Dead Body Earrings Loot / ମାନବ ଜାତି ପାଇଁ ଲଜ୍ଜା; ବନ୍ୟାରେ ଭାସୁଥିବା ଶବରୁ ସୁନା ଅଳଙ୍କାର ଚୋରି

କାଠମାଣ୍ଡୁ: ଚୀନ ଏବଂ ନେପାଳର ସୀମାନ୍ତ ଅଞ୍ଚଳରେ ପ୍ରଳୟଙ୍କରୀ ବନ୍ୟା ଭିତରେ ଏପରି ଏକ ଦୃଶ୍ୟ ସାମ୍ନାକୁ ଆସିଛି, ଯାହା ପୂରା ମାନବ ଜାତିକୁ କଳଙ୍କିତ କରିଛି । ସୁନା ଅଳଙ୍କାର ମୋହରେ ସାମାନ୍ୟ ମାନବିକତା ଭୁଲିଛନ୍ତି ଦୁର୍ବୃତ୍ତ । ନାରାୟଣୀ ନଦୀରେ ବନ୍ୟା ସମୟରେ ଭାସିଯାଇଥିବା ଜଣେ ପୀଡିତାଙ୍କଠାରୁ ସୁନା କାନଫୁଲ ଚୋରି କରିବା ଅଭିଯୋଗରେ ଦୁଇଜଣଙ୍କୁ ଗିରଫ କରାଯାଇଛି । ସେମାନେ ପ୍ରଥମେ ମୃତ ମହିଳାଙ୍କ ଚୁଟିକୁ ଧରି ଟାଣିଥିଲେ ଓ ପରେ ସୁନା କାନଫୁଲ ଝିଙ୍କିଥିଲେ ।

ଏହି ଭିଡିଓଟି ଭାଇରାଲ ହେବାପରେ ଦେଖଣାହାରୀ ଆଶ୍ଚର୍ଯ୍ୟଚକିତ ହୋଇପଡ଼ିଥିଲେ । ଯେଉଁ ପ୍ରଳୟଙ୍କାରୀ ବନ୍ୟା କେତେ ଯେ ପରିବାରକୁ ଛାରଖାର କରିଦେଇଛି, ସେପରି ସ୍ଥିତିରେ ଜଣେ ମୃତଦେହ ସହ ଏପରି ବ୍ୟବହାର କରିବା ସମସ୍ତଙ୍କୁ ଦୁଃଖିତ କରିଛି । ଏହାପରେ ନେପାଳ ପୋଲିସ ୪୧ ସେକେଣ୍ଡର ଭିଡିଓଟିକୁ ପୁନଃସେୟାର କରି କହିଛି ଯେ ମୃତ ମହିଳାଙ୍କ କାନରୁ କାନଫୁଲ ଚୋରି କରିବା ପାଇଁ ଦୁଇ ଜଣଙ୍କୁ ହେପାଜତକୁ ନିଆଯାଇଛି ।

• ମାନବ ଜାତିକୁ ଲଜ୍ଜିତ କଲା ପରି ଭିଡିଓ

ଭାଇରାଲ ଭିଡିଓ କ୍ଲିପ୍‌ରେ ଦେଖାଯାଇଥିଲା ଯେ ଦୁଇ ଜଣ ଯୁବକ ପାଣିରେ ଭାସୁଥିବା ଜଣେ ମହିଳାଙ୍କ ମୃତଦେହକୁ ପ୍ରଥମେ କାଠ ପଟା ଏବଂ ପରେ ତାଙ୍କ କେଶକୁ ଟାଣିଥିଲେ । ଏମିତି ମୃତଦେହକୁ ପାଣିରୁ ଟାଣି ଆଣି ତାଙ୍କ ଉଭୟ କାନରୁ ସୁନା କାନଫୁଲ କାଢ଼ି ସେଗୁଡ଼ିକୁ ନିଜ ପାଖରେ ରଖିଥିଲେ । ଠିକ୍ ଏହି ସମୟରେ ତାଙ୍କ ନିକଟରେ କିଛି ଲୋକ ଠିଆ ହୋଇ ଭିଡିଓ ରେକର୍ଡ କରୁଥିଲେ । ପରେ ଚିତୱନ୍ ପୋଲିସ କହିଛି ଯେ ପ୍ରଚଣ୍ଡ ବନ୍ୟାରେ ନାରାୟଣୀ ନଦୀରେ ଭାସିଯାଉଥିବା ଜଣେ ମହିଳାଙ୍କ ମୃତଦେହ ସହ ଏପରି ହୋଇଛି ।

