Crime In Odisha / ବଢୁଥିବା ଅପରାଧକୁ ନେଇ ସରଜମିନ ରିପୋର୍ଟ ମାଗିଲେ ଡିଜି, ବେପରୁଆ ଅଧିକାରୀଙ୍କୁ ଘାରିଲାଣି ଭୟ

ଭୁବନେଶ୍ଵର: ରାଜ୍ୟରେ ଏବେ ଅପରାଧୀ ବେଲଗାମ୍ । କେଉଁଠି ପନିକିରେ ହାଣି ଯୁବକଙ୍କୁ ଲହୁଲୁହାଣ କରାଯାଉଛି ତ କେଉଁଠି ହତ୍ୟା ପରେ ପୋଡ଼ି ଦେଉଛନ୍ତି ମୃତଦେହ । ବାଲିଅନ୍ତାଠାରୁ କଣାସ ଏବଂ ନୟାଗଡ଼ରୁ ବାଲେଶ୍ୱର ସବୁଠି ରକ୍ତର ଛିଟା । ରାଜ୍ୟରେ ବିଗୁଡୁଥିବା ଏଭଳି ଆଇନଶୃଙ୍ଖଳା ପରିସ୍ଥିତିକୁ ନେଇ ଏବେ ଗମ୍ଭୀର ହୋଇଛନ୍ତି ପୋଲିସ ମୁଖିଆ ।

ବାଲିଅନ୍ତା ହତ୍ୟାକାଣ୍ଡରେ ପୋଲିସର କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠିବା ପରେ, ଯୋଗାଯୋଗ ଏବଂ ସହଯୋଗ ଅଭାବକୁ ଦାୟୀ କରିଛନ୍ତି ପୋଲିସ ଡିଜି । ଏପରିକି ବିଭିନ୍ନ ସମ୍ବେଦନଶୀଳ ମାମଲାରେ ସରଜମିନ ରିପୋର୍ଟ ମାଗିବା ସହ ବେପାରୁଆ ଅଧିକାରୀଙ୍କ ବିରୋଧରେ ବଡ଼ କାର୍ଯ୍ୟାନୁଷ୍ଠାନର ସଂକେତ ଦେଇଛନ୍ତି ।

ଏଥିସହ ପଢ଼ନ୍ତୁ: ଭୁଜାଲି ମାଡ଼ର ଜବାବ ଗୁଳି; ପୋଲିସ ଏନ୍‌କାଉଣ୍ଟରରେ ୨ ଦୁର୍ଦ୍ଦାନ୍ତ ଅପରାଧୀ ଆହତ 

କଣାସରେ ଯୁବକଙ୍କୁ ପନିକିରେ ଆକ୍ରମଣ । ନୟାଗଡ଼ରେ ଦୁଇ ଦୁଇଟି ହତ୍ୟାକାଣ୍ଡ, ନ୍ୟାୟ ପାଇଁ ରାସ୍ତାରୋକ । ବାଲିଅନ୍ତାରେ ଯୁବକଙ୍କୁ ପିଟି ହତ୍ୟା ସହ ରାଜ୍ୟରେ ବିଗୁଡୁଥିବା ଆଇନଶୃଙ୍ଖଳା ପରିସ୍ଥିତିର ସମୀକ୍ଷା କରିଛନ୍ତି ପୋଲିସ ଡିଜି । ବାଲିଅନ୍ତା ହତ୍ୟା ଘଟଣାରେ ପ୍ରାଥମିକ ରିପୋର୍ଟ ହସ୍ତଗତ ହେବା ପରେ ଡିଜିପି, ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି ।

ବାଲିଅନ୍ତ ହତ୍ୟାର ପ୍ରାଥମିକ ରିପୋର୍ଟରେ କଣ ଅଛି ?

ଘଟଣା ଘଟିବା ଠାରୁ ଉଦ୍ଧାର କରିବା ପର୍ଯ୍ୟନ୍ତ ପୋଲିସର କାର୍ଯ୍ୟଶୈଳୀ ସବୁକିଛି ଦର୍ଶାଯାଇଛି । ଯାହାକୁ ନେଇ ଆଗାମୀ ସମୟରେ ଆଉ କିଛି ବରିଷ୍ଠ ଅଧିକାରୀମାନଙ୍କ ଉପରେ ହୋଇପାରେ ବଡ଼ ଧରଣର କାର୍ଯ୍ୟାନୁଷ୍ଠାନ । କମ୍ୟୁନିକେସନ୍, କୋର୍ଡିନେସନ ସହିତ କାହିଁକି ହୋଇପାରିନଥିଲା ଆକ୍ସନ ତାର ଉତ୍ତର ମାଗିଛନ୍ତି ଡିଜି । ସୌମ୍ୟ ହତ୍ୟା ଘଟଣାରେ ଏବେ ସୁଦ୍ଧା ପୋଲିସ ୧୨ ଜଣଙ୍କୁ ଗିରଫ କରିଛି ।

ଏଥିସହ ପଢ଼ନ୍ତୁ: ରାସ୍ତା କଡ଼ରେ ପଡ଼ିଛି ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ; ପୋଲିସ-ସାଇଣ୍ଟିଫିକ୍ ଟିମ୍‌ର ତନାଘନା 

କଣାସରେ ବଜାର ଉପରେ ଯୁବକଙ୍କୁ ପନିକିରେ ହାଣିବା ପରେ ବୁଲେଟ୍ ଚଢ଼ାଇ ଲହୁଲୁହାଣ ଘଟଣାରେ ପୋଲିସ ମୁଖ୍ୟ ଅଭିଯୁକ୍ତ ପପୁ ସମେତ ୬ ଜଣଙ୍କୁ ବାନ୍ଧିଛି । ସେପଟେ ନୟାଗଡ଼ରେ ଯୁବକଙ୍କୁ ହତ୍ୟା ପରେ ଜାଳିଦେବା ଘଟଣାରେ ରାସ୍ତାରୋକ ହୋଇଛି । ଦୁର୍ବୃତ୍ତଙ୍କ ଗିରଫ ଦାବି କରିଛନ୍ତି ଲୋକେ । ଓଡଗାଁରେ ଯୁବକଙ୍କ ହାତ ଗୋଡ଼ କାଟି ପଥର ମାଫିଆ ହତ୍ୟା କରିବା ଘଟଣାରେ ପୋଲିସ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ମଙ୍ଗଳବାର ସେହି ଘଟଣାରେ ହୋଇଛି ସିନ ରିକ୍ରିଏସନ୍ ।

ରାଜ୍ୟରେ ଏଭଳି ବଢୁଥିବା ଅପରାଧକୁ ନେଇ ଡିଜିପି ମାଗିଛନ୍ତି ସରଜମିନ ରିପୋର୍ଟ । ବାଲିଅନ୍ତା, ନୟାଗଡ଼, ବେଲପାହାଡ଼, ବାଲେଶ୍ଵର ଓ ସୋର ହତ୍ୟା ମାମଲା ନେଇ ରିପୋର୍ଟ ମାଗିଛନ୍ତି ପୋଲିସ ଡିଜି । ଆଗକୁ କ୍ରାଇମସ୍ପଟରେ ପହଞ୍ଚିବା ପରେ ପିସିଆରରେ ଡ୍ୟୁଟି କରୁଥିବା କନଷ୍ଟେବଳ ଓ ହୋମଗାର୍ଡଙ୍କୁ ଟ୍ରେଣ୍ଡ ଓ ପିପୁଲ୍ସ ଫ୍ରେଣ୍ଡଲି ହେବାକୁ ଡିଜିପି ଜିଲ୍ଲାୱାରୀ ନିର୍ଦ୍ଦେଶ ବି ଜାରି କରିଛନ୍ତି ।