Bride Dies After Marriage / ଇନଷ୍ଟାଗ୍ରାମରେ ବନ୍ଧୁତା, ବର୍ଷକରେ ପ୍ରେମ...ବିବାହର କିଛି ସମୟ ପରେ ନବବଧୂର ଗଲା ଜୀବନ

ପାଟନା: ବିବାହର ପୁର୍ଣ୍ଣିଆ ଜିଲ୍ଲାରୁ ଏମିତି ଏକ ଘଟଣା ସାମ୍ନାକୁ ଆସିଛି, ଯାହାକି ଏକ ପ୍ରେମ କାହାଣୀର ଦୁଃଖଦ ଅନ୍ତକୁ ଦର୍ଶାଇଛି । ୧୯ ବର୍ଷୀୟ ଜଣେ ଯୁବତୀ ପରିବାର ବିରୋଧରେ ଯାଇ ନିଜ ପ୍ରେମିକକୁ ବିବାହ କରିଥିଲେ । ଉଭୟ ଗତ ସୋମବାର ପୁର୍ଣ୍ଣିଆ ଜଙ୍କସନ ରେଳ ଷ୍ଟେସନ ପରିସରରେ ପରସ୍ପରକୁ ସାତ ଜନ୍ମର ସାଥୀ କରିଥିଲେ । ମାତ୍ର ବିବାହର କିଛି ସମୟ ପରେ ଯୁବତୀଙ୍କ ମୃତ୍ୟୁ ଘଟିଥିଲା । ଏବେ ପୋଲିସ ଯୁବତୀଙ୍କ ପ୍ରେମିକକୁ ହେପାଜତକୁ ନେଇ ପଚରାଉଚରା କରୁଛି ।

ମୃତକ ଯୁବତୀଙ୍କ ନାମ ୧୯ ବର୍ଷୀୟ ମନୀଷା କୁମାରୀ ବୋଲି ଜଣାପଡ଼ିଛି । ଯୁବତୀ ଜଣକ ଅରରିଆ ଜିଲ୍ଲାର ନଗର ଥାନା ଅଞ୍ଚଳର ବଟରବାଡିର ଅଧିବାସୀ । ମନୀଷା ବିଏ ପାଠ ପଢୁଥିଲେ ଏବଂ ଗତ ୧ ବର୍ଷ ଧରି ୨୦ ବର୍ଷୀୟ ଦିଲଖୁସ କୁମାରଙ୍କ ସହ ସମ୍ପର୍କରେ ଥିଲେ । ପ୍ରେମିକ ଦିଲଖୁସ ପଲାସୀ ଅଞ୍ଚଳର ଏବଂ ସେ ମଧ୍ୟ ପାଠ ପଢୁଥିଲେ । ପୋଲିସର କହିବାନୁସାରେ, ଉଭୟଙ୍କ ମଧ୍ୟରେ ଇନଷ୍ଟାଗ୍ରାମ ଜରିଆରେ ବନ୍ଧୁତା ହୋଇଥିଲା ଯାହାକି ଧୀରେ ଧୀରେ ପ୍ରେମ ସମ୍ପର୍କରେ ପରିଣତ ହୋଇଥିଲା । ପ୍ରାୟ ୧ବର୍ଷ ପ୍ରେମ ସମ୍ପର୍କରେ ରହିବା ପରେ ସେ ବିବାହ ପାଇଁ ନିଷ୍ପତ୍ତି ନେଇଥିଲେ ।

• ପରିବାର ଥିଲେ ନାରାଜ

ମନୀଷାଙ୍କ ପରିବାର ତାଙ୍କର ବିବାହ ଅନ୍ୟ ଜଣେ ଯୁବକଙ୍କ ସହିତ ଠିକ୍ କରିଥିଲେ । ମନୀଷା ଏହି ପ୍ରସ୍ତାବରେ ଖୁସିନଥିଲେ ଓ ସେ ଦିଲଖୁସଙ୍କ ସହିତ ରହିବାକୁ ଚାହୁଁଥିଲେ । ଏହାପରେ ଉଭୟ ଘର ଛାଡ଼ିବାକୁ ନିଷ୍ପତ୍ତି ନେଇଥିଲେ । ସୋମବାର ଅଗଷ୍ଟ ୧୦ ତାରିଖରେ ପ୍ରାୟ ୧୧.୩୦ଟାରେ ମନୀଷା ଘର ଛାଡ଼ିଥିଲେ । ଏହାପରେ ସେମାନେ ଅପରାହ୍ନ ୨ଟାରେ ପୂର୍ଣ୍ଣିଆ ଷ୍ଟେସନରେ ପହଞ୍ଚିଥିଲେ ଓ ସେଠାରେ ବିବାହ କରିଥିଲେ । ଏହାପରେ ଦିଲଖୁସ ନିଜ ବିବାହର ଫଟୋ ଇନଷ୍ଟାଗ୍ରାମରେ ପୋଷ୍ଟ କରିଥିଲେ ।

