ମହିଳା ଶୌଚାଳୟରେ ସିକ୍ରେଟ୍ କ୍ୟାମେରା । ହଠାତ୍ ଟଏଲେଟରେ କ୍ୟାମେରା ଦେଖି ଅବାକ୍ କର୍ମଚାରୀ । ସରକାରୀ କାର୍ଯ୍ୟାଳୟ ଭିତରେ କେଉଁଠୁ କ୍ୟାମେରା ଆସିଲା ତାକୁ ନେଇ ଏବେ ବେଶ ଚର୍ଚ୍ଚା । ତେବେ ଜଗତସିଂହପୁର ଜିଲ୍ଲା ପରିଷଦ କାର୍ଯ୍ୟାଳୟ ତଥା ଡିଆରଡିଏ ଭବନରେ ମହିଳା ୱାସରୁମରୁ ସିକ୍ରେଟ କ୍ୟାମେରା ଉଦ୍ଧାର କରାଯାଇଛି । ଏହି କ୍ୟାମେରା କିଏ ଓ କେଉଁ ଉଦ୍ଦେଶ୍ୟରେ ଲଗାଇଥିଲା ତାହା ଜଣାପଡିନଥିବା ବେଳେ ଏ ବାବଦରେ ତିର୍ତ୍ତୋଲ ଥାନାରେ ଏତଲା ଦିଆଯାଇଛି ।

• କ୍ୟାମେରା ଦେଖି ଅବାକ୍ ମହିଳା କର୍ମଚାରୀ

ଏତଲା ପାଇ ତିର୍ତ୍ତୋଲ ପୋଲିସ କ୍ୟାମେରାଟିକୁ ଜବତ କରିବା ସହିତ ଅତିରିକ୍ତ ଥାନା ଅଧିକାରୀ ରଘୁନାଥ ଟୁଡୁ ଜିଲ୍ଲା ପରିଷଦ କାର୍ଯ୍ୟାଳୟରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଫାଇନାନ୍ସ କର୍ମଚାରୀ ମଧୁସ୍ମିତା ସାମନ୍ତରାୟ ବାଥରୁମ ଯାଇଥିବା ବେଳେ ଏହି କ୍ୟାମେରା ତଳେ ପଡ଼ି ଯାଇଥିବା ଦେଖିବାକୁ ପାଇଥିଲେ । ଏହାକୁ ଦେଖିବା ପରେ ଦାୟିତ୍ଵରେ ଥିବା ତିର୍ତ୍ତୋଲ ବିଡିଓ ତଥା ଅତିରିକ୍ତ ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକଙ୍କୁ ଅଭିଯୋଗ କରିଥିଲେ । ଅଭିଯୋଗ ପରେ ଗିରିଜା ଶଙ୍କର ମଲ୍ଲିକ ତିର୍ତ୍ତୋଲ ଥାନାରେ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ପରେ ପୋଲିସ ଜିଲ୍ଲା ପରିଷଦ କାର୍ଯ୍ୟାଳୟରେ ପହଞ୍ଚି ଆଜି ତଦନ୍ତ ଆରମ୍ଭ କରିଛି ।

• ତଦନ୍ତ ପାଇଁ ୪ଜଣିଆ ଟିମ୍ ଗଠିତ

ଆଜି ସରକାରୀ ଛୁଟି ଥିବାରୁ ଅଫିସ୍ ବନ୍ଦ ରହିଛି । ଅଫିସ ଖୋଲିଲା ପରେ ଏହାର ପ୍ରକୃତ ସତ୍ୟ ସାମ୍ନାରେ ଆସିପାରିବ । ପୋଲିସ କେସ ନଂ ୨୮୬ରେ ମାମଲା ରୁଜୁ କରି ଏଥିରେ ୪ ଜଣିଆ ଟିମ୍ ମଧ୍ୟ ଗଠନ କରାଯାଇଛି । ଏହି ଟିମରେ ତିର୍ତ୍ତୋଲ ଏସଡିପିଓ ଅଜୟ କୁମାର ଦାସ ଏହାକୁ ମନିଟରଂ କରିବା ସହିତ ଏହାର ସତ୍ୟାସତ୍ୟ ତଦନ୍ତ ପରେ ସାମ୍ନାକୁ ଆସିବ ।

ପଢନ୍ତୁ ଏହି ଖବର: ଘର ମାଲିକର କଳା କାରନାମା, ବାଥ୍‌ରୁମ୍‌ ବଲ୍‌ବରେ ଲଗାଇଥିଲେ ଗୁପ୍ତ କ୍ୟାମେରା

ଅନ୍ୟପକ୍ଷରେ ଜିଲ୍ଲା ପରିଷଦ ଅଧ୍ୟକ୍ଷ ମନୋଜ କୁମାର ବେହେରା କହିଛନ୍ତି, "ଏହାର ତଦନ୍ତ କରାଯିବ । ଯିଏ ଦୋଷୀ ତାକୁ ଉଚିତ ଦଣ୍ଡ ମିଳିବା ଦରକାର ।" ତେବେ ଏହି ଘଟଣା ଏବେ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଏହି ଘଟଣାରେ ଉଚ୍ଚ ସ୍ତରୀୟ ତଦନ୍ତ ଆବଶ୍ୟକ ରହିଛି ।