PNB Bank Fraud / ନା ମେସେଜ୍‌, ନା କ୍ଲିକ୍‌...ଆକାଉଣ୍ଟରୁ ଉଡ଼ିଗଲା ୩୫ କୋଟି

ନୂଆଦିଲ୍ଲୀ: ଲୋକମାନେ ନିଜର କଷ୍ଟ ଅର୍ଜିତ ଟଙ୍କାକୁ ସୁରକ୍ଷିତ ରଖିବା ଏବଂ ଏକ ସ୍ଥିର ହାରରେ ସୁଧ ପାଇବା ପାଇଁ ବ୍ୟାଙ୍କରେ ଟଙ୍କା ଜମା କରନ୍ତି । କିନ୍ତୁ ବ୍ୟାଙ୍କରେ ବି ଯଦି ଟଙ୍କା ସୁରକ୍ଷିତ ନୁହେଁ, ତେବେ ଗ୍ରାହକ କେଉଁଠି ଟଙ୍କାକୁ ରଖିବେ ? ଗ୍ରେଟର ନୋଏଡାର ଆଇଚର (ସେକ୍ଟର ପାଇ-୧) ସ୍ଥିତ ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ଶାଖାରୁ ଗ୍ରାହକମାନଙ୍କ ଆକାଉଣ୍ଟରୁ ପ୍ରାୟ ୩୫ କୋଟି ଟଙ୍କା ଗାଏବ ହୋଇଯାଇଛି, ଯାହାକି ସାଧାରଣରେ ଚିନ୍ତା ସୃଷ୍ଟି କରିଛି ।

ଏହି ସମ୍ପୂର୍ଣ୍ଣ ଠକେଇର ସବୁଠାରୁ ଆଶ୍ଚର୍ଯ୍ୟଜନକ ଦିଗ ହେଉଛି ଯେ ଠକାମିର ଶିକାର ହୋଇଥିବା ଗ୍ରାହକମାନେ ଟ୍ରାଞ୍ଜାକ୍ସନ ହେବା ନେଇ ନିଜ ମୋବାଇଲରେ କୌଣସି ମେସେଜ୍ ନଥିଲେ କିମ୍ବା କୌଣସି ଡକ୍ୟୁମେଣ୍ଟରେ ଦସ୍ତଖତ କରି ନଥିଲେ । କିଛି ଗ୍ରାହକ କହିଛନ୍ତି ଯେ ସେମାନେ କେବଳ ସେମାନଙ୍କ ବାଲାନ୍ସ ଯାଞ୍ଚ କରିବା କିମ୍ବା ଟଙ୍କା ଉଠାଇବାକୁ ଚେଷ୍ଟା କରିବା ସମୟରେ ଏହା ଜାଣିପାରିଥିଲେ । ଏହି ଅଭିଯୋଗ ଆସିବା ପରେ ପୋଲିସ ତଦନ୍ତ ଆରମ୍ଭ କରିଛି ଏବଂ ଶାଖା ପରିଚାଳକଙ୍କ ସମେତ ଅନେକ ବ୍ୟାଙ୍କ କର୍ମଚାରୀଙ୍କୁ ନିଲମ୍ବିତ କରିଛି ।

• ଆକାଉଣ୍ଟରୁ ହଠାତ୍ ଟଙ୍କା ଗାଏବ

ଗଣମାଧ୍ୟମ ଏଜେନ୍ସି ସହିତ କଥାହେବା ସମୟରେ, ବ୍ୟାଙ୍କର ଜଣେ ଗ୍ରାହକ ହନିଫ ଖାନ କହିଛନ୍ତି ଯେ ତାଙ୍କ ସଞ୍ଚୟ ଖାତାରେ ୩୯ ଲକ୍ଷ ଟଙ୍କା ଥିଲା, କିନ୍ତୁ ଏବେ ସେ ଆକାଉଣ୍ଟରେ ଟଙ୍କାଟିଏ ବି ଦେଖିପାରୁନାହାଁନ୍ତି । ହନିଫ ଖାନ କହିଛନ୍ତି ଯେ ସେ ଟଙ୍କା ସ୍ଥାନାନ୍ତର ହେବା ପରେ କୌଣସି ମେସେଜ୍ ପାଇନଥିଲେ କିମ୍ବା କୌଣସି ଡକ୍ୟୁମେଣ୍ଟରେ ଦସ୍ତଖତ ବି କରିନଥିଲେ । ପ୍ରଶ୍ନ ଉଠୁଛି ଯେ ଏତେ ପରିମାଣର ଟଙ୍କା ହଠାତ୍ ତାଙ୍କ ଆକାଉଣ୍ଟରୁ କିପରି ଗାଏବ ହୋଇଗଲା ?

• ଜମି ବଦଳରେ କ୍ଷତିପୂରଣ ପାଇଁ ଆକାଉଣ୍ଟରେ ଟଙ୍କା ଥିଲା

ଯେଉଁ ଲୋକମାନେ ବ୍ଯାଙ୍କ ଆକାଉଣ୍ଟରେ ଟଙ୍କା ହରାଇଛନ୍ତି ସେମାନଙ୍କ ମଧ୍ୟରୁ ଅନେକଙ୍କ ଆକାଉଣ୍ଟରେ ପ୍ରଶାସନ ପକ୍ଷରୁ ଜମି ଅଧିଗ୍ରହଣ ପାଇଁ ମିଳିଥିବା କ୍ଷତିପୂରଣ ଟଙ୍କା ଥିଲା । ବିଜେନ୍ଦ୍ର ସିଂହ ନାମକ ଜଣେ ଚାଷୀ କହିଛନ୍ତି ଯେ ପୂର୍ବରୁ ତାଙ୍କ ସଞ୍ଚୟ ଆକାଉଣ୍ଟରେ ପ୍ରାୟ ୮୭ରୁ ୮୮ ଲକ୍ଷ ଟଙ୍କା ଥିଲା, କିନ୍ତୁ ଏବେ କେବଳ ୧ ଲକ୍ଷ ଟଙ୍କା ବାକି ଅଛି । ଏହା ପ୍ରଶାସନ ପକ୍ଷରୁ ତାଙ୍କୁ ମିଳିଥିବା କ୍ଷତିପୂରଣ ରାଶି ଥିଲା ।

ପଢନ୍ତୁ ଏହି ଖବର: ପୋଲିସ ଜାଲରେ ହତ୍ୟା ଅଭିଯୁକ୍ତ; ଏଆଇ ସହାୟତାରେ ଛେଳିକୁ ନେଇ କରିଥିଲେ ନିଜର ଶବଦାହ

ସେହିପରି, ବିରୋଣ୍ଡା ଗାଁର ଜଣେ ମହିଳା କହିଛନ୍ତି ଯେ ସେ ଚା' ଏବଂ ସମୋସା ବିକ୍ରି କରନ୍ତି । ଜେୱାର ବିମାନବନ୍ଦର ପାଇଁ ତାଙ୍କ ଜମି ଅଧିଗ୍ରହଣ କରାଯାଇଥିଲା ଏବଂ ତାଙ୍କୁ ₹୧.୨୯ କୋଟି କ୍ଷତିପୂରଣ ମିଳିଥିଲା । ଏବେ ତାଙ୍କ ଆକାଉଣ୍ଟରୁ ₹୧.୧୮ କୋଟି ମଧ୍ୟ ଗାଏବ ହୋଇଯାଇଛି । ପ୍ରଭାବିତ ଗ୍ରାହକମାନଙ୍କୁ ବ୍ଯାଙ୍କ ଆଶ୍ୱାସନା ଦେଇଛି ଯେ ଆଭ୍ୟନ୍ତରୀଣ ତଦନ୍ତ ସମାପ୍ତ ହେବା ମାତ୍ରେ ସେମାନଙ୍କ ଆକାଉଣ୍ଟକୁ ଟଙ୍କା ପଠାଯିବ । ଏଣୁ ତଦନ୍ତ ପ୍ରକ୍ରିୟା ଉପରେ ଭରସା ରଖିବାକୁ ସେ ଗ୍ରାହକମାନଙ୍କୁ ଅନୁରୋଧ କରିଛି । ଅନ୍ୟପଟେ ଏହି ଘଟଣା ସାମ୍ନାକୁ ଆସିବା ପରେ ୫ ଜଣ ବ୍ୟାଙ୍କ କର୍ମଚାରୀଙ୍କୁ ଚାକିରିରୁ ନିଲମ୍ବନ କରାଯାଇଛି ।