Gold Robbery / ଦେଢ ବର୍ଷ ନଜରରେ ରଖିଲେ; କଷ୍ଟମ ଅଫିସର କହି ଫିଲ୍ମ ଷ୍ଟାଇଲରେ ଲୁଟିଲେ ସୁନା

ବିହାରର ରାଜଧାନୀ ପାଟନାରେ ଏପ୍ରିଲ ୪ ତାରିଖରେ ବଡ଼ ଧରଣର ଚୋରି । ଖାଗୌଲ ପୋଲିସ ଷ୍ଟେସନ ଅଞ୍ଚଳରେ କଷ୍ଟମ ଅଧିକାରୀ ପରିଚୟ ଦେଇ ୧୪ କିଲୋ ୯୦୦ ଗ୍ରାମ ସୁନା ଲୁଟ ହୋଇଛି । ନଅ ଜଣ ଅଭିଯୁକ୍ତ ଏହି ଘଟଣାରେ ଜଡ଼ିତ ଥିବାବେଳେ ପୋଲିସ ଅଭିଯୁକ୍ତମାନଙ୍କ ମଧ୍ୟରୁ ୩ ଜଣଙ୍କୁ ଗିରଫ କରିଛି । ପୋଲିସ ଏମାନଙ୍କ ଠାରୁ ନଗଦ ଟଙ୍କା ଏବଂ ୫ କିଲୋରୁ ଅଧିକ ସୁନା ଜବତ କରିଛି ।

• କେମିତି ହେଲା ଚୋରି ?

ଚୋରିର ଶିକାର ହୋଇଥିବା ବ୍ୟକ୍ତି ଜଣକ ଜଣେ ସୁନା ବ୍ୟବସାୟୀ ଥିଲେ । ସେ ଦାନାପୁର ଷ୍ଟେସନରେ ଓହ୍ଲାଇ ପ୍ରାୟ ୧୫ କିଲୋଗ୍ରାମ ସୁନା ଧରି ଏକ ଟେମ୍ପୋରେ ଯାତ୍ରା କରୁଥିଲେ । ଠିକ୍ ଏହି ସମୟରେ ଟେମ୍ପୋ ସାମ୍ନାରେ ଏକ କାର ଅଟକିଗଲା । ଅଭିଯୁକ୍ତମାନେ କାରରୁ ଓହ୍ଲାଇ ନିଜକୁ କଷ୍ଟମ୍ସ ଅଧିକାରୀ ବୋଲି ପରିଚୟ ଦେଲେ ଏବଂ ବ୍ୟବସାୟୀଙ୍କୁ ଚୋରମାନେ ନିଜ ଗାଡିରେ ବସାଇବାକୁ ବାଧ୍ୟ କଲେ । ତା'ପରେ ସେମାନେ ବନ୍ଧୁକ ମୁନରେ ତାଙ୍କଠାରୁ ସମସ୍ତ ସୁନା ଲୁଟି ନେଇ ଏକ ନିର୍ଜନ ଅଞ୍ଚଳରେ ଛାଡି ଦେଲେ ।

• ନକଲି କଷ୍ଟମ୍ ଅଧିକାରୀ ୩ ଗିରଫ

ଯେତେବେଳେ ପୋଲିସ ଏହି ଘଟଣା ବିଷୟରେ ଜାଣିବାକୁ ପାଇଲା, ସେତେବେଳେ ତୁରନ୍ତ ଆକ୍ଟିଭ୍ ମୋଡକୁଆସିଥିଲା । ପାଟନା ଏସଏସପିଙ୍କ ନେତୃତ୍ୱରେ ଏକ ସ୍ୱତନ୍ତ୍ର ତଦନ୍ତ ଦଳ (ଏସଆଇଟି) ଗଠନ କରାଯାଇଥିଲା । ଏହାସହିତ ସ୍ୱତନ୍ତ୍ର କାର୍ଯ୍ୟ ବାହିନୀ (ଏସଟିଏଫ) ମଧ୍ୟ ମାମଲାର ତଦନ୍ତ ଆରମ୍ଭ କରିଥିଲା । ଯାଞ୍ଚ ପରେ ବର୍ତ୍ତମାନ ପୋଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିଛି । ସେମାନଙ୍କ ନିକଟରୁ ₹୧, ୯୭, ୦୦୦ ନଗଦ ଟଙ୍କା ଏବଂ ୫ କିଲୋ ୪୦୦ ଗ୍ରାମ ସୁନା ଜବତ କରିଛି ।

ପଢନ୍ତୁ ଏହି ଖବର: ୫ ମାସ ପର୍ଯ୍ୟନ୍ତ ଝିଅ ଶବ ସହ ରହୁଥିଲା ବାପା; କେମିତି ଖୋଲିଲା ରାଜ୍ ?

• ଦେଢ ବର୍ଷ ଧରି ନଜର ରଖିଥିଲେ

ଏସଏସପି କାର୍ତ୍ତିକେୟ କେ. ଶର୍ମା କହିଛନ୍ତି ଯେ ଅଭିଯୁକ୍ତମାନେ ଏକ ଚୋରି ଗାଡ଼ି ବ୍ୟବହାର କରି ଏହି ଅପରାଧ ଘଟାଇଥିଲେ । ଅଭିଯୁକ୍ତମାନେ ଦେଢ଼ ବର୍ଷ ଧରି ବ୍ୟବସାୟୀଙ୍କୁ ପିଛା କରୁଥିଲେ । ଗିରଫ ହୋଇଥିବା ବ୍ୟକ୍ତିଙ୍କ ମଧ୍ୟରେ ଅମରନାଥ ଓରଫ ଗୋପୀ, ଆଦିତ୍ୟ ଗିରି ଏବଂ ସଞ୍ଜୟ କୁମାର ଗିରଫ ହୋଇଛନ୍ତି । ପୋଲିସ କହିଛି ଯେ ୩ ଜଣ ଅଭିଯୁକ୍ତ ପାଟନା ସହରର ମେହେନ୍ଦି ଗଞ୍ଜ ପୋଲିସ ଷ୍ଟେସନ ଏବଂ ବାଇପାସ୍ ଅଞ୍ଚଳର ବାସିନ୍ଦା । ସେମାନେ ପୂର୍ବରୁ ଜେଲ ଯାଇଛନ୍ତି । ସେମାନଙ୍କ ବିରୁଦ୍ଧରେ ଅନେକ ଥାନାରେ ମାମଲା ରୁଜୁ ହୋଇଛି । ବର୍ତ୍ତମାନ ପୋଲିସ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ଚଢାଉ ଜାରି ରହିଛି ।