Phone Call Scam / କଲ୍ ରିସିଭ୍ କରିବା ପଡ଼ିଲା ମହଙ୍ଗା; ବ୍ୟାଙ୍କ ଆକାଉଣ୍ଟ ଖାଲି, ଫସିଗଲେ ଯୁବକ

ଭୁବନେଶ୍ଵର: Bajaj Finance ନାଁରେ ଲୋନ୍ ଦେବାର ଲୋଭ ଦେଖାଇ ପ୍ରଥମେ ମେସେଜ୍ କଲେ । ତା’ପରେ ଫୋନ୍ କଲେ ସାଇବର ଠକ । ଆଉ କଲ୍ ଉଠାଇବା ପରେ ହିଁ ଆକାଉଣ୍ଟରୁ କଟିଯାଇଛି ଲକ୍ଷାଧିକ ଟଙ୍କା । ନା OTP, ନା ଲିଙ୍କ୍, ନା ସ୍କ୍ରିନ୍ ସେୟାରିଂ । ତଥାପି କେବଳ ଗୋଟିଏ କଲ୍ ଉଠାଇବା ପରେ ଆକାଉଣ୍ଟରୁ କଟିଯାଉଛି ଟଙ୍କା । ସାଇବର ଠକଙ୍କ ଏଭଳି ନୂଆ ତରିକାକୁ ନେଇ ଏବେ ଚିନ୍ତା ବଢ଼ିଛି । ସାଇବର ଠକଙ୍କ ଜାଲରେ ଫସିଯାଇଛନ୍ତି ଓଡ଼ିଆ ଯୁବକ ।

• କଣ ପୂରା ଘଟଣା ?

ବଜାଜ୍ ଫିନାନ୍ସ ନାଁରେ ଲୋନ୍ ଦେବାର ଲୋଭ ଦେଖାଇ ପ୍ରଥମେ ମେସେଜ୍ କରିଥିଲେ । ଏହାପରେ ଯୁବକଙ୍କୁ ଫୋନ୍ କରିଥିଲେ ସାଇବର ଠକ । ଆଉ କଲ୍ ଉଠାଇବା ପରେ ହିଁ ଆକାଉଣ୍ଟରୁ ଟଙ୍କା କଟିଯାଉଥିବା ଅଭିଯୋଗ ଆସିଛି । ମଞ୍ଚେଶ୍ୱର ଅଞ୍ଚଳର ତୁଷାର ପଟ୍ଟନାୟକ ଏଭଳି ସାଇବର ଠକେଇର ଶିକାର ହୋଇଥିବା ଅଭିଯୋଗ ଆଣିଛନ୍ତି ।

• କୌଣସି OTP ଦେଇନଥିଲେ

ତୁଷାରଙ୍କ କହିବା ଅନୁସାରେ, ସେ କୌଣସି OTP ଦେଇନଥିଲେ କି କୌଣସି ଅଜଣା ଲିଙ୍କ୍‌ରେ କ୍ଲିକ୍ କରିନଥିଲେ କିମ୍ବା କାହା ସହ ସ୍କ୍ରିନ୍ ସେୟାର କରିନଥିଲେ । ହେଲେ ଏକ ଅଜଣା କଲ୍ ପରେ ତାଙ୍କ ଆକାଉଣ୍ଟରୁ ଟଙ୍କା କଟିଯାଇଥିବା ଅଭିଯୋଗ ହୋଇଛି । ଘଟଣା ପରେ ସାଇବର ଥାନାର ଦ୍ୱାରସ୍ଥ ହୋଇ ଅଭିଯୋଗ କରିଛନ୍ତି ତୁଷାର । ତେବେ ଏହି ନୂଆ ତରିକାର ସାଇବର ଠକେଇକୁ ନେଇ ଏବେ ଚିନ୍ତା ବଢ଼ିଛି । କେବଳ ଅଜଣା ଲିଙ୍କ୍ କିମ୍ବା OTP ନୁହେଁ, ଅଜଣା ନମ୍ବରରୁ ଆସୁଥିବା କଲ୍‌କୁ ନେଇ ମଧ୍ୟ ସତର୍କ ରହିବା ଜରୁରୀ । ସାଇବର ଠକଙ୍କ ଏଭଳି ନୂଆ ଚାଲ୍‌ରୁ ବର୍ତ୍ତିବା ପାଇଁ ଯୁବପିଢ଼ିଙ୍କ ସମେତ ସମସ୍ତଙ୍କୁ ସଚେତନ ରହିବାକୁ ଆହ୍ୱାନ ଦେଇଛନ୍ତି ଯୁବକ ।

ପଢନ୍ତୁ ଏହି ଖବର: ଭାରତରେ ୧୪୬% ବଢୁଛି ସ୍କାମ; ୨୨,୦୦୦ କୋଟିରୁ ଅଧିକ ସାଇବର ଠକେଇ

• ରଥଯାତ୍ରାରେ ସକ୍ରିୟ ସାଇବର ଠକ

ବିଶ୍ଵପ୍ରସିଦ୍ଧ ରଥଯାତ୍ରା ଚାଲିଥିବାବେଳେ ସାଇବର ଠକମାନେ ବେଶ ସକ୍ରିୟ ହୋଇପଡ଼ିଛନ୍ତି । ରଥଯାତ୍ରାର ନାଁରେ ମଧ୍ୟ ଠକେଇ କରୁଥିବା ଦେଖିବାକୁ ମିଳିଛି । ସେମାନେ ହ୍ଵାଟ୍ସଆପକୁ ରଥଯାତ୍ରା ବୋନସ୍ ନାଁରେ ମେସେଜ୍ ପଠାଉଛନ୍ତି ଏବଂ ଏହାସହିତ ଏକ ଲିଙ୍କ ମଧ୍ୟ ପଠାଉଛନ୍ତି । ଯଦି ରଥଯାତ୍ରା ବୋନସ୍ ଜିତିବାର ଅଛି ତେବେ ସେହି ଲିଙ୍କ ଉପରେ କ୍ଲିକ୍ କରିବାକୁ ମେସେଜ ମାଧ୍ୟମରେ କହୁଛନ୍ତି । ଏପରି ଅଜଣା ନମ୍ବରରୁ ମେସେଜ୍ ଆସିବା ମାତ୍ରେ ତୁରନ୍ତ ତାହାକୁ ରିପୋର୍ଟ ଓ ବ୍ଲକ୍ କରିନିଅନ୍ତୁ । ଭୁଲରେ ଉକ୍ତ ମେସେଜରେ ରିପ୍ଲାଏ ଦିଅନ୍ତୁ ନାହିଁ କି କୌଣସି ଲିଙ୍କ ଉପରେ କ୍ଲିକ୍ କରନ୍ତୁ ନାହିଁ । ନଚେତ୍ ଆପଣ ବି ଠକେଇର ଶିକାର ହୋଇପାରନ୍ତି ।