Fake Currency Racket / ପଞ୍ଚମ ଫେଲ୍‌ର ବଡ଼ କାରନାମା; ପ୍ରିଣ୍ଟରରେ ଛାପୁଥିଲା ଲକ୍ଷ ଲକ୍ଷର ନକଲି ନୋଟ୍

ଲକ୍ଷ୍ନୌ: ମାତ୍ର ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠପଢା । ହେଲେ ବୁଦ୍ଧି କୌଣସି ଚାଲାକି ଲୋକଙ୍କଠୁ କମ ନୁହଁ । ଗୋଟିଏ ପ୍ରିଣ୍ଟର, କାଗଜ, କାଳି ସହ କିଛି ସାମଗ୍ରୀ । ଏହି କିଛି ଜିନିଷରେ ଲକ୍ଷ ଲକ୍ଷ ଟଙ୍କାର ନକଲି ନୋଟ୍ ତିଆରି ଚାଲିଥିଲା । ଏହାପରେ ନକଲି ନୋଟ୍‌ଗୁଡ଼ିକୁ ନେଇ ବଜାରରେ ଅଦଳବଦଳ ହେଉଥିଲା । ଏହି ବେଆଇନ କାମ ପାଇଁ ଠକମାନେ ଏପରି ସ୍ଥାନ ବାଛିଥିଲେ, ଯେଉଁଠିକୁ ପ୍ରତିଦିନ ହଜାର ହଜାଲ ଲୋକଙ୍କ ଯିବାଆସିବା ରହେ । କାନପୁର ପୋଲିସ ଶେଷରେ ଏହି ବଡ଼ ଠକେଇର ପର୍ଦ୍ଦାଫାସ କରିଛି । ଅଭିଯୁକ୍ତମାନଙ୍କଠାରୁ ପ୍ରାୟ ୨ ଲକ୍ଷ ୪ ହଜାର ୬୫୦ ଟଙ୍କା ଜବତ କରାଯାଇଛି ।

ଏହି ଘଟଣାରେ କାନପୁର ପୋଲିସ ମୁଖ୍ୟ ଅଭିଯୁକ୍ତ ୫୨ ବର୍ଷୀୟ ଶେର ସିଂହକୁ ଗିରଫ କରିଛି । ଅଭିଯୁକ୍ତ ଶେର ପଞ୍ଚମ ଶ୍ରେଣୀ ପର୍ଯ୍ୟନ୍ତ ପାଠ ପଢିଛି । ରୋଜଗାର କରିବା ପାଇଁ ସେ ବାଛିଥିଲା ଏପରି ରାସ୍ତା । ମାତ୍ର ଗୋଟିଏ ପ୍ରିଣ୍ଟରରୁ ତିଆରି କରୁଥିଲା ମାଳମାଳ ନକଲି ନୋଟ୍ । ପ୍ରତିଦିନ ଏଠାରେ ନକଲି ନୋଟ୍ ଛପାଯାଉଥିଲା । ପରେ ଏହାକୁ ଜନବହୁଳ ସ୍ଥାନରେ ଅଦଳବଦଳ କରାଯାଉଥିଲା ।

• ଭଡ଼ାଘରେ ଚାଲିଥିଲା ଏହି କାରନାମା

ପୋଲିସର କହିବାନୁସାରେ, ନକଲି ନୋଟ୍‌ର ଏହି ଖେଳ କୌଣସି ବଡ଼ କାରଖାନା ନୁହେଁ, ବରଂ ଏକ ଭଡ଼ାଘରେ ଚାଲିଥିଲା । କାନପୁରର ରେଲ ବଜାର ନିକଟ ରାମଲିଲା ପଡ଼ିଆ ନିକଟରେ ଥିବା ଏକ ଭଡ଼ାଘରେ ଚାଲୁଥିଲା । ବାହାରୁ ଦେଖିଲେ ଏହା ଏକ ସାଧାରଣ କୋଠରୀ ପରି ମନେ ହେଉଥିଲା । କିନ୍ତୁ ଭିତରେ ପ୍ରିଣ୍ଟର ଓ ନକଲି ନୋଟ୍ ତିଆରି କରିବାର ସାମଗ୍ରୀ ରଖାଯାଉଥିଲା । ପୋଲିସ ଚଢଉ କରିବା ପରେ କଇଁଚି ସହିତ ପେପର୍ କଟର, କାଳି, କାଗଜ, ବ୍ୟାଗ୍ ଓ ଅନ୍ୟ କିଛି ଉପକରଣ ମିଳିଥିଲା । ପଞ୍ଚମ ଫେଲ୍ ଶେର ସିଂ ଏହି ପୂରା ଘଟଣାର ମାଷ୍ଟରମାଇଣ୍ଡ ଥିଲା ବୋଲି ପୋଲିସ କହିଛି ।

• ୧୦୦ ଟଙ୍କିଆ ନୋଟ୍‌ର ସବୁଠୁ ବଡ଼ ଷ୍ଟକ୍

ପୋଲିସ ଚଢଉ କରିବା ପରେ ସବୁଠୁ ଅଧିକ ୧୦୦ ଟଙ୍କିଆ ନୋଟ୍ ମିଳିଥିଲା । ପ୍ରାୟ ୧୯୯୧ ନକଲି ୧୦୦ ଟଙ୍କିଆ ନୋଟ୍ ମିଳିଥିଲା । ଏହାବ୍ୟତୀତ ୭୧ଟି ୫୦ ଟଙ୍କିଆ ନୋଟ୍ ଓ ୪ଟି ୫୦୦ ଟଙ୍କିଆ ନୋଟ୍ ମିଳିଥିଲା । ପୋଲିସ ପ୍ରାୟ ୨,୦୪,୬୫୦ ଟଙ୍କା ନକଲି ନୋଟ୍ ଜବତ କରିଛି । ଠକମାନେ କମ୍ ଟଙ୍କିଆ ନୋଟ୍ ଜରିଆରେ ବଜାରରେ ନକଲି ନୋଟ୍ ଅଦଳବଦଳ କରୁଥିଲେ । ପୋଲିସ ଏହା ମଧ୍ୟ କହିଛି ଯେ, ନକଲି ନୋଟ୍ ଅଦଳବଦଳ କରିବା ସମୟରେ ସେମାନେ ୩ ଗୁଣା ଅଧିକ ମୂଲ୍ୟରେ ବିକ୍ରି କରୁଥିଲେ । ଏହାକୁ ବିଶେଷ କରି ଭିଡ଼ ସ୍ଥାନରେ ଅଦଳବଦଳ କରାଯାଉଥିଲା ।

ପଢନ୍ତୁ ଏହି ଖବର: ପ୍ଲାଷ୍ଟିକ୍ ନୋଟ୍ କେବେ ଲୋକଙ୍କୁ ମିଳିବ ? RBI ଗଭର୍ଣ୍ଣର କହିଦେଲେ ତାରିଖ

• ଘଟଣାରେ ୩ ଜଣ ଗିରଫ

ଏହି ଘଟଣାରେ କାନପୁର ପୋଲିସ ୩ ଜଣଙ୍କୁ ଗିରଫ କରିଛି । ସେମାନେ ହେଉଛନ୍ତି ସୋମିଲ ଗୁପ୍ତା (୩୬), ଯାହା ବିରୁଦ୍ଧରେ ପୂର୍ବରୁ ୫ଟି ମାମଲା ରହିଛି । ଅନ୍ୟ ଜଣେ ରୋଶନ ଅଲ୍ଲୀ (୨୪) ଏବଂ ମାଷ୍ଟରମାଇଣ୍ଡ ନିଜେ ଶେର ସିଂହ । ପଞ୍ଚମ ଫେଲ୍ ଶେର ବିରୁଦ୍ଧରେ ପୂର୍ବରୁ ୪ଟି ଅପରାଧିକ ମାମଲା ରହିଛି । ଗିରଫ ପରେ ପୋଲିସ ୩ ଜଣ ଅଭିଯୁକ୍ତଙ୍କୁ କୋର୍ଟରେ ହାଜର କରିଥିଲା । ଏବେ ସେମାନଙ୍କୁ ନ୍ୟାୟିକ ହେପାଜତକୁ ପଠାଯାଇଛି ।