କେବେ ବି ସୁଧୁରିବନି ପାକିସ୍ତାନ । ପୁଣି ପଦାରେ ପଡ଼ିଲା ଶତ୍ରୁ ଦେଶର କଳା କାରନାମା । ଗାଜିଆବାଦ-ଫରିଦାବାଦ ପରେ ଏବେ ପଞ୍ଜାବରେ କ୍ୟାମେରା ଲଗାଇ କରୁଥିଲା ଗୁପ୍ତଚର କାମ । ଏହି ଘଟଣାରେ ପଞ୍ଜାବ ପୋଲିସ ପଠାନକୋଟରେ ଏକ ସନ୍ଦିଗ୍ଧ ଗୁପ୍ତଚର ନେଟୱର୍କର ପର୍ଦ୍ଦାଫାଶ କରିଛି ଏବଂ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି । ଅଭିଯୁକ୍ତ ଜଣକ ଭାରତୀୟ ସେନାରେ କାମ କରୁଥିଲା ଏବଂ ଅର୍ଦ୍ଧସୈନିକ ବଳର ଗତିବିଧିର ସମ୍ବେଦନଶୀଳ ସୂଚନା ଶତ୍ରୁ ଦେଶ ନିକଟକୁ ପଠାଉଥିଲା ।

• କିଏ ଅଭିଯୁକ୍ତ ବଲଜିତ ସିଂହ ?

ପଠାନକୋଟର ସିନିଅର ସୁପରିଟେଣ୍ଡେଡ୍ ଅଫ୍ ପୋଲିସ (SSP) ତଥା ବରିଷ୍ଠ ଆରକ୍ଷୀ ଅଧିକ୍ଷକ ଦଲଜିନ୍ଦର ସିଂହ ଢିଲୋଙ୍କ କହିବାନୁସାରେ, ଗିରଫ ଅଭିଯୁକ୍ତର ନାମ ବଲିଜତ ସିଂହ ଓରଫ ବିଟ୍ଟୁ ବୋଲି ଜଣାପଡ଼ିଛି, ଯିଏକି ଢାଲିବାଲ ଗାଁର ଅଧିବାସୀ । ଯାଞ୍ଚ ବେଳେ ଜଣାପଡ଼ିଥିଲା ଯେ ଅଭିଯୁକ୍ତ ବଲଜିତ୍ ସୁଜାନପୁର ନିକଟର ଜାତୀୟ ରାଜପଥ-୪୪ରେ ସିସିଟିଭି କ୍ୟାମେରା ଲଗାଇଥିଲା । ଏହି କ୍ୟାମେରା ଜରିଆରେ ସୈନ୍ୟ ଗାଡ଼ି ଉପରେ ନଜର ରଖାଯାଉଥିଲା । ଏହାପରେ ସବୁ ସିସିଟିଭି ଫୁଟେଜ୍ ଇଲେକ୍ଟ୍ରୋନିକ୍ ମାଧ୍ୟମରେ ପାକିସ୍ତାନ ଓ ବିଦେଶରେ ବସିଥିବା ହ୍ୟାଣ୍ଡଲରଙ୍କୁ ନିକଟକୁ ପଠାଯାଉଥିଲା ।

• କେମିତି ଜଣାପଡ଼ିଲା ?

ପଠାନକୋଟ ପୋଲିସର କ୍ରାଇମ ଇନଭେଷ୍ଟିଗେସନ୍ ଏଜେନ୍ସି (CIA) ଟିମ ଯାଞ୍ଚ ସମୟରେ ଏହି ଗୁପ୍ତଚର ନେଟୱର୍କ ବିଷୟରେ ଜାଣିବାକୁ ପାଇଥିଲା ଓ ଅଭିଯୁକ୍ତକୁ ଗିରଫ କରିଥିଲା । ପଠାନକୋଟ ଏସଏସପି ଦଲଜିନ୍ଦର ସିଂ କହିଥିଲେ ଯେ ଅଭିଯୁକ୍ତ ବିଟ୍ଟୁ ସୁଜାନପୁର ନିକଟ ପୋଲ ନମ୍ବର-୪ ଓ ୫ ମଝିରେ ଥିବା ଏକ ଦୋକାନରେ ସିସିଟିଭି କ୍ୟାମେରା ଲଗାଇଥିଲା । ଏହି କ୍ୟାମେରା ଜରିଆରେ ସେହି ରାସ୍ତା ଦେଇ ଯାଉଥିବା ଭାରତୀୟ ଯବାନଙ୍କ ଗାଡ଼ିର ଯାତାୟାତ ଉପରେ ନଜର ରଖାଯାଉଥିଲା । ଏହାର ଲାଇଭ୍ ଫୁଟେଜ୍ ଘରେ ବସି ଦେଖୁଥିଲେ ଆତଙ୍କବାଦୀ । ଏହାପରେ ସୀମାରେ ଆକ୍ରମଣ ପାଇଁ ରହିଥିବା ହ୍ୟାଣ୍ଡଲରମାନଙ୍କୁ ଫୁଟେଜ୍ ପଠାଯାଉଥିଲା । ଏହି ଘଟଣାରେ ଅଭିଯୁକ୍ତ ବ୍ୟତୀତ ଅନ୍ୟ ୩ ଜଣଙ୍କୁ ମଧ୍ୟ ଗିରଫ କରାଯାଇଛି । ସେମାନେ ହେଉଛନ୍ତି ବିକ୍ରମଜିତ୍ ସିଂହ ଓରଫ ବିକ୍କା, ବଲବିନ୍ଦର ସିଂହ ଓରଫ ବିକ୍କି ଏବଂ ତରଣପ୍ରୀତ ସିଂହ ଓରଫ ଟନ୍ନୁ ।

ପଢନ୍ତୁ ଏହି ଖବର: ସୈନିକଙ୍କ ଫଟୋ ପଠାଉଥିଲେ ପଞ୍ଚର୍ ଦୋକାନୀ, ଫଟୋ ପିଛା ପାକିସ୍ତାନ ଦେଉଥିଲା ୬ ହଜାର ଟଙ୍କା

• ପୂର୍ବରୁ ଗାଜିଆବାଦରେ ଧରାପଡ଼ିଥିଲେ ୫ ଅଭିଯୁକ୍ତ

ଗତ କିଛି ଦିନ ପୂର୍ବରୁ ଉତ୍ତର ପ୍ରଦେଶ ଗାଜିଆବାଦର ଅନେକ ଅଞ୍ଚଳରୁ ସୋଲାର କ୍ୟାମେରା ଠାବ କରାଯାଇଥିଲା । ଏହି ସମସ୍ତ ସିସିଟିଭି ଫୁଟେଜ ପାକିସ୍ତାନରେ ବସିଥିବା ଆତଙ୍କବାଦୀ ସଂଗଠନର ପ୍ରମୁଖମାନଙ୍କୁ ଦିଆଯାଉଥିଲା । NIA ଯାଞ୍ଚ ସମୟରେ ୫ଜଣ ନାବାଳକ ଅଭିଯୁକ୍ତଙ୍କୁ ଧରିଥିଲା । ପାକିସ୍ତାନ ଏହି ସିସିଟିଭି କ୍ୟାମେରା ଜରିଆରେ ଭାରତର ସମ୍ବେଦନଶୀଳ ସ୍ଥାନଗୁଡ଼ିକର ଖବର ନେଉଥିଲା, ଯାହାଦ୍ଵାରା ଭାରତର ସୁରକ୍ଷା ବିପଦରେ ପଡ଼ିଥିଲା ।