ପାଖେଇ ଆସୁଛି ବିଶ୍ବପ୍ରସିଦ୍ଧ ରଥଯାତ୍ରା । ବେଶୀ ସକ୍ରିୟ ହେଲେଣି ସାଇବର ଲୁଟେରା । ଭକ୍ତ ନିବାସ ଓ ହୋଟେଲ ବୁକିଂ ନାମରେ ଫସୁଛନ୍ତି ଶ୍ରଦ୍ଧାଳୁ । ରଥଯାତ୍ରା ପୂର୍ବରୁ ୪୦ଟି ଫେକ୍‌ ହୋଟେଲ ୱେବସାଇଟ ଓ ଇମେଲ୍ ଆଇଡି ଅକାମୀ କଲା ପୋଲିସ୍ । ୨୦୦ ଟଙ୍କାରେ ୱେବସାଇଟ୍ କିଣି ଲୁଟ୍ କରୁଛନ୍ତି ସାଇବର୍ ଲୁଟେରା । ଦେଢ଼ ବର୍ଷରେ ପଞ୍ଜୀକୃତ କେସ୍‌ ରେକର୍ଡ ଅନୁଯାୟୀ ଲୁଟ୍ ହୋଇଛି ୩ କୋଟିରୁ ଉର୍ଦ୍ଧ୍ବ ଟଙ୍କା । କିନ୍ତୁ ଆଦାୟ ହୋଇଛି ମାତ୍ର ୫ ଲକ୍ଷ ୪୫ ହଜାର ଟଙ୍କା ।

ଅଧିକ ପଢ଼ନ୍ତୁ: କୋଳଥିଆ ଡବଲ ମର୍ଡର ପଛରେ ୨ ସ୍କୁଲ ଛାତ୍ର, ପୋଲିସ୍‌ କହିଲା ହତ୍ୟାକାଣ୍ଡର ଅସଲ କାରଣ

ପୁରୀରେ ବିଭିନ୍ନ ହୋଟେଲ ନାଁରେ ଉପଲବ୍ଧ ହେଉଛି ମାଳ ମାଳ ଫେକ୍ ୱେବସାଇଟ ଓ ଇମେଲ ଆଇଡି । ଭକ୍ତ ନିବାସ ଓ ହୋଟେଲ ବୁକିଂ କଲା ବେଳେ ଅସାବଧାନତାରୁ ଆପଣ ସହିପାରନ୍ତି ବଡ଼ କ୍ଷତି । ମାତ୍ର ୨୦୦ ଟଙ୍କାରେ ୱେବସାଇଟ କିଣି କୋଟି କୋଟି ଟଙ୍କାର ଚୂନା ଲଗାଇଛନ୍ତି ସାଇବର୍ ଲୁଟେରା । ୭୫ ପ୍ରତିଶତ ପଶ୍ଚିମବଙ୍ଗରୁ ଓ ୨୫ ପ୍ରତିଶତ ରାଜସ୍ଥାନ-ପାକିସ୍ତାନ ସୀମାରୁ ଅପରେଟ୍ ହେଉଛି । ଭକ୍ତ ନିବାସ ବୁକିଂ ବେଳେ ଗତ ମେ' ମାସରେ ଠକେଇର ଶିକାର ହୋଇଛନ୍ତି ଖୋର୍ଦ୍ଧାର ମୃତ୍ୟୁଞ୍ଜୟ ସାହୁ । ସେପଟେ ଗୁଗଲରେ ହୋଟେଲ ଖୋଜି ବୁକିଂ କରିଥିବା ପଶ୍ଚିମବଙ୍ଗର ୧୪ ଜଣ ଶ୍ରଦ୍ଧାଳୁ ବି ଠକେଇର ଶିକାର ହୋଇଥିଲେ ।

ପୁରୀରେ ଗତ ଦେଢ଼ ବର୍ଷରେ ଅର୍ଥାତ୍ ୨୦୨୪ ଜୁନରୁ ୨୦୨୬ ଫେବ୍ରୁଆରୀ ପର୍ଯ୍ୟନ୍ତ ସାଇବର ଥାନା ୪୦ ଜଣଙ୍କୁ ଗିରଫ କରିଥିବାବେଳେ ଓ ୫୭ ଜଣଙ୍କୁ ନୋଟିସ୍ ଜାରି କରିଛି । ସେପଟେ ଦେଢ଼ ବର୍ଷରେ ୩ କୋଟିରୁ ଉର୍ଦ୍ଧ୍ବ ଟଙ୍କା ଠକେଇ ହୋଇଥିବା ବେଳେ ଆଦାୟ ହୋଇଛି ମାତ୍ର ୫ ଲକ୍ଷ ୪୫ ହଜାର ଟଙ୍କା । ରଥଯାତ୍ରା ସମୟରେ ସାଇବର୍ ଲୁଟେରାମାନେ ଚିନ୍ତା ବଢ଼ାଇ ଥିବା ବେଳେ ୪୦ଟି ଫେକ୍ ୱେବସାଇଟ ଓ ଇମେଲକୁ ଅକାମୀ କରିଛି ପୋଲିସ୍ ।