Husband Wife Lover Case / ଏମିତି ବି ଏକ ସମ୍ପର୍କ...ଭାଇ ଭାବି ଘରେ ଆଣି ରଖିଥିଲେ; ସାଜିଲା ପତ୍ନୀର ପ୍ରେମିକ

ଲକ୍ଷ୍ନୌ: ଜଣେ ସ୍ଵାମୀ, ତାଙ୍କ ପତ୍ନୀ ଓ ପତ୍ନୀର ପ୍ରେମିକ ମଧ୍ୟରେ ସମ୍ପର୍କ ଏବେ ସମସ୍ତଙ୍କୁ ଚକିତ କରିଛି । କାରଣ ଧୋକା ଖାଇଥିବା ବ୍ୟକ୍ତି ଜଣକ ପତ୍ନୀର ପ୍ରେମିକକୁ ଭାଇ ବୋଲି ପରିଚୟ ଦେଇଥିଲେ । ସେ ମଝିରେ ମଝିରେ ଘରକୁ ଆସୁଥିଲେ, ସାଥୀରେ ବସି ଖାଉଥିଲେ ଓ ଏକ ପରିବାର ପରି ସମ୍ପର୍କ ଥିଲା । ହେଲେ ସମୟ ସହିତ ସମ୍ପର୍କର ସମୀକରଣ ବଦଳିଗଲା । ସବୁଠୁ ଆଶ୍ଚର୍ଯ୍ୟକର କଥା ହେଉଛି ସ୍ଵାମୀ ଏହି କଥା ଜାଣିବା ପରେ ମଧ୍ୟ ସେମାନେ ୩ଜଣ ଏକାସାଥୀରେ ଗୋଟିଏ ଘରେ ରହିବାକୁ ରାଜି ହୋଇଗଲେ । ଏପରି ଅବୈଧ ସମ୍ପର୍କ ପଡ଼ୋଶୀଙ୍କୁ ଅସ୍ଵୀକାର ଥିଲା । ଶେଷରେ ଏହି ଘଟଣା ଏବେ ପୋଲିସ ନିକଟରେ ପହଞ୍ଚିଛି ।

• ଏମିତି ବଦଳିଥିଲା ପୂରା କାହାଣୀ

ମହମୁଦାବାଦର ଏହି ଘଟଣାରେ ଶୁଭମ ବର୍ମା, ତାଙ୍କ ପତ୍ନୀ ଅଞ୍ଜୁ ଓ ନୀତିନ ବୋଲି ୩ଜଣଙ୍କ ପରିଚୟ ମିଳିଛି । କୁହାଯାଉଛି ନୀତିନ ପୂର୍ବରୁ ଶୁଭମଙ୍କ ଘରକୁ ଆସୁଥିଲା । ଶୁଭମ ତାକୁ ନିଜର ଛୋଟ ଭାଇ ବୋଲି ଭାବୁଥିଲେ । ଅନେକ ଥର ନୀତିନ ଘରେ ମଧ୍ୟ ରହୁଥିଲା । ହେଲେ ଏହାରି ଭିତରେ ନୀତିନ ଓ ଅଞ୍ଜୁଙ୍କ ମଧ୍ୟରେ ସମ୍ପର୍କର ପରିଭାଷା ବଦଳିଯାଇଥିଲା । ନୀତିନ ଓ ଅଞ୍ଜୁ ପରସ୍ପରକୁ ପ୍ରେମ କରିବା ଆରମ୍ଭ କରିଥିଲେ । ଶେଷରେ ଏପରି ସ୍ଥିତି ଆସିଲା ଯେ ଅଞ୍ଜୁ ନିଜ ସ୍ଵାମୀ ଶୁଭମ ଓ ନୀତିନ ସହିତ ଏକାଠି ରହିବାକୁ ରାଜି ଥିଲେ ।

• ଅଞ୍ଜୁଙ୍କୁ ଛାଡିନଥିଲେ ଶୁଭମ

ସାଧାରଣତଃ ଏପରି ଘଟଣାରେ ସ୍ଵାମୀ ଓ ସ୍ତ୍ରୀଙ୍କ ମଧ୍ୟରେ ବିବାଦ ହୋଇଥାଏ, ଏପରିକି ଘଟଣା ଛାଡ଼ପତ୍ର ପର୍ଯ୍ୟନ୍ତ ପହଞ୍ଚେ । ମାତ୍ର ଏଠି ଶୁଭମ ନିଜ ପତ୍ନୀ ଓ ନୀତିନଙ୍କ ସହିତ ଏକାଠି ଗୋଟିଏ ଛାତ ତଳେ ରହିବାକୁ ରାଜି ଥିଲା । ଏପରିକି ଆବଶ୍ୟକ ପଡ଼ିଲେ ଶୁଭମ ଘର ଛାଡ଼ି ଚାଲିଯିବାକୁ ପ୍ରସ୍ତୁତ ଥିଲା, ମାତ୍ର ଦୁଇ ଜଣଙ୍କ ସହ ସମ୍ପର୍କ ଭାଙ୍ଗିବାକୁ ରାଜି ନଥିଲା । ଅନ୍ୟପଟେ ପରିବାର ଓ ପଡ଼ୋଶୀ ଏପରି ଭାବେ ୩ ଜଣଙ୍କୁ ସାଥୀରେ ରହିବାକୁ ଆଦୌ ଗ୍ରହଣ କରିନଥିଲେ ।

ପଢନ୍ତୁ ଏହି ଖବର: ଆଇଫୋନ ପାଇଁ ଆତ୍ମହତ୍ୟା ଘଟଣା; ଫୋନ ନୁହଁ ଥିଲା ଅନେକ କିଛି କାରଣ, ପଡ଼ୋଶୀ କହିଦେଲେ

• ଥାନାରେ ପହଞ୍ଚିଲା ମାମଲା

ମହମୁଦାବାଦ ପୋଲିସ ନିକଟରେ ଏହି ମାମଲା ପହଞ୍ଚିଥିଲା । ପୋଲିସ ସାମ୍ନାରୁ ଦୁଇ ପକ୍ଷ ବହୁ ସମୟ ଧରି ଆଲୋଚନା କରିଥିଲେ । ଘଟଣା ବୁଝିବା ପରେ ପୋଲିସ ଉଭୟ ପକ୍ଷକୁ ବୁଝାଇବା ସହ ସମସ୍ୟାର ସମାଧାନ ଲାଗି ଉଦ୍ୟମ କରିଥିଲା । ଥାନାଧିକାରୀ ଭାନୁ ପ୍ରତାପ ସିଂ କହିଛନ୍ତି ଯେ ୩ଜଣ ଏବେ ବି ସାଥୀରେ ରହିବାକୁ ଜିଦ୍ ଧରିଥିବାରୁ କୌଣସି ସମାଧାନ ବାହାରିନାହିଁ । ଏହି ଘଟଣାରେ ଦମ୍ପତିଙ୍କ ୨ଜଣ ସନ୍ତାନ ଥିବା ମଧ୍ୟ ଜଣାପଡ଼ିଛି । ଦମ୍ପତି ନିଜ ସହିତ ଦୁଇ ପିଲାଙ୍କୁ ମଧ୍ୟ ରଖିବାକୁ କହୁଛନ୍ତି ।