Argus News - ଫେସବୁକରେ ବନ୍ଧୁତା ସ୍ଥାପନ କରି ମହିଳାଙ୍କୁ ଟାର୍ଗେଟ; ଲୁଟିଲା ଲକ୍ଷ ଲକ୍ଷ

ମହିଳାଙ୍କୁ କରୁଥିଲା ଟାର୍ଗେଟ । ଫେସବୁକରେ ବନ୍ଧୁତା ସ୍ଥାପନ କରିବା ପରେ ଫସାଉଥିଲା । ଚାକିରି ଦେବା ନାଁରେ କରୁଥିଲା ଲକ୍ଷ ଲକ୍ଷ ଟଙ୍କାର ଠକେଇ । ଏପରି ଜଣେ ଠକ ସରୋଜ ନନ୍ଦକୁ ବଲାଙ୍ଗୀରରୁ ଗିରଫ କରିଛି ସୁନ୍ଦରଗଡ ଜିଲ୍ଲା ଭଷ୍ମା ପୋଲିସ । ଭଷ୍ମା ଥାନା ଭାଲୁଗଡ଼ ଅଞ୍ଚଳ ବିଧବା ରଞ୍ଜିତା କାଲୋ ଠକେଇ ହୋଇଥିବା ନେଇ ଏତଲା ଦେଲା ପରେ ପୋଲିସ ସରୋଜକୁ ଗିରଫ କରିଛି । ଠକ ସରୋଜ ନିଜକୁ ଜିଏସଟି ଅଧିକାରୀ ପରିଚୟ ଦେଇ ଲୁଟୁଥିବା ଜଣାପଡ଼ିଛି ।

• ଲୁଟିନେଲା ୧୩ ଲକ୍ଷ ଟଙ୍କା

ରଞ୍ଜିତା ସହ ପ୍ରଥମେ ଫେସବୁକରେ ବନ୍ଧୁତା କରିବା ପରେ ଟଙ୍କା ଦେଲେ ଚାକିରି କରାଇ ଦେବା ପାଇଁ ପ୍ରତିଶ୍ରୁତି ଦେଲା । ରଞ୍ଜିତା ମଧ୍ୟ ତାଙ୍କ ପୁଅ ପାଇଁ ଚାକିରି ଆଶା କରି ନିଜ ଘରଡିହ ଜମିକୁ ବିକ୍ରି କରିବା ସହ ସଂପର୍କୀୟଙ୍କ ଠାରୁ ଧାର ଆଣି ୧୨ ଲକ୍ଷ ୪୫ ହଜାର ଟଙ୍କା ସରୋଜକୁ ଦେଇଥିଲା । ଏହା ପରେ ସରୋଜ ଆହୁରି ଟଙ୍କା ଦାବି କରୁଥିଲା । ରଞ୍ଜିତା କହିଛନ୍ତି ଯେ ଠକ ସରୋଜ ମଝିରେ ମଝିରେ ଫୋନ ଅନ୍ କରି ଟଙ୍କା ମାଗୁଥିଲା ଓ ଟଙ୍କା ପାଇବା ପରେ ଫୋନକୁ ବନ୍ଦ କରିଦେଉଥିଲା ।

• ଟଙ୍କା ନଦେଲେ ଗାଳିଗୁଲଜ କରୁଥିଲା

ଯେତେବେଳେ ରଞ୍ଜିତା ସନ୍ଦେହ କରି ତାଙ୍କୁ ଚାକିରି ବାବଦରେ ପଚାରିବାରୁ ସେ ଅଶ୍ଲୀଳ ଭାଷାରେ ଗାଳି ଗୁଲଜ କରିବା ଆରମ୍ଭ କରିଦେଇଥିଲା । ମୋଟ ୧୫ ଲକ୍ଷ ଟଙ୍କା ଦାବି କରିଥିବାବେଳେ ରଞ୍ଜିତା ତାକୁ ୧୨ ଲକ୍ଷ ୪୫ ହଜାର ଟଙ୍କା ଦେଇଥିବା କହିଛନ୍ତି । ଏପରିକି ସମ୍ପର୍କୀୟଙ୍କଠାରୁ ୬ ଲକ୍ଷ ଟଙ୍କା ଧାର ଆଣି ସରୋଜକୁ ଦେଇଥିଲେ । ଟଙ୍କା ମାଗି ଚାଲିଥିଲା, ହେଲେ ଚାକିରିର ନାଁ ଧରିନଥିଲା । ଏହାପରେ ବାରମ୍ବାର ରଞ୍ଜିତା ଫୋନ କରିବାରୁ ସେ ଆଉ ଫୋନ୍ ଉଠାଇ ନଥିଲା ।

ପଢନ୍ତୁ ଏହି ଖବର: ଏମିତି ଏକ ଗାଁ; ପିଲାଙ୍କୁ ଭଡ଼ାରେ ନେଇ ଦିଆଯାଉଥିଲା ଚୋରି ତାଲିମ; ୬ ଗିରଫ

• ଥାନାର ଦ୍ଵାରସ୍ଥ ହେଲେ ରଞ୍ଜିତା

ଏହାପରେ ରଞ୍ଜିତା ଥାନାର ଦ୍ଵାରସ୍ଥ ହୋଇଥିଲେ । ଭଷ୍ମା ପୋଲିସ ସାଇବର ସେଲର ସହାୟତାରେ ଠକ ସରୋଜକୁ ବଲାଙ୍ଗିରରୁ ଗିରଫ କରିଛି । ସରୋଜର ପ୍ରକୃତ ଘର ବରଗଡ଼ ଜିଲ୍ଲା ଗାଇସିଲେଟ ଥାନା କଣ୍ଡାଗଡ଼ ଅଞ୍ଚଳ । ସେ ବଲାଙ୍ଗୀରରେ ଆତ୍ମଗୋପନ କରି ରହୁଥିଲା । ତା' ଠାରୁ ପୋଲିସ ଏକ ଦାମି କାର, ୮ଟି ମୋବାଇଲ, ଗୋଟିଏ ଟାବଲେଟ, ବିଭିନ୍ନ ବ୍ୟାଙ୍କର ପାସବୁକ, ଏଟିଏମ୍ କାର୍ଡ, ଚେକ୍ ବୁକ୍ ଆଦି ଜବତ କରିଛି । କେବଳ ଜଣେ ମହିଳାଙ୍କୁ ନା ଆହୁରି ମହିଳାଙ୍କୁ ଠକେଇ କରିଛି ତାହା ପୋଲିସ ତଦନ୍ତ ଜାରି ରଖିଥିବା କହିଛନ୍ତି ଏସଡିପିଓ ନିର୍ମଳ କୁମାର ମହାପାତ୍ର ।