• ଦୁଇ ଯୁବକଙ୍କୁ ଚିହ୍ନଟ କଲା ପୋଲିସ

ଭିଡିଓ ଆଧାରରେ ପୋଲିସ ୨୫ ବର୍ଷୀୟ ମଦନ ଗୁରୁଙ୍ଗ ଏବଂ ୩୮ ବର୍ଷୀୟ ଉମେଶ ଚୌଧୁରୀଙ୍କୁ ଚିହ୍ନଟ କରିଛି । ଗତ ଗୁରୁବାର ଭରତପୁର ମେଟ୍ରୋପଲିଟାନ୍ ସିଟି-୧ର ପୋଖରା ବସ୍ ପାର୍କ ନିକଟରୁ ଦୁଇ ସନ୍ଦିଗ୍ଧଙ୍କୁ ଗିରଫ କରାଯାଇଛି । ପୋଲିସ କହିଛି ଯେ ଏପରି ଦୁଃଖଦ ସମୟରେ ପୀଡିତମାନଙ୍କୁ ଟାର୍ଗେଟ କରି ଲୁଟପାଟ କିମ୍ବା କୌଣସି ପ୍ରକାରର ଅମାନବୀୟ କାର୍ଯ୍ୟକଳାପକୁ ଆଦୌ ବରଦାସ୍ତ କରାଯିବ ନାହିଁ ।

• ତାଣ୍ଡବ ରଚିଛି ନେପାଳ ବନ୍ୟା

ଗତ ବୁଧବାର ଆସିଥିବା ଜଳ ପ୍ରଳୟ ନେପାଳର ବର୍ଷ ବର୍ଷ ଧରି ଘଟିଥିବା ସବୁଠାରୁ ଭୟଙ୍କର ବନ୍ୟା ବିପର୍ଯ୍ୟୟ ମଧ୍ୟରୁ ଗୋଟିଏ । ନେପାଳ-ତିବ୍ଦତ ସୀମାରେ ହଠାତ୍ ବନ୍ୟା ଏବଂ ଭୂସ୍ଖଳନ ପରେ ନିଖୋଜ ୧୪୦୦ରୁ ଅଧିକ ଲୋକ ନିଖୋଜ ହୋଇଯାଇଛନ୍ତି । ଏବେ ମୃତ୍ୟୁ ସଂଖ୍ୟା ୪୬୯ରେ ପହଞ୍ଚିଥିବାବେଳେ ଏବେ ବି ଖୋଜାଖୋଜି ଜାରି ରହିଛି ।

ପଢନ୍ତୁ ଏହି ଖବର: ବନ୍ୟା କବଳରୁ ଉଦ୍ଧାର ହେଲେ ଜାଁଆଳା ଶିଶୁ; କୋଳେଇ ନେଇ ସାହସ ଦେଲେ ଯବାନ

• ଆସୁଛି ଆଉ ଏକ ପ୍ରଳୟ

ପୁଣି ନେପାଳରେ ହୋଇପାରେ ମହାପ୍ରଳୟ । ନେପାଳରୁ ୧୮ କିମି ଦୂର ତିବ୍ଦତରେ ପୁଣି ସୃଷ୍ଟି ହୋଇଛି ହ୍ରଦ । ଏଠାରେ ଜମା ହୋଇସାରିଲାଣି ୨୦ ଲକ୍ଷ କ୍ୟୁବିକ୍ ମିଟର ଜଳ । ଫଳରେ ପୁନର୍ବାର ବନ୍ୟା ଆଶଙ୍କା ବିଷୟରେ ନେପାଳକୁ ସତର୍କ କରାଇଛି ଚୀନ । ସୀମାର ଉଭୟ ପାର୍ଶ୍ୱରେ ଦୁଇଟି ବଡ଼ ହ୍ରଦ ସୃଷ୍ଟି ହୋଇଛି, ଯାହାକି ଆଗାମୀ ୨ରୁ ୩ ଦିନ ମଧ୍ୟରେ ଫାଟିବା ସହ ବନ୍ୟା ଆଶଙ୍କା ସୃଷ୍ଟି କରିପାରେ । ଚୀନ କହିଛି ଯେ ଆସନ୍ତା ୩ ଦିନ ମଧ୍ୟରେ ପ୍ରାୟ ୩୦ ଲକ୍ଷ ଘନ ମିଟର ପାଣି ବା ପ୍ରାୟ ୧୨୦୦ ଅଲମ୍ପିକ୍ ସ୍ଵିମିଂ ପୁଲ୍ ଯେତିକି ପାଣି ହ୍ରଦରେ ପହଞ୍ଚିପାରେ ।