ସମ୍ବଲପୁର: ନୃଶଂସ, ବୀଭତ୍ସ, ଭୟାନକ । ଯେତେ ନିନ୍ଦା କଲେ ବି କମ ପଡ଼ିବ ଶବ୍ଦ । ଦିନର ଜନଗହଳି ଭିତରେ ହଜି ଯାଇଛି ମାନବିକତା । ସାମାନ୍ୟ ବ୍ରେଡ୍ ପାଇଁ ମଣିଷ ହୋଇଛି ରକ୍ତମୁଖା । ୧୦ ଟଙ୍କାର ବ୍ରେଡ୍ ପାଇଁ ଜଣେ ଦୋକାନୀ ବଳଦକୁ ଛୁରୀ ଭୁସି ହତ୍ୟା କରିଛନ୍ତି ।

ଏଭଳି ଅଭାବନୀ, ଅମାନୁଷିକ ଘଟଣା ଘଟିଛି ସମ୍ବଲପୁର ଜିଲ୍ଲା ହୀରାକୁଦ ଥାନା ଅଞ୍ଚଳରେ । ଯାହାକି ସାରା ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଛି । ହୀରାକୁଦ ସହରର ଦୈନିକ ବଜାରରେ ଏଭଲି କାଣ୍ଡ ଭିଆଇ ବନ୍ଧା ହୋଇଛନ୍ତି ତେଜରାତି ଦୋକାନୀ ଶିବ ମହାନ୍ତି । ଶିବଙ୍କୁ ଗିରଫ ପରେ କୋର୍ଟ ଚାଲାଣ କରିଛି ହୀରାକୁଦ ଥାନା ପୋଲିସ ।

ଏଥିସହ ପଢ଼ନ୍ତୁ: ପଞ୍ଚୁକରେ ଶ୍ରୀଜୀଉଙ୍କ ଦର୍ଶନ ଲାଗି ଅସମ୍ଭାଳ ଭିଡ଼, ଠେଲାପେଲା ସ୍ଥିତି ପରେ ପୁରୀରେ ପୋଲିସ ଡିଜି

ସୂଚନା ଅନୁସାରେ, ସବୁଦିନ ଭଳି ରବିବାର ବି ହୀରାକୁଦ ସହରର ଦୈନିକ ହାଟରେ ଗହଳି ଜମିଥିଲା । ବେପାର ଜମି ଆସୁଥିବା ବେଳେ ବଢ଼ୁଥିଲେ ଗ୍ରାହକ । ଆଉ ଏହି ସମୟରେ ଶିବ ମହାନ୍ତିଙ୍କ ରାସନ ଦୋକାନ ବାହାରେ ଝୁଲୁଥିବା ଏକ ବ୍ରେଡ୍‌ ପ୍ୟାକେଟକୁ ଭୋକ ବିକଳରେ ଟାଣି ନେଇ ଯାଇଥିଲା ବଳଦଟି ।

ବଳଦଟି ବ୍ରେଡ୍ ନେବାରୁ ରାସନ ଦୋକାନୀ ଶିବ ମହାନ୍ତି ଉତ୍‌କ୍ଷିପ୍ତ ହୋଇ ଉଠିଥିଲେ । ହାଟର ଗହଳି ଭିତରେ ଦୋକାନରୁ ଛୁରି ଆଣି ଶିବ, ବଳଦଟିକୁ ବାରମ୍ବାର ଆଘାତ କରିଥିଲେ । ଶେଷରେ ବ୍ରେଡ୍ ପାଇଁ ବଳଦଟିର ଜୀବନ ଚାଲି ଯାଇଥିଲା ।

ରକ୍ତ ଜୁଡୁବୁଡ଼ୁ ହୋଇ ହାଟର ରାସ୍ତା ଉପରେ ଛଟପଟ ହୋଇଥିଲା ବଳଦଟି । ସ୍ଥାନୀୟ ପ୍ରାଣୀ ଚିକିତ୍ସାଳୟକୁ ଲୋକେ ଖବର ଦେଇଥିଲେ । ଡାକ୍ତର ଆସି ପହଞ୍ଚିବା ବେଳେକୁ ବଳଦଟି ଆଖି ବୁଜି ସାରିଥିଲା । ଘଟଣା ନେଇ ସ୍ଥାନୀୟ ଲୋକଙ୍କ ଏତଲା ପରେ ପୋଲିସ ରାସନ ଦୋକାନୀ ଶିବ ମହାନ୍ତିଙ୍କୁ ଗିରଫ କରି କୋର୍ଟ ଚାଲାଣ କରିଛି । ଶିବ ଠାରୁ ରକ୍ତ ଭିଜା ଛୁରି ମଧ୍ୟ ଜବତ କରିଛି ପୋଲିସ ।

ଏଥିସହ ପଢ଼ନ୍ତୁ: ଆଖି ବୁଜିଲେ ଓଡ଼ିଶାର 'ମସଲା କିଙ୍ଗ୍' ଶରତ ସାହୁ, ୫ ହଜାର ଟଙ୍କା ନିବେଶରୁ ଆରମ୍ଭ କରିଥିଲେ ବ୍ୟବସାୟ

ପବିତ୍ର ପଞ୍ଚୁକର ପ୍ରଥମ ଦିନ ଏକାଦଶୀରେ ଶିବ, ବଳଦଟିକୁ ଛୁରି ଭୁସି ହତ୍ୟା କରିବା ଚାରିଆଡ଼େ ଚର୍ଚ୍ଚାର ବିଷୟ ପାଲଟିଛି । ପୁରାଣରେ ବର୍ଣ୍ଣିତ ନନ୍ଦୀଙ୍କୁ ମହାଦେବ ଶିବଙ୍କ ବାହାନ ରୂପେ ମଣିଷ ପୂଜା କରୁଛି । ହେଲେ ଏଠି ଜୀବନ୍ତ ନନ୍ଦୀଙ୍କୁ ଶିବ ନାମ୍ନୀ ମଣିଷ, ସାମାନ୍ୟ ବ୍ରେଡ୍ ପାଇଁ ହତ୍ୟା କରିବାକୁ ପଛାଇ ନାହିଁ । ଶିବ ମହାନ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ସ୍ଥାନୀୟ ଲୋକେ ।