ନୟାଗଡ଼: ପୁଅ ପାଠ ପଢ଼ିବାକୁ ବିଦ୍ୟାଳୟକୁ ଯାଇଥିଲା । ବିଦ୍ୟାଳୟ ବନ୍ଦ ହେଲା, ସନ୍ଧ୍ୟା ହେଲା ସିନା ପୁଅ କିନ୍ତୁ ଘରକୁ ଫେରିଲାନି । ଘର ଲୋକ ଚାରିଆଡ଼େ ଖୋଜାଖୋଜି କରିବା ଆରମ୍ଭ କରି ଦେଇଥିଲେ । ହଠାତ୍ ପଞ୍ଚମ ଶ୍ରେଣୀରେ ପଢ଼ୁଥିବା ୧୦ ବର୍ଷର ପୁଅ ନିଖୋଜକୁ ନେଇ ଗାଁ ସ୍ତବ୍ଧ ହୋଇ ଯାଇଥିଲା ।

ମଙ୍ଗଳବାର ପୁଅ ନିଖୋଜ ହୋଇଥିବା ବେଳେ ବୁଧବାର ସକାଳ ଗାଁର ଏକ କୂଅରୁ ମିଳିଛି ମୃତଦେହ । ନାବାଳକର ଶରୀରରେ ଏକାଧିକ କ୍ଷତ ରହିଛି । ଯାହାକୁ ନେଇ ପରିବାର ଲୋକେ ହତ୍ୟା ଅଭିଯୋଗ ଆଣିଛନ୍ତି । ନାବାଳକ ଜଣଙ୍କୁ କେହି ହତ୍ୟା କରିବା ପରେ କୂଅରେ ଫିଙ୍ଗି ଦେଇଥିବା ଅଭିଯୋଗ କରି ଥାନାରେ ଏତଲା ଦେଇଛନ୍ତି ।

ଏଥିସହ ପଢ଼ନ୍ତୁ: ସବୁ ସାରିଦେଲା ମଦ୍ୟପ ଡ୍ରାଇଭର; ଦୋକାନରୁ ନେଇ ଗାଡ଼ି ସମସ୍ତଙ୍କ ଉପରେ ମଡ଼ାଇଦେଲା...

ସୂଚନା ଅନୁସାରେ, ମୃତକ ହେଉଛନ୍ତି ନୟାଗଡ଼ ଜିଲ୍ଲା ଗଣିଆ ଥାନା ବେଲପଡ଼ା ପ୍ରାଥମିକ ବିଦ୍ୟାଳୟର ପଞ୍ଚମ ଶ୍ରେଣୀ ଛାତ୍ର । ମଙ୍ଗଳବାର ବେଲପଡ଼ା ଗାଁର ବିଜୟ ମଲ୍ଲିକଙ୍କ ୧୦ ବର୍ଷର ପୁଅ ବିଦ୍ୟାଳୟକୁ ଯାଇ ଆଉ ଘରକୁ ଫେରି ନଥିଲା ।

ବିଦ୍ୟାଳୟରୁ ପୁଅ ନିଖୋଜ ପରେ ଚାରିଆଡ଼େ ଖୋଜାଖୋଜି କରିଥିଲେ ପରିବାର ଲୋକ । ସ୍କୁଲ୍‌ରୁ ନେଇ ଖେଳ ପଡ଼ିଆ ପର୍ଯ୍ୟନ୍ତ ରାତି ସାରା ଖୋଜିଥିଲେ ବି ପୁଅର ସନ୍ଧାନ ମିଳି ନଥିଲା । ସକାଳେ ଗାଁର ଏକ କୂଅରେ ପୁଅର ମୃତଦେହ ଭାସୁଥିବା ଦେଖିଥିଲେ ଗ୍ରାମବାସୀ ।

ଏଥିସହ ପଢ଼ନ୍ତୁ: ପୁଅରୁ ହୋଇଗଲେ ଝିଅ, ନା ତାଙ୍କର ସମୀରରୁ ହୋଇଗଲା ସମୀରା

କୂଅ ମଧ୍ୟରୁ ପଞ୍ଚମ ଶ୍ରେଣୀ ଛାତ୍ରଙ୍କ ମୃତଦେହ ଉଦ୍ଧାର ପରେ ଶରୀରରେ ଏକାଧିକ କ୍ଷତ ଥିବା ଦେଖିବାକୁ ପାଇଥିଲେ । ପୁଅକୁ କେହି ହତ୍ୟା କରିଥିବା ଅଭିଯୋଗରେ ଗ୍ରାମବାସୀ ରାସ୍ତାରୋକ କରିଛନ୍ତି । ଗଣିଆ-ଭୁବନେଶ୍ଵର ରାସ୍ତାକୁ ଅବରୋଧ କରି ରଖିଛନ୍ତି । ଶହ ଶହ ଯାନବାହାନ ଅଟକି ରହିଛି ।

ତେବେ କେଉଁ ପରିସ୍ଥିତିରେ ପଞ୍ଚମ ଶ୍ରେଣୀ ଛାତ୍ର ଜଣଙ୍କ କୂଅରେ ଖସି ପଡ଼ିଲେ ? ଖେଳୁ ଖେଳୁ ଖସି ପଡ଼ିଲେ ନା କେହି ହତ୍ୟା ପରେ ଫିଙ୍ଗି ଦେଇଛି ? ଯଦି କେହି ହତ୍ୟା କଲା, ତା' ପଛରେ କ'ଣ ରହିଛି କାରଣ ?