• ହଠାତ୍ ଅସୁସ୍ଥ ହୋଇପଡ଼ିଲେ ମନୀଷା

ସୋମବାର ସନ୍ଧ୍ୟାରେ ହଠାତ୍ ମନୀଷାଙ୍କ ସ୍ଵାସ୍ଥ୍ୟାବସ୍ଥା ବିଗିଡ଼ି ଯାଇଥିଲା । ଉଭୟ ରାମବାଗ ପଟରୁ ସିଟି କାଳୀ ମନ୍ଦିରରେ ପୂଜା କରିବାକୁ ବାହାରିଥିଲେ । ଦିନରେ ବହୁତ ଗରମ ପାଗ ଥିଲା । ମନୀଷାଙ୍କ ମୁଣ୍ଡ ବୁଲାଇଥିବା ବୋଲି କହିଥିଲେ । କିଛି ସମୟ ମଧ୍ୟରେ ହିଁ ତାଙ୍କ ସ୍ଵାସ୍ଥ୍ୟାବସ୍ଥା ବିଗିଡିଥିଲା । ସ୍ଥାନୀୟ ଲୋକଙ୍କ ସହାୟତାରେ ମନୀଷାଙ୍କୁ ପୁର୍ଣ୍ଣିଆ ସରକାରୀ ମେଡିକାଲ କଲେଜ ହସ୍ପିଟାଲକୁ ନିଆଯାଇଥିଲା । ମାତ୍ର ଚିକିତ୍ସା ସମୟରେ ହିଁ ମନୀଷାଙ୍କ ମୃତ୍ୟୁ ଘଟିଥିଲା ।

ପଢନ୍ତୁ ଏହି ଖବର: ଚଳିଲାନି Loan, EMI ବାହାନା; ଛାଡ଼ପତ୍ର ପରେ ସ୍ତ୍ରୀଙ୍କୁ ୯୦ ଲକ୍ଷ ଦେବେ ସ୍ଵାମୀ

• କଣ କହିଲା ପରିବାର ?

ମନୀଷାଙ୍କ ଭାଇଙ୍କ କହିବାନୁସାରେ, ଭଉଣୀ ଗାଏବ ହେବାପରେ ସେ ତାଙ୍କୁ ଖୋଜିବା ଆରମ୍ଭ କରିଥିଲେ । ଇନଷ୍ଟାଗ୍ରାମରେ ବିବାହ ଫଟୋ ଦେଖି ମନୀଷାଙ୍କ ପରିବାର ଦିଲଖୁସଙ୍କ ଘରେ ପହଞ୍ଚିଥିଲେ । ମାତ୍ର ସେଠାରୁ ତାଙ୍କୁ ଫେରାଇ ଦିଆଯାଇଥିଲା । ସୋମବାର ଦିଲଖୁସଙ୍କ ବନ୍ଧୁ ମନୀଷାଙ୍କ ମୃତ୍ୟୁ ଖବର ଦେବା ପରେ ଉଭୟ ପରିବାର ଚିନ୍ତାରେ ପଡ଼ିଥିଲା । ଘଟଣା ସମ୍ପର୍କରେ ଖବର ମିଳିବା ପରେ ଫେହାଟ ପୋଲିସ ମନୀଷାଙ୍କ ଶବକୁ ଉଦ୍ଧାର କରିବା ସହ ଦିଲଖୁସଙ୍କୁ ହେପାଜତକୁ ନେଇଛି । ତେବେ ଶବ ବ୍ୟବଚ୍ଛେଦ ପରେ ତାଙ୍କ ମୃତ୍ୟୁର ଅସଲ କାରଣ ଜଣାପଡ଼ିବ ବୋଲି ପୋଲିସ କହିଛି ।