ଭଣ୍ଡାରିପୋଖରୀ (ଭଦ୍ରକ): ଦଶହରାରେ ଗଡ଼ିଲା ସ୍ତ୍ରୀର ମୁଣ୍ଡ । ପାରିବାରିକ କଳହରୁ ଜଘନ୍ୟ ହତ୍ୟା । ଦଶହରାରେ ରକ୍ତମୁଖା ହେଲା ସ୍ଵାମୀ । ଦା'ରେ କାଟି ଦେଲା ସ୍ତ୍ରୀର ବେକ । ସରକାରୀ ଚାକିରିଆ ସ୍ଵାମୀର ଏଭଳି ନୃଶଂସ କାର୍ଯ୍ୟ ଭଦ୍ରକ ଜିଲ୍ଲାରେ ଚାଞ୍ଚଲ୍ୟ ସୃଷ୍ଟି କରିଛି । ଧାନକଟା ଦା'ରେ ସ୍ତ୍ରୀ ବେକକୁ ହାଣି ହତ୍ୟା କରିଛନ୍ତି ଏବିଡିଓ ସ୍ଵାମୀ ।

ଏଥିସହ ପଢ଼ନ୍ତୁ: ଭୂସ୍ଖଳନ ପରେ ମାଟି ତଳେ ବାପପୁଅ ଚାପି ହୋଇ ରହିଥିବା ସନ୍ଦେହ

ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଅଞ୍ଚଳରେ । ସୂଚନା ଅନୁସାରେ, ବନ୍ତ ବ୍ଲକ ଏବିଡିଓ ଭାବେ କାର୍ଯ୍ୟ କରନ୍ତି ଦେବୀ ପ୍ରସାଦ ଜେନା । ଗୁରୁବାର ପାରିବାରିକ କଳହକୁ ନେଇ ପତିପତ୍ନୀ ଝଗଡ଼ା ଲାଗିଥିଲେ । ଶେଷରେ ଉତ୍‌କ୍ଷିପ୍ତ ହୋଇ ଏବିଡିଓ ଦେବୀ ପ୍ରସାଦ ଜେନା ସ୍ତ୍ରୀର ବେକକୁ ଦା'ରେ ଚୋଟ ପକାଇଥିଲେ ।

ଝିଅ ଛଡ଼ାଇବାକୁ ଆସିଥିବା ବେଳେ ଦେବୀ ତାକୁ ବି ଧକ୍କା ପକାଇଥିଲେ । ପ୍ରବଳ ରକ୍ତତ୍ସାବ ହେଉଥିବା ବେଳେ ଗୁରୁତର ଅବସ୍ଥାରେ ମହିଳାଙ୍କୁ ପ୍ରଥମେ ଶାଳନିଆଁ ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ନିଆ ଯାଇଥିଲା । ସେଠାରୁ ଭଦ୍ରକ ଜିଲ୍ଲା ଚିକିତ୍ସାଳୟ ସ୍ଥାନାନ୍ତର କରାଯାଇଥିଲା । ସେଠାରେ ଡାକ୍ତର ଏବିଡିଓଙ୍କ ପତ୍ନୀଙ୍କୁ ମୃତ ଘୋଷଣା କରିଛନ୍ତି ।

ଏଥିସହ ପଢ଼ନ୍ତୁ: ପୁଅ ଆଗରେ ନିଜ ଶାଶୁକୁ ପିଟିଲା ବୋହୁ, ଭିଡିଓ ରେକର୍ଡ କରି ଥାନାରେ ଅଭିଯୋଗ କଲା ନାତି

ସୂଚନା ଅନୁସାରେ, ବନ୍ତ ବ୍ଲକର ଏବିଡିଓ ଦେବୀ ପ୍ରସାଦ ଜେନାଙ୍କ ଘର କେନ୍ଦୁଝର ଜିଲ୍ଲା ହାଟଡିହି ବ୍ଲକ ଡଅଁର ଗାଁରେ । ଦଶହରା ଛୁଟିରେ ଘରେ ପୁଅ, ଝିଅ ଓ ସ୍ତ୍ରୀଙ୍କ ସହ ଏବିଡିଓ ଦେବୀ ପ୍ରସାଦ ଏକାଠି ହୋଇଥିବା ବେଳେ ଏଭଳି ଅଘଟଣ ଘଟିଛି । ଦୀର୍ଘଦିନରୁ ସ୍ଵାମୀ, ସ୍ତ୍ରୀଙ୍କ ମଧ୍ୟରେ ଝଗଡ଼ା ଲାଗି ରହିଥିବା ବେଳେ ଦଶହରାରେ ଏବିଡିଓ ସ୍ଵାମୀ ସବୁ ସୀମା ଟପି ଯାଇଛି ।

ତେବେ ଦଶହରା ଭଳି ଉତ୍ସବ ଦିନରେ ଏବିଡିଓ ସ୍ଵାମୀ ପାରିବାରିକ କଳହର କେଉଁ କାରଣରୁ ଏଭଳି ଚରମ ନିଷ୍ପତ୍ତି ନେଲେ ? ଦେବୀ ପ୍ରସାଦଙ୍କ ମାନସିକ ସ୍ଥିତି ଠିକ୍ ଥିଲା ତ ? ଦା'ରେ ଜଣେ ସରକାରୀ ଚାକିରିଆ ସ୍ତ୍ରୀର ବେକ କାଟି ହତ୍ୟାକୁ ପୋଲିସ ଗୁରୁତର ସହ ନେବା ସହ ଛାନଭିନ୍ ଆରମ୍ଭ କରିଛି ।