କଟକରୁ ଜଣେ କଲେଜ ଛାତ୍ରୀଙ୍କୁ ଅପହରଣ କରି ପୁରୀର ଏକ ହୋଟେଲରେ ଦୁଷ୍କର୍ମ କରାଯାଇଥିବା ଅଭିଯୋଗରେ କମିଶନରେଟ୍ ପୋଲିସ ୩ ଜଣଙ୍କୁ ଗିରଫ କରିଛି । ଗତ ନଭେମ୍ବର ମାସରେ ଘଟିଥିବା ଏହି ଅମାନବୀୟ ଘଟଣାର ପର୍ଦ୍ଦାଫାଶ କରିବା ସହ ମୁଖ୍ୟ ଅଭିଯୁକ୍ତଙ୍କୁ ଯାଜପୁର ରୋଡ୍ ଷ୍ଟେସନରୁ କାବୁ କରିଛି କ୍ୟାଣ୍ଟନମେଣ୍ଟ ଥାନା ପୋଲିସ ।

ସୋସିଆଲ ମିଡିଆରେ ବନ୍ଧୁତା, ତା'ପରେ ପ୍ରେମ ଆଉ ଶେଷରେ ପ୍ରତାରଣା । କଟକର ଏକ ପ୍ରତିଷ୍ଠିତ କଲେଜର ଯୁକ୍ତ ୩ ନାବାଳିକା ଛାତ୍ରୀଙ୍କ ସହ ଘଟିଥିବା ଅଭାବନୀୟ ଘଟଣାର ପର୍ଦ୍ଦାଫାଶ କରିଛି କ୍ୟାଣ୍ଟନମେଣ୍ଟ ଥାନା ପୋଲିସ । ଘଟଣାଟି ଗତ ଅକ୍ଟୋବର-ନଭେମ୍ବର ମାସର ହୋଇଥିବା ବେଳେ, ପୋଲିସ ଦୀର୍ଘ ଦିନର ତଦନ୍ତ ପରେ ୩ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି ।

ଅକ୍ଟୋବର ୩୧ ତାରିଖରେ ଅଭିଯୁକ୍ତ ସତ୍ୟବ୍ରତ ପରିଡ଼ା କୌଶଳକ୍ରମେ ନାବାଳିକାଙ୍କୁ ହଷ୍ଟେଲରୁ ପୁରୀ ନେଇଯାଇଥିଲେ । ସେଠାରେ ହୋଟେଲର ରୁମ୍ ନମ୍ବର ୨୦୪ ଓ ୨୦୫ ରୁମ ବୁକ କରିଥିଲେ । ସତ୍ୟବ୍ରତଙ୍କ ସହ ତାଙ୍କର ଅନ୍ୟ ତିନି ସହଯୋଗୀ ପୁରୁଷୋତ୍ତମ ବେହେରା, ସୌମ୍ୟରଞ୍ଜନ ପରିଡ଼ା ଓ କୈଳାଶ ଚନ୍ଦ୍ର ବେହେରା ମଧ୍ୟ ଉପସ୍ଥିତ ଥିଲେ । ଦୁଷ୍କର୍ମ ପରେ ଅଭିଯୁକ୍ତମାନେ ଫେରାର ହୋଇଯାଇଥିଲେ । ମୁଖ୍ୟ ଅଭିଯୁକ୍ତ ସତ୍ୟବ୍ରତ ଦିଲ୍ଲୀରେ ଆତ୍ମଗୋପନ କରିଥିଲେ ।

ତେବେ ଅପରାଧିକୁ ଧରିବା ପାଇଁ ପୋଲିସ ଯାଜପୁର ରୋଡ୍ ଷ୍ଟେସନରେ ଜାଲ ବିଛାଇଥିଲା । ଦିଲ୍ଲୀରୁ ଫେରୁଥିବା ବେଳେ ଷ୍ଟେସନରୁ ମାଷ୍ଟରମାଇଣ୍ଡ ସହ ତାଙ୍କର ଦୁଇ ସହଯୋଗୀଙ୍କୁ କାବୁ କରିଛି ପୋଲିସ । ତେବେ ପୋଲିସ ସୂଚନା ଅନୁଯାୟୀ, ଏହା ଗଣଦୁଷ୍କର୍ମ ନୁହେଁ, ବରଂ ନାବାଳିକାଙ୍କ ପୁରୁଷ ବନ୍ଧୁ ହିଁ ଦୁଷ୍କର୍ମ କରିଛନ୍ତି ଏବଂ ଅନ୍ୟମାନେ ଏଥିରେ ସହାୟତା କରିଥିଲେ । ପୋଲିସ ତିନି ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ, ଫେରାର ଥିବା ଚତୁର୍ଥ ଅଭିଯୁକ୍ତକୁ ଧରିବା ପାଇଁ ପ୍ରୟାସ ଜାରି ରଖିଛି ।

ପଢନ୍ତୁ ଏହି ଖବର: ଜନ୍ମଦାତ୍ରୀ ନା ରାକ୍ଷସୀ ! ନିଜ ୭ ବର୍ଷର ପୁଅ ଆର୍ଯ୍ୟନର ଜୀବନ ନେଲା ମାଆ