ଆଇନଜୀବୀ ପୀତବାସ ପଣ୍ଡା ହତ୍ୟା ଘଟଣା। ଏହି ମାମଲାରେ ଏ ପର୍ଯ୍ୟନ୍ତ ପୋଲିସ୍ ୧୩ ଜଣଙ୍କୁ ଗିରଫ କରିସାରିଛି । ଏବେ ବି ପୀତବାସଙ୍କୁ ଗୁଳିମାଡ଼ କରିଥିବା କୁରୁପତି ଭୂୟାଁ ଫେରାର୍ ରହିଛି । ତେବେ ଏହି ମାମଲାରେ ପୋଲିସ୍ ପୂର୍ବତନ ବିଧାୟକ ତଥା ବିଜେଡି ନେତା ବିକ୍ରମ ପଣ୍ଡାଙ୍କୁ ଗିରଫ କରିଛି । ଆଉ ଏବେ ମିଳିଥିବା ସୂଚନା ଅନୁସାରେ ବିକ୍ରମ ପଣ୍ଡାଙ୍କ ପାଇଁ କୋର୍ଟରେ ଲଢ଼ିବେ ୪୪ ଜଣ ଓକିଲ । ଗତକାଲି ୪୪ ଜଣ ଓକିଲ କୋର୍ଟରେ ୱକାଲାତନାମା ଦାଖଲ କରିଛନ୍ତି । ବିକ୍ରମଙ୍କ ଭଳି କର୍ପୋରେଟର ମଳୟ ବିଷୋୟୀ ଓ ବିଜେଡି ନେତା ମଦନ ଦଳେଇଙ୍କ ପାଇଁ ମଧ୍ୟ ସେହି ୪୪ ଜଣ ଓକିଲ ଲଢ଼ିବେ । ଗତକାଲି ୱକାଲତନାମା ଦାଖଲ କରିଥିବା ବେଳେ ଆଜି କୋର୍ଟରେ ଜାମିନ ପାଇଁ ଆବେଦନ କରାଯିବ ବୋଲି ସୂଚନା ମିଳିଛି ।

ଆଇନଜୀବୀ ପୀତବାସ ପଣ୍ଡା ହତ୍ୟା ଘଟଣା ବଢ଼ୁଛି ଗିରଫଦାରୀ ସଂଖ୍ୟା । ଏହି ସଂଖ୍ୟାରେ ଆଉ ଜଣଙ୍କୁ ଗିରଫ କଲା ପୋଲିସ୍ । ଏଥିସହ ମୋଟ ଗିରଫଦାରୀ ସଂଖ୍ୟା ୧୩ରେ ପହଞ୍ଚିଛି । ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ପୋଲିସ ଅଭିଯୁକ୍ତ ସୁନୀଲ ହୋତାକୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି ।

ଅଧିକ ପଢ଼ନ୍ତୁ: ପୀତବାସ ପଣ୍ଡା ହତ୍ୟା ଘଟଣା, ଆଉ ଜଣେ ଅଭିଯୁକ୍ତକୁ ବାନ୍ଧିଲା ପୋଲିସ

ସୁନୀଲ ହୋତା ଜୟପୁର ଫାର୍ମ ହାଉସରେ ହତ୍ୟାକାରୀଙ୍କୁ ଆଶ୍ରୟ ଦେଇଥିବା କଥା ଗୁରୁବାର ବ୍ରହ୍ମପୁର ଏସପି ସୂଚନା ଦେଇଥିଲେ । ତଥ୍ୟ ସଂଗ୍ରହ ପାଇଁ ଫାର୍ମ ହାଉସକୁ ଯାଇଥିବା ବେଳେ ଜଣେ ଜଗୁଆଳି ଗଣମାଧ୍ୟମ ପ୍ରତିନିଧିଙ୍କ ଉପରକୁ କୁକୁର ଛାଡିଦେବା ସହ ମାଲିକ କିଛି କହିବାକୁ ମନା କରିଛନ୍ତି ବୋଲି କହିଥିଲେ। ଏନେଇ ଅର୍ଗସରେ ଖବର ପ୍ରସାରଣ ହୋଇଥିଲା ।

ସେପଟେ ବ୍ରହ୍ମପୁର ବହୁଚର୍ଚ୍ଚିତ ପୀତବାସ ପଣ୍ଡା ହତ୍ୟା ଘଟଣାରେ ବିଜେଡି ନେତା ବିକ୍ରମ ପଣ୍ଡାଙ୍କ ସହଯୋଗୀ ସୁଦର୍ଶନ ଜେନା କଲା ଆତ୍ମ ସମର୍ପଣ । ତିନି ଜଣ ଫେରାର ଅଭିଯୁକ୍ତଙ୍କ ମଧ୍ୟରୁ ଜଣେ ଥିଲା ସୁଦର୍ଶନ ଜେନା । ସେ ଗୁରୁବାର ବୈଦନାଥପୁର ଥାନାରେ ଆତ୍ମସମର୍ପଣ କରିଛି । ତେବେ ଏବେ ବି ପୀତବାସ ପଣ୍ଡା ହତ୍ୟା ଘଟଣାରେ ଆଉ ଦୁଇଜଣ ଅଭିଯୁକ୍ତ ଫେରାର ଅଛନ୍ତି । ବୁଧବାର ୧୨ ଜଣଙ୍କୁ ଗିରଫ କରିଥିଲା ବ୍ରହ୍ମପୁର ପୋଲିସ ।

ଅନ୍ୟପଟେ ହତ୍ୟା ଅଭିଯୁକ୍ତଙ୍କ ସପକ୍ଷରେ ବିଜେଡିର ଓକିଲାତି । ବୁଧବାର ଏସପି ଅଫିସ ଘେରାଉ । ଆଉ ଗୁରୁବାର ବିଜେଡି ସହରରେ ଶୋଭାଯାତ୍ରା କରିଛି । ଗଂଜାମ ଜିଲ୍ଲା ସଭାପତି ବିକ୍ରମ ପଣ୍ଡାଙ୍କୁ ପୀତବାସ ହତ୍ୟାକାଣ୍ଡର ଷଡଯନ୍ତ୍ରକାରୀ କହୁଛି ପୋଲିସ । ବଳିଷ୍ଠ ପ୍ରମାଣ ମିଳିବା ପରେ ଗିରଫ କରି କୋର୍ଟ ଚାଲାଣ କରିଛି । ହେଲେ ବିଜେଡି ନେତା କିନ୍ତୁ ବିକ୍ରମଙ୍କୁ ନିର୍ଦ୍ଦୋଷ କହୁଛନ୍ତି । ପୋଲିସ ତାଙ୍କୁ ମୋହରା ବନାଇ ଫସାଇ ଦେଇଛି ବୋଲି ଅଭିଯୋଗ କରି ଗୁରୁବାର ବି ପ୍ରତିବାଦ କରିଛି ବିଜେଡି । ବ୍ରହ୍ମପୁର ହିଲ୍ ପାଟଣା ସଂସ୍କୃତି ଭବନରୁ ଗାନ୍ଧୀ ନଗର ଛକ ପର୍ଯ୍ୟନ୍ତ କଳାପଟି ବାନ୍ଧି ଶୋଭାଯାତ୍ରାରେ ବାହାରିଥିଲେ ବିଜେଡି ନେତା ଓ କର୍ମୀ ।

ଏପଟେ ବିକ୍ରମଙ୍କ ସପକ୍ଷରେ ବିଜେଡି ନେତାଙ୍କ ପ୍ରତିବାଦକୁ କଡ଼ା ଭାଷାରେ ନିନ୍ଦା କରିଛି ବିଜେପି । ବ୍ରହ୍ମପୁରରେ ଏକ ସାମ୍ବାଦିକ ସମ୍ମିଳନୀ କରି ଦଳ ପାଲଟା ଅଭିଯୋଗ କରିଛି ବିଜେଡି ତଦନ୍ତ ପ୍ରକିୟାରେ ବାଧା ସୃଷ୍ଟି କରିବାକୁ ଚାହୁଁଛି । ଲୋକଙ୍କୁ ଭ୍ରମିତ କରୁଥିବାରୁ ୩ ନେତାଙ୍କ ଗିରଫ ଦାବି କରିଛି ବିଜେପି । ପ୍ରମିଳା ମଲ୍ଲିକ, ଚନ୍ଦ୍ରଶେଖର ସାହୁ ଓ ଭୃଗୁ ବକ୍ସିପାତ୍ରଙ୍କ ବିରୋଧରେ BNS-ର ଧାରା ଅନୁସାରେ ୨୪୯/୨୪୮/୨୪୦/୨୩୮/୨୨୧ରେ କାର୍ଯ୍ୟାନୁଷ୍ଠାନ ଦାବି କରିଛି ବିଜେପି । ଆଇନକୁ ତା ବାଟରେ ଯିବା କଥା କହୁଥିବା ବିଜେଡି ସୁପ୍ରିମୋ କେମିତି ଆଇନର ବାଟ ଓଗାଳୁଛନ୍ତି ବୋଲି ପ୍ରଶ୍ନ କରିଛି ବିଜେପି ।