏଲ ଟିମକୁ ଡାକି ସାକ୍ଷ୍ୟ ପ୍ରମାଣ ସଂଗ୍ରହ କରିବାକୁ କହିଥିଲେ । ଅହିୟାପୁର ଥାନା ମୁଖ୍ୟ ଶରତ କୁମାର କହିଛନ୍ତି ଯେ ଚାଣକ୍ୟପୁରୀ ରୋଡ୍ ନମ୍ବର-୬ରେ ଜଣେ ବ୍ୟକ୍ତିଙ୍କ ମୃତ୍ୟୁ ଖବର ଆସିଥିଲା । ଖବର ପାଇବା ପରେ ପୋଲିସ ଟିମ ସେଠାରେ ପହଞ୍ଚିଥିଲା । ଏବେ ମୃତଦେହକୁ ଜବତ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି । ପୋଲିସ ଯୁବକଙ୍କ ପତ୍ନୀ ଓ ପିଲାଙ୍କୁ ଖୋଜୁଛି । ହତ୍ୟାର କାରଣ କଣ ଓ ଯୁବକଙ୍କ ପ୍ରକୃତ ଘର କୁଆଡ଼େ ସେ ନେଇ ତଦନ୍ତ କରାଯାଉଛି । ଏହି ହତ୍ୟା ପଛରେ କିଏ ସେନେଇ ଜଣାପଡ଼ିନାହିଁ ।