Crime In Odisha / ସ୍ତ୍ରୀ ଗର୍ଭ ନଷ୍ଟ ହେଲା ବୋଲି ମାଆକୁ ମାରିଦେଲା ଜହ୍ଲାଦ ପୁଅ

ବାରିପଦା: ୯ ମାସ ଗର୍ଭ ଯନ୍ତ୍ରଣା ସହି ମାଆ ଜନ୍ମ ଦେଇଥିଲା । ନିଜେ ନ ଖାଇ ନ ପିଇ ପୁଅକୁ ପାଳିପୋଷି ବଡ଼ କରିଥିଲା । ବଢ଼ିଲା ପୁଅକୁ ବାହା କରାଇ ନାତି ନାତୁଣୀଙ୍କୁ କୋଳରେ ଧରିବାକୁ ଆଶା ରଖିଥିଲା । ମାଆ ଯେଉଁ ପୁଅ ପାଇଁ ନିଜ ଜୀବନକୁ ତିଳ ତିଳ କରି ଜାଳି ଦେଇଥିଲା, ସେହି ପୁଅ ଆଜି ନିଜ ହାତରେ ମାଆର ଜୀବନ ନେଇ ଯାଇଛି ।

ଏଭଳି ବୀଭତ୍ସ ହତ୍ୟାକାଣ୍ଡ ଘଟିଛି ମୟୂରଭଞ୍ଜ ଜିଲ୍ଲା ବେତନଟୀ ଥାନା ଅଞ୍ଚଳରେ । ବଡ଼ଜମାବଣି ଫାଣ୍ଡି ଅନ୍ତର୍ଗତ ଭାଲିଆଡିହା ପଞ୍ଚାୟତ କଲରାଫୁଲିଆ ଗାଁରେ ପୁଅ, ମାଆକୁ ହତ୍ୟା କରିଛି । ଘର ଆଗରେ ମାଆର ମୃତଦେହ ପଡ଼ିଥିବା ବେଳେ ଧାର ଧାର ହୋଇ ପଡ଼ିଛି ରକ୍ତ ।

ଏଥିସହ ପଢ଼ନ୍ତୁ: ଦଳର ଚିହ୍ନକୁ ହାତରେ ପିନ୍ଧି ବୁଲୁଥିଲେ ଅଜିତ ପାୱାର; ଦାମ୍ କେତେ, କେଉଁ କମ୍ପାନୀର ?

ଅନ୍ଧବିଶ୍ଵାସରୁ ହତ୍ୟା

ମିଳିଥିବା ସୂଚନା ଅନୁସାରେ, ଅଭିଯୁକ୍ତ ପୁଅ ତପନ ସିଂ (୩୩ ବର୍ଷ)ଙ୍କ ସ୍ତ୍ରୀଙ୍କ ଗର୍ଭରେ ଛୁଆ ନଷ୍ଟ ହୋଇ ଯାଇଥିଲା । ଯାହାକୁ ନେଇ ନିଜ ଜନ୍ମ କଲା ମାଆକୁ ସନ୍ଦେହ କରିଥିଲା ତପନ । ୬୦ ବର୍ଷୀୟ ମାଆ ରାଇମଣିଙ୍କୁ ପୁଅ ତପନ ଡାହାଣୀ ବୋଲି ଭାବି ନେଇଥିଲା ।

ସ୍ତ୍ରୀ ଗର୍ଭରେ ଛୁଆ ନଷ୍ଟକୁ ନେଇ ତପନ, ମାଆକୁ ଦାୟୀ କରିଥିଲା । ମନରେ ଅନ୍ଧବିଶ୍ଵାସ ଏତେ ବଢ଼ି ଯାଇଥିଲା ଯେ ଜନ୍ମ କଲା ମାଆକୁ ବି ମାରିବାକୁ ତପନର ହାତ ପଛଘୁଞ୍ଚା ଦେଇ ନଥିଲା । ମନରେ ଟିକିଏ ବି ଅବଶୋଷ ନଥିଲା ।

ଏଥିସହ ପଢ଼ନ୍ତୁ: ସାଟେଲାଇଟ୍ ସର୍ଭେରୁ ଧରାପଡ଼ୁଛି ସତ; ରାସ୍ତା ଓ ନଦୀକୁ ଜମି ଦର୍ଶାଇ କରିଛନ୍ତି ପଞ୍ଜୀକରଣ

ମାଆକୁ ଡାହାଣୀ ସନ୍ଦେହ କରି ତପନ ଧାରୁଆ ଅସ୍ତ୍ରରେ ଆକ୍ରମଣ କରିଥିଲା । ରାଇମଣିଙ୍କ ମୁଣ୍ଡ, କାନରୁ ପ୍ରଚୁର ରକ୍ତସ୍ରାବ ହୋଇଥିବା ବେଳେ ସେ ଘର ଆଗରେ ହିଁ ଆଖି ବୁଜି ଦେଇଛନ୍ତି । ଖବର ପାଇ ବେତନଟୀ ତାନା ପୋଲିସ ଅଭିଯୁକ୍ତ ତପନ ସିଂଙ୍କୁ ଗିରଫ କରିଛି ।