Bank Locker in Flood / ବନ୍ୟାପାଣିରେ ଭାସିଆସିଲା ଲକର, ଲୁଟିନେଲେ ନଗଦ ୯୨ ଲକ୍ଷ ଟଙ୍କା

କାଠମାଣ୍ଡୁ: ଭୟଙ୍କର ବନ୍ୟା ପରେ ନେପାଳର ପରିସ୍ଥିତି ଅସ୍ଥିର ହୋଇପଡ଼ିଛି । ପଡ଼ୋଶୀ ଦେଶରୁ ଆସୁଥିବା ଗୋଟିଏ ପରେ ଗୋଟିଏ ଦୃଶ୍ୟ ଅନେକଙ୍କ ଆଖି ଓଦା କରିଛି । ପ୍ରାକୃତିର କରାଳ ରୂପରେ କିଏ ଯେ କେତେ କଣ ହରାଇଛି ତାକୁ ଶବ୍ଦରେ କହିବା ନିହାତି କଷ୍ଟକର । କାହାର ପୂରା ପରିବାର ଭାସିଯାଇଛି, କିଏ କାଦୁଅ ପଙ୍କ ତଳେ ଜୀବନ ହାରିଛି । ପ୍ରଳୟଙ୍କାରୀ ବନ୍ୟାକୁ ୪ ଦିନ ବିତିସାରିଥିଲେ ବି ଉଦ୍ଧାର କାର୍ଯ୍ୟ ଜାରି ରହିଛି । ସେପଟେ କିଛି ନିଚ୍ଚ ମାନସିକତାର ଲୋକ ଅସହାୟ ଲୋକଙ୍କ ଫାଇଦା ଉଠାଇବାକୁ ତିଳେ ବି ସୁଯୋଗ ଛାଡ଼ିନାହାନ୍ତି । ଏପରି କିଛି ଘଟଣା ମଧ୍ୟ ସାମ୍ନାକୁ ଆସୁଛି ଯାହା ମାନବିକତା ଉପରେ ପ୍ରଶ୍ନ ଉଠାଇଛି ।

• ବ୍ୟାଙ୍କ ଲକରରୁ ୯୨ ଲକ୍ଷ ଚୋରି

ଏହି ଘଟଣାରେ କିଛି ଲୋକ ବନ୍ୟାରେ ଭାସିଯାଇଥିବା ଏକ ବ୍ୟାଙ୍କ ଲକର ଖୋଲି ଭିତରେ ଥିବା ସମସ୍ତ ଟଙ୍କା ବାହାର କରିଦେଇଥିଲେ । ଏହି ମାମଲାରେ ପୋଲିସ ୨୯ ଜଣଙ୍କୁ ଗିରଫ କରିଛି । ଅଭିଯୁକ୍ତଙ୍କଠାରୁ ୯୨ ଲକ୍ଷ ୬୮ ହଜାର ୫୦୫ ନେପାଳୀ ଟଙ୍କା ଜବତ କରାଯାଇଛି । କୁହାଯାଉଛି ଯେ ଏହି ବ୍ୟାଙ୍କ ଲକର ତ୍ରିଶୂଳୀ ନଦୀ କୂଳରେ ମିଳିଛି ।

ଏହି ମାମଲାରେ ଗିରଫ ହୋଇଥିବା ଲୋକଙ୍କ ମଧ୍ୟରେ ଅଛନ୍ତି ପବନ ପୋଡେ, ବୀର ବାହାଦୁର ରାନା ମଗର, ବିନୋଦ ଗିରି, ନବରାଜ ଭେଟୁୱାଲ, ପୂର୍ଣ୍ଣଲାଲ ଶ୍ରେଷ୍ଠ, ବିଷ୍ଣୁମଣି ଅଧିକାରୀ, କୃଷ୍ଣ ମଗର, ଶିବ ବାହାଦୁର ରାଣା ମାଗର, ଯୁବରାଜ ଅଧିକାରୀ, ସୁଶାନ୍ତ ଶ୍ରେଷ୍ଠା, ସୁଚିମ ବାହାଦୁର ରାଣା ମାଗର, ସଭିନ ଶ୍ରେଷ୍ଠା, ପ୍ରେମ ବାହାଦୁର ରାଣା ମାଗର, ଅନିଲ ଭେଟୁୱାଲ ଅଛନ୍ତି ।

• ମୃତଦେହରୁ ଝିଙ୍କିଥିଲେ କାନଫୁଲ

ଅନ୍ୟ ଏକ ଘଟଣାରେ, ନେପାଳ ବନ୍ୟା ସମୟରେ ଜଣେ ମୃତ ମହିଳାଙ୍କ ଶରୀରରୁ ସୁନା କାନଫୁଲ ଚୋରି କରିବା ଅଭିଯୋଗରେ ୨ ଜଣଙ୍କୁ ଗିରଫ କରାଯାଇଥିଲା । ଏହି ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯେଉଁଥିରେ ଜଣେ ପୁରୁଷ ମହିଳାଙ୍କ ଶରୀରରୁ ସୁନା କାନଫୁଲ କାଢ଼ୁଥିବାର ଦେଖାଯାଇଥିଲା । ପ୍ରଥମେ ସେମାନେ ମହିଳାଙ୍କ ମୃତଦେହକୁ କାଠ ସାହାଯ୍ୟରେ ଟାଣିଥିଲେ, ମୃତ ମହିଳାଙ୍କ ଚୁଟି ଧରି ଝିଙ୍କିଥିଲେ । ଆଉ ତାପରେ କାନଫୁଲ ଲୁଟିନେଇଥିଲେ ।

ପଢନ୍ତୁ ଏହି ଖବର: ନେପାଳରେ ଜଳ ପ୍ରଳୟର ସବୁଠୁ ବଡ଼ କାରଣ କଣ ? ଏକ୍ସପର୍ଟ କଲେ ବଡ଼ ଖୁଲାସା

ଏଠାରେ କହିରଖୁଛୁ କି, ନେପାଳରେ ବିପଦ ଏପର୍ଯ୍ୟନ୍ତ ଟଳି ନାହିଁ । ତିବ୍ଦତ ନିକଟରେ ଆଉ ଏକ ହ୍ରଦ ଫାଟିବାର ଆଶଙ୍କା ରହିଛି , ଯାହା ଫଳରେ ଆଉ ଏକ ବନ୍ୟା ଆସିପାରେ ବୋଲି ଚୀନ ନେପାଳକୁ ସତର୍କ କରାଇଛି । ନେପାଳ ସରକାରଙ୍କ ଅନୁଯାୟୀ, ଏବେ ବି ୨୪୨୬ ଜଣ ଲୋକ ନିଖୋଜ ଅଛନ୍ତି ଏବଂ ମୃତ୍ୟୁ ସଂଖ୍ୟା ୬୨୬ରେ ପହଞ୍ଚିଛି